Ko He Faifakaafe ʼe Fua Lelei

ʼI te ʼu vahaʼa ʼe tolu ʼi muʼa ʼo te fakatahi fakatisitilike, ʼe fakaafe e te ʼu kokelekasio ia te hahaʼi ʼo te telituale ke natou ʼomai ʼo kau ki te fakatahi ʼaia. ʼE ʼi ai te tupuʼaga lelei ʼo te faifakaafe ʼaia. Ko natou ʼae ʼe natou tali ia te fakaafe ʼaia pea mo kau ki te fakatahi, ʼe natou leleiʼia te ʼu akonaki Fakatohi-tapu, mo te maui malie ʼo te ʼu selevisi fuli ʼae ʼe gaue ai ia natou fuli ʼe natou lotolelei ke natou fai ia te faʼahi ʼaia, mo te lelei ʼo te aga pea mo te maʼu ai ʼo te logotahi. (Pes. 110:3; 133:1; Esa. 65:13, 14) Kaʼe, ʼe fua lelei pe koa ia te ʼu faifakaafe ʼaia ʼi te ʼu tafaʼaki ʼo te koga meʼa ʼae ʼe fai ai te fakatahi fakatisitilike?

ʼI te hili ʼo te fakatahi fakatisitilike ʼo te taʼu 2011, neʼe maʼu e te filiale ʼo te fenua ia te tohi mai te fafine neʼe ina maʼu ia te pepa fakaafe ʼi tona muʼa matapa. Neʼe tautau nono moka olo age ia te kau Fakamoʼoni ʼa Sehova. Neʼe ina tohi fenei: “ ʼE ʼi ai toku ʼapi matalelei, ʼe agalelei toku ʼohoana kaʼe neʼe ʼi taku manatu, kua au maʼu ia meʼa fuli ke au fiafia ai. Kaʼe meʼa fakaʼofaʼofa, he neʼe mole au fiafia pea neʼe mole he ʼuhiga ʼo toku maʼuli. Ko te tupuʼaga la ʼaia ʼo taku fakatuʼutuʼu ʼae ke au alu ia kilometa ʼe 320 ke feala ke au kau ki te polokalama ʼo te Moeaki.” ʼI te lahi ʼo tona fiafia ʼi te fakatahi ʼaia, neʼe telefoni ai ki tona ʼohoana ʼo fakaha age ʼe toe nofo anai ke feala hana kau ki te polokalama ʼo te ʼAhotapu. “Neʼe au fakalogo ia te ʼu akonaki fuli, neʼe hahaʼi ia te kau Fakamoʼoni ʼa Sehova neʼe au felaveʼi mo ia pea neʼe kei au loto ke hoko atu ia te faʼahi ʼaia.” ʼI tana toe liliu ki tona ʼapi, neʼe fai tana ako pea hili ki ai mahina ʼe fa, neʼe liliu ai ʼo kauga fagona. “ ʼE au fiafia lahi ʼi taku maʼu ia te pepa fakaafe ʼaia, heʼe kua ʼi ai leva te ʼuhiga ʼo toku maʼuli.”

Ko ʼihi ia natou ʼe natou maʼu ia te fakaafe ʼaia ʼe natou kau anai ki te fakatahi ʼaia. Tou gaue ʼaki he faʼafai ʼi te faifakaafe maʼuhiga ʼaia. ʼAki te fagonogono faigamalie, kotou tufa ia te toega ʼo te ʼu pepa fakaafe ʼi te kolo ʼae ʼe fai ai te fakatahi fakatisitilike.

[Fakamatala ʼo te pāsina 9]

ʼE Feafeaʼi Anai Tatatou Tufa Te Pepa Fakaafe?

Ke feala hatatou gaueʼi katoa tatatou telituale, ʼe tonu ke nounou ʼatatou palalau. ʼE feala ke tou ui fenei: “Malo te maʼuli. ʼE matou kau ki te tufa ʼo te pepa fakaafe ʼaeni, ʼae ʼe fai ʼi te kele katoa. Koʼeni tau pepa fakaafe. ʼE tuʼu ai te tahi ʼu fakamahino ʼo ʼuhiga mo te fakatahi.” Kotou fakaha takotou fiafia. Ka kotou kau ki te tufa ʼi te ʼu fakaʼosi vahaʼa, ʼe feala ke kotou toe tufa mo te ʼu nusipepa moka ʼe feala.