Tou Fakaʼaogaʼi Lelei Te ʼu Pepa Fakaafe
1 ʼE lelei te ʼu pepa fakaafe ʼo te kokelekasio moʼo fakahā ki te hahaʼi te tuʼasila ʼo te Fale ʼo te Puleʼaga pea mo te ʼu hola ʼaē ʼe fai ai te ʼu fono. ʼE ko he meʼa lelei anai hatatou tuku he pepa fakaafe ki te hahaʼi fuli ʼaē ʼe fai palalau mo tatou. Moʼo fakahoko te faʼahi ʼaia, ʼe tonu ke feʼauga te ʼu pepa fakaafe ʼaē ʼe maʼu e te ʼu kokelekasio fuli. Ki te ʼu kokelekasio ʼaē ʼe nātou fetogi tanatou ʼu hola fono, ʼi te māhina ʼo Sanualio ʼo te taʼu fuli, ʼe tonu ke nātou kole lolotoga te māhina ʼo ʼOketopeli ʼi te taʼu fuli he ʼu pepa fakaafe foʼou, ke feala hanatou maʼu tuʼumaʼu he ʼu pepa ʼe feʼauga, ʼaē ʼe tuʼu ai te ʼu hola foʼou ʼo te ʼu fono. ʼE tonu ke fakaʼaogaʼi te pepa Commande de feuilles dʼinvitation ki te faʼahi ʼaia. ʼI takotou kua maʼu te ʼu pepa ʼaia, ʼe lava feafeaʼi hakotou fakaʼaogaʼi fakalelei?
2 ʼE tokolahi te ʼu kaugā fai faka mafola ʼe nātou ʼui ko te fakatoʼo age ki he tahi he pepa fakaafe, ʼe ko he faʼahiga fai lelei ʼaia moʼo kamata ʼo he fai palalau. ʼI tatatou fakatokagaʼi age te polokalama ʼo te ʼu fono, peʼe ko te logo ʼaē ʼe tuʼu ʼi te tuʼa ʼo te pepa fakaafe, ʼe feala ai ke tupu ʼaki ai hatatou fai palalau ʼo ʼuhiga mo tatatou gāue pea mo te ʼu fakatuʼutuʼu ʼo te gāue ʼaia. ʼI te fai faka mafola, ʼe feala ke tuku age e te ʼu mātuʼa ki tanatou fānau ke nātou tufa te kiʼi pepa fakaafe mokā nātou fai te ʼu ʼapi. Ko te ʼu kaugā fai faka mafola ʼaē ʼe nātou faitohi moʼo faka mafola ki te hahaʼi, ʼe tonu ke nātou ʼai fakatahi mo tanatou tohi he pepa fakaafe, pea mo nātou fakaafe ia ia ʼaia ke kau ki te ʼu fono. ʼE lagi feala ke tou tuku he ʼu pepa fakaafe ʼi te ʼu ʼapi ʼaē ʼe lāvaki, kae ke tou tokaga ke tou fakaulu ki te lalo matapā ke mole fakatokagaʼi e he tahi.
3 Ko te ʼu pepa fakaafe neʼe ko he ʼu meʼa gāue neʼe nātou ʼaumai ki te moʼoni te ʼu hahaʼi ʼaē ʼe nātou loto fakamalotoloto. ʼAki te kiʼi pepa fakaafe ʼaia, neʼe feala ai ki te fafine ke ina fakafimālieʼi te meʼa ʼaē neʼe loto kiai talu mai fualoa, ke mahino ki te Tohi-Tapu. ʼI te tahi po, neʼe faikole ki te ʼAtua, pea ʼi te ʼala uhu ake, ko te taumatuʼa Fakamoʼoni neʼe nā fakatagi te kiʼi pele ʼo tona matapā. ʼI tana fakasiosio ʼaē ʼi te kiʼi meʼa fakasiosio ʼo te matapā, neʼe ʼui age e te fafine ʼe mole feala hana avahi te matapā. Neʼe fakaulu e te ʼu Fakamoʼoni te pepa fakaafe ki tona lalo matapā. Neʼe tohi ai: “Koutou fakamāmāhani mo te Tohi-Tapu.” Neʼe sio kiai pea neʼe ina avahi te matapā. Neʼe kamata atu aipe te ako Tohi-Tapu, pea ki muli age neʼe papitema. ʼAua naʼa tou meʼa noaʼi te mālohi ʼo te laumālie ʼa te ʼAtua, kae tou fakaʼaogaʼi lelei tuʼumaʼu te ʼu pepa fakaafe ʼi tatatou fakahoko katoa tatatou minisitelio.—Vakaʼi mo Te Minisitelio ʼo Te Puleʼaga ʼo Fepualio 1994, pasina 1.