Ko He Fakaafe ʼe Fai Fakahagatonu
1. Ko ʼafea ʼae ka kamata ai te tufa ʼo te pepa fakaafe ki te fakatahi lahi ʼae ka fai?
1 Kapau la ʼe kotou teuteuʼi he kaitahi lahi maʼa tokotou famili mo ʼokotou kaumeʼa, ʼe ʼaoga anai ki ai he temi mo he foʼi falā. Koia ka kotou fakaafe anai natou, ʼe kotou fai anai ʼaki he lotofiafia. ʼE toe feia pe mo te teuteuʼi ʼo te katoaga fakalaumalie ʼo te fakatahi lahi ʼae ka fai. Ia vahaʼa ʼe tolu ʼi muʼa ʼo te kamata ʼo te fakatahi, ʼe tou maʼu anai te pilivilesio ʼae ke tou fakaafe te hahaʼi ki te fakatahi ʼaia. Kotea ʼae ka tokoni mai anai ke tou fakaafe te hahaʼi ʼaki he lotofiafia?
2. Kotea ʼae ʼe ina uga anai tatou ke tou lagolago malohi ki te tufa?
2 ʼE tou fia lagolago malohi anai ki te tufa mo kapau ʼe tou fakakaukauʼi ʼaki he lotofakafetaʼi te ʼu lelei fakalaumalie ʼae ʼe foaki mai e Sehova ʼi ʼatatou fakatahi. (Esa. 65:13, 14) Pea tahi, ʼe tonu ke tou fakakaukauʼi te ʼu fua ʼo tatatou tufa. (Vakaʼi te fakamatala ʼae ʼi te ʼa takai “Te ʼu Fua Lelei ʼo Te Faifakaafe.”) ʼE ʼi ai ʼihi ʼi ʼatatou fakaafe ʼe kau anai mo tatou ki te fakatahi. Tatau aipe pe ʼe tali anai e te hahaʼi peʼe kailoa, kaʼe lolotoga te tufa ʼe tou vikiʼi anai ia Sehova ʼaki ʼatatou faiga pea mo tou faʼifaʼitakiʼi ai ia tana lotofoaki.—Pes. 145:3, 7; Apk. 22:17.
3. ʼE tou tufa feafeaʼi anai ia te ʼu pepa fakaafe?
3 ʼE ko te ʼu kolesi ʼo te kau tagata ʼafeā ʼo te ʼu kokelekasio ʼae ʼe tonu ke natou fakatuʼutuʼu te tufa ʼo te ʼu pepa fakaafe, mo te tuku ʼo te ʼu pepa fakaafe ʼi te ʼu ʼapi ʼae ʼe lavaki, pea mo tona tufa ʼi te fagonogono faigamalie. ʼI te ʼu fakaʼosi vahaʼa, ʼe tonu anai ke tufa tahi te ʼu nusipepa pea mo te pepa fakaafe, mo kapau ʼe feala. Ka ʼosi te temi tufa, ʼe tou fiafia anai he neʼe tou lagolago malohi ki ai pea mo fakaafe ia te tokolahi ke natou fakatahi mo tatou ki te katoaga fakalaumalie ʼae neʼe fakatuʼutuʼu e Sehova.