Ko Te Gāue Lahi ʼe Fai ʼi Te Mālamanei Kātoa Moʼo Fakahā Te Fakatahi Faka Tisitilike “Kotou Mulimuli Iā Kilisito!”
ʼE Toe Kau Fuli Anai Te Kau Fai Faka Mafola Ki Te Tufa ʼo Te Pepa Fakaafe Makehe
1 ʼI te taʼu kua hili, neʼe malave mālohi ki te hahaʼi ʼaē neʼe fia logo ki te moʼoni ia te fai faka mafola ʼaē moʼo fakahā ia te Fakatahi Faka Tisitilike “Kua Ōvi Mai Ia Te Hāofaki.” Ko nātou ʼaē neʼe natou tali ia te fakaafe makehe ʼaia pea mo ʼomai ki te fakatahi ʼaia, neʼe ko tanatou hoki sisio ʼaia ki te toe kaitahi fakalaumālie fēia ʼi te lotolotoiga ʼo te kau Fakamoʼoni ʼa Sehova. (Isa. 65:13) Neʼe natou fiafia ʼi te fakatahi mo totatou fāmili fakatautehina lotoʼofa pea mo logo tahi. (Pes. 133:1) Moʼo tokoni ke toe kaugamālie age ia nātou ʼaē kā ʼomai ʼo kau ki te Fakatahi Faka Tisitilike “Kotou Mulimuli Iā Kilisito!” ʼe tou toe tufa anai ia te pepa fakaafe makehe ʼi te mālamanei kātoa.
2 Te ʼu Fua ʼo Te Taʼu Kua ʼOsi: Ko te ʼu fakamatala ʼaē neʼe maʼu mai te ʼu potu fuli ʼo te mālamanei ʼo ʼuhiga mo te tufa ʼaia, neʼe fua lelei ia te fai faka mafola ʼaē moʼo fakahā ia te Fakatahi Faka Tisitilike “Kua Ōvi Mai Ia Te Hāofaki.” ʼE lahi te ʼu potu fenua neʼe natou palalau lelei ai ʼo ʼuhiga mo tātou. Ohagē lā, ʼi te tahi kolo, ko te sulunale neʼe ina tā ia te ʼalatike loaloaga ʼo ʼuhiga mo te tufa ʼaia, ʼe ʼui fēnei ai: “Ke natou aʼu ki te hahaʼi fuli ʼi muʼa ʼo te hoko mai ʼo te fakatahi, neʼe fai e te kau Fakamoʼoni ia te gāue makehe: neʼe lahi tanatou fai faka mafola, ʼo natou haʼele ʼi te ʼu kilometa, pea neʼe mole natou fakatuatuai ʼi te fai palalau.” Ko te tufa ʼo te pepa fakaafe neʼe tupu ai te fia mahino ʼa te kau tā sulunale ʼo te fenua , ʼo natou tā ai te ʼu ʼalatike. Ko sulunale e tolu neʼe natou vikiʼi ia te gāue fai faka mafola ʼaē neʼe fai ʼi muʼa ʼo te hoko mai ʼo te fakatahi. Neʼe tā e te tagata fai sulunale ia te ʼu ʼalatike neʼe pāsina lua ʼi te tahi sulunale ʼo te ʼAhotapu. ʼE fakamahinohino ai te ʼu akonaki ʼaē ʼe tou tui kiai, mo totatou ʼofa fakatautehina, pea mo te tufa ʼo te pepa fakaafe, pea mo te fakatahi. ʼI te fai faka mafola ʼa te tuagaʼane ʼo tufa ia te pepa fakaafe ʼi te tahi matapā, neʼe tuʼusi age e te fafine tana palalau, pea mo ʼui age: “ ʼE au lau nei ia te faʼahi ʼaia ʼi te sulunale!” Neʼe ʼui fēnei e te tahi: “Neʼe au lau te ʼalatike ʼo ʼuhiga mo koutou, pea mo takotou ʼasi mai! Ko taku pepa fakaafe ʼaenā?” ʼOsi ʼaia, pea ʼui age e te fafine: “ ʼE ko he gāue lelei ʼaē ʼe lolotoga fai e te kau Fakamoʼoni ʼa Sehova.”
3 Tokolahi te hahaʼi ʼe fia logo ki te moʼoni neʼe natou ʼomai ki te ʼu koga meʼa ʼaē neʼe fai ai ia te fakatahi mo tanatou ʼu pepa fakaafe ʼi ʼonatou nima. Ko ʼihi neʼe natou ʼomai ki te fakatahi mai te ʼu kolo ʼe tuʼu mamaʼo. Ko tatatou ʼu faiga fakamālotoloto ʼo fakaafe ia te hahaʼi, neʼe tupu ai ia te kaugamālie ʼo te nofoʼaki ʼi te fakatahi, ohagē lā ʼi te tahi kolo neʼe ko te toko 27 ʼi te teau ʼo te hahaʼi neʼe ʼomai ki te fakatahi ʼo laka age ʼi te fakatahi ʼo te taʼu kua hili.
4 Ke Fai Kātoa Ia Te Telituale: ʼE kotou lava kamata tufa ia te pepa fakaafe iā vāhaʼa e tolu ʼi muʼa ʼo te ʼaho ʼo takotou fakatahi. ʼE tonu ke kotou faigaʼi ke fai kātoa ia te telituale ʼo takotou kōkelekāsio. ʼI te ʼu kōkelekāsio ʼaē ʼe lahi tanatou telituale, ʼi te vāhaʼa fakaʼosi ʼi muʼa ʼo te fakatahi, ʼe lava tuku e te kau fai faka mafola ia te pepa fakaafe ʼi te ʼu ʼapi ʼaē ʼe lāvaki, kae ʼaua naʼa tokagaʼi fau e te hahaʼi. ʼE faiga fakamālotoloto anai ia te ʼu kōkelekāsio ke natou tufa fuli ia tanatou ʼu pepa fakaafe pea mo fai kātoa ia tanatou telituale. Ko te ʼu pepa fakaafe ʼaē ʼe toe, ʼe lava foaki age ki te kau pioniē ʼo takotou kōkelekāsio.
5 Te ʼu Palalau ʼAē ʼe Kotou Lava Fai Ki Te Hahaʼi: ʼE feala hakotou ʼui fēnei age: “ ʼE matou kau ki te gāue ʼe fai ʼi te mālamanei kātoa moʼo tufa ʼo te pepa fakaafe ʼaenī ki te hahaʼi ke natou ʼomai ʼo kau ki te toʼotoʼoga maʼuhiga ʼaē kā hoko mai. ʼE ko takotou pepa fakaafe ʼaenī. ʼE kotou maʼu ai anai ʼihi ʼu fakamahino ki te fakaafe ʼaē ʼe fai atu.” Kā kotou fakanounou takotou ʼu palalau, ʼe feala ai anai ke lahi te ʼu pepa ʼaē ʼe tufa. Pea kapau ʼe ʼi ai he ʼu fehuʼi, pea kotou tali kiai. Kā kotou sio ki niʼihi ʼe natou fia logo moʼoni, kotou tohi tona higoa pea kotou toe liliu ʼo ʼaʼahi ia nātou.
6 ʼE maʼuhiga tatatou faiga ʼaē ke tou mulimuli iā Kilisito! (Soa. 3:36) Ko tatatou fakatahi ʼaē kā hoko mai, ʼe tokoni anai kiā nātou fuli ʼaē kā kau kiai, ke natou fai ia te faʼahi ʼaia. ʼE mahino ia ʼe tou ʼamanaki ʼe toe hoko anai he fakavikiviki lahi ʼuhi ko te gāue lahi ʼaē kā fai anai ʼi te mālamanei kātoa moʼo fakahā Te Fakatahi Faka Tisitilike “Kotou Mulimuli Iā Kilisito!” Koia, tou faʼafai ʼo fakaafe he tokolahi ke natou ʼomai ki te fakatahi. ʼOfa pē ke haga ia Sehova ʼo tapuakina lahi takotou ʼu faiga ʼaē ke kotou kau ki te gāue logo tahi ʼaia ʼe fai ʼi te mālamanei kātoa.