Tou Fai He ʼu Ako Tohi-Tapu ʼe Tuputupu
1 Koteā te meʼa ʼaē ʼe tatau ai te fafine leʼo fānau ʼi Tanzanie, mo te taʼahine ʼi Argentine, pea mo te faʼe ʼi Letonia? ʼE fakahā e te Annuaire 1997 (ʼi te ʼu pasina 8, 46, pea mo te 56) ko te ʼu fafine ʼaia e toko tolu, neʼe vave tanatou tuputupu ʼi tanatou ako Tohi-Tapu, he neʼe nātou kole ke fai tuʼa lahi tanatou ako ʼi te vāhaʼa ʼaki te tohi Te ʼAtamai Mālama. Neʼe tokoniʼi te ʼu kaugā fai faka mafola, kapau ʼe feala, pea ʼe lelei ke nātou fai he kapite katoa ʼo te tohi ʼi te ako ʼaē ʼe fai ʼi te vāhaʼa. Kae ʼe mole ko he lekula. Kae ʼe tonu ke lahi te ʼu palakalafe ʼaē ʼe tou fai, ʼo fakalogo anai te faʼahi ʼaia ki te ʼu ʼaluʼaga pea mo te ʼu fealagia ʼo ia ʼaē ʼe ako. Neʼe maʼu te ʼu fua lelei e te kau faiako ʼaē kua māhani, ʼi tanatou fakaʼaogaʼi te ʼu tokoni ʼaē ʼe hoa mai.
2 Ohage ko te meʼa ʼaē neʼe tuʼu ʼi te pepa ʼaē neʼe ʼalutahi mo Te Minisitelio ʼo Te Puleʼaga ʼo Sūnio 1996, ʼe maʼuhiga ke koutou ako kia nātou ʼaē ʼe ako Tohi-Tapu mo koutou peʼe feafeaʼi tanatou teuteuʼi tanatou ako. ʼI te kamata, ʼe ko he meʼa lelei anai takotou fakamahino pea mo fakahā age peʼe feafeaʼi tona fai. Koutou fakahā kia nātou takotou tohi Te ʼAtamai Mālama. Koutou teuteuʼi fakatahi te ʼuluaki kapite. Koutou tokoni ki te kau ako Tohi-Tapu ke nātou maʼu te ʼu kupu tāfito ʼaē ʼe tali fakahagatonu ki te fehuʼi, pea ke nātou fakaʼiloga. Ko ʼihi ʼu kaugā fai faka mafola neʼe nātou foaki ki tanatou kau ako Tohi-Tapu he peni moʼo fakaʼiloga te ʼu tali. Koutou fakaloto mālohiʼi nātou ke nātou toʼo te ʼu vaega faka Tohi-Tapu fuli lolotoga tanatou teuteuʼi tanatou ako. ʼI takotou fai te meʼa ʼaia, ʼe koutou toe akoʼi anai nātou ke nātou teuteu ke nātou kau ki te fono ʼo te Ako Tohi ʼo te Kokelekasio pea mo te Ako ʼo Te Tule Leʼo.—Luka 6:40.
3 Ko he tahi ʼe faiako lelei ʼe ina uga anai ia ia ʼaē ʼe ina ako te Tohi-Tapu ke palalau, kae mole lahi fau te palalau ʼa ia ʼaē ʼe ina fai te ako. ʼE mole lahi anai tana tokaga ki te ʼu manatu ʼaē ʼe mole faʼa maʼuhiga. ʼE tahitahiga anai tana talanoa ki he tahi ʼu manatu. Kae ʼe ina faka maʼuhigaʼi te ʼu manatu tāfito ʼo te ako. Ko ʼihi neʼe nātou foaki ki tanatou ʼu ako Tohi-Tapu he ʼu tohi moʼo tokoni kia nātou ke nātou maʼu te ʼu tali ki tanatou ʼu fehuʼi. Ki muli age, ʼe maʼu anai e nātou ʼaē ʼe nātou fia ʼiloʼi te moʼoni, he tahi age ʼu manatu ʼi tanatou kau ki te ʼu fono ʼo te kokelekasio.
4 ʼE mole lagi ʼaoga anai ke vakaʼi te ʼu vaega fuli ʼaē ʼe tuʼu ʼi te kapite. Ko ʼihi manatu tāfito ʼe feala ke fakamahino ʼaki te ʼu vaega ʼaē ʼe tuʼu ʼi te palakalafe. Lolotoga te fakamanatu, koutou faka maʼuhigaʼi te ʼu vaega tāfito ʼaē neʼe koutou palalau kiai, pea mo koutou fakaloto mālohiʼi ia ia ʼaē ʼe ako ke ina manatuʼi te ʼu vaega ʼaia.
5 ʼE Tonu Ke Loaloaga Feafeaʼi Te Ako?: ʼE mole ʼaoga ke faka tuʼakoi te ako ki he hola e tahi. Ko ʼihi hahaʼi ʼe nātou maʼu he temi pea ʼe lagi nātou loto ke fualoa age tanatou ako. Peʼe lagi loto ia ia ʼaē ʼe ako Tohi-Tapu ke mole tuʼa tahi pe te fai ʼo tana ako ʼi te vāhaʼa. ʼE lagi fua lelei anai te faʼahi ʼaia kia nātou ʼaē ʼe feala ke nātou fai te faʼahi ʼaia.
6 Ohage ko tona fakahā ia Isaia 60:8, ia ʼaho nei ko te ʼu lauʼi teau afe hahaʼi foʼou ʼaē ʼe nātou vikiviki ia Sehova, ʼe nātou “lele mai ohage ko he ʼao, pea ohage ko he ʼu lupe ʼe nātou liliu ki tonatou nofoʼaga,” ki te ʼu kokelekasio ʼo tana hahaʼi. Tou gāue fakatahi mo Sehova, ʼi tana tānaki fakavilivili te hahaʼi ʼaē ʼe hage ko ni ʼu ōvi.—Is. 60:22.