Ko He Fai Faka Mafola ʼi Te Malamanei Kātoa Moʼo Fakahā Te Fakatahi Faka Tisitilike “Kua Ōvi Mai Ia Te Hāofaki”
ʼE Kau Fuli Anai Te Kau Fai Faka Mafola ʼo Te ʼu Kokelekasio Ki Te Tufa ʼo Te Pepa Fakaafe Makehe ʼAia
1 ʼO kamata mai te māhina ʼo Maio ʼo te taʼu 2006 ʼi te Potu Noleto ʼo aʼu ki te fai ʼo te ʼu fakatahi faka tisitilike ʼi te malamanei kātoa, ʼe tufa anai te ʼu pepa fakaafe makehe moʼo fakahā ia te ʼu fakatahi ʼaia ʼaē ka fai ʼi te ʼu fenua e 155. ʼI te gāue ʼaia ʼe ʼi ai anai te ʼu fakatahi makehe ʼe fai ʼi Lepupilika Tchèque, ʼi Polonia, ʼi Siamani, lolotoga te māhina ʼo Sūlio pea mo te ʼuluaki vāhaʼa ʼo ʼAukusitō 2006.
2 Mai tona ʼaluʼaga ʼaē kua tou māʼuʼuli nei ʼi te koga fakamuli ʼo te ʼu ʼaho fakaʼosi, pea moʼo fakahā fakalelei ia te fakapapau ʼa te ʼAtua ʼo ʼuhiga mo totatou hāofaki ʼi te tuʼu agakovi ʼaenī, ʼe tonu anai ki te ʼu fakatahi ʼaia ke nātou fai he pāui mālohi ki te hahaʼi ʼaē ʼe nātou lotolelei ki te maʼuli heʼegata. Ko te logo ʼaia ʼe tonu ke ina eke nātou ke nātou fakakaukauʼi te ʼu meʼa ʼaē ka hoko ʼi te ka haʼu. Ke feala ki te ʼu toko lauʼi miliale hahaʼi ke nātou logo ki te logo fakaloto fīmālie pea mo fakatupu ʼamanaki, ʼe fakaloto mālohiʼi te ʼu kokelekasio e 98 000 ʼa te kau Fakamoʼoni ʼa Sehova ʼi te malamanei kātoa ke nātou lagolago ʼaki he loto māfana ki te fakahā ʼo te fakatahi ʼaē ʼe fakaafe nātou kiai.
3 ʼE maʼu anai e te ʼu kokelekasio te ʼu pepa fakaafe feʼauga ke feala ki te kau fai faka mafola fuli ke nātou maʼu takitahi hanatou ʼu pepa e 30. Kapau ʼe toe lahi he ʼu pepa fakaafe pea ʼe foaki age anai ki te ʼu pionie ʼo te kokelekasio. ʼI te ʼu kokelekasio fuli, ʼe kamata tufa anai te ʼu pepa fakaafe ia vāhaʼa e tolu ʼi muʼa ʼo te ʼaho ʼaē ka kamata ai te fakatahi ʼaē ʼe nātou kau ai. ʼE ko he temi faigamālie ʼaia moʼo tufa te ʼu pepa fakaafe ki te ʼu telituale ʼo te kokelekasio.
4 ʼI te ʼu telituale ʼaē ʼe tou lava gāue ai, ʼe fakaloto mālohiʼi ia te kau fai faka mafola fuli ke nātou foaki tonu te ʼu pepa fakaafe ki te hahaʼi ʼo te loto fale. Kae kapau ʼe nātou pupuli, ʼe feala hanatou tuku he pepa fakaafe ʼi te muʼa matapā kae nātou tōkakaga naʼa sio kiai te hahaʼi. Lolotoga te ʼu vāhaʼa ʼaia e tolu, ʼe ʼaoga anai ke tou lagolago fakalelei ki te tufa ʼo te ʼu pepa fuli.
5 ʼE mātou falala, ohage ko tona fakahā ʼi te alatike ʼaenī, ʼe fai anai he fagonogono lahi ʼi malamanei kātoa, moʼo fakahā te Fakatahi Faka Tisitilike ʼaē ko tona kupu tāfito ʼaenī “Kua Ōvi Mai Ia Te Hāofaki” ʼE mātou fakafetaʼi kiā Sehova ʼe ina tapuakina lahi anai takotou ʼu faiga takitokotahi moʼo lagolago ki te tufa ʼaia.