ʼE Tou “Maʼu Katoa Te ʼu Meʼa ʼAē ʼe ʼAoga Ki Te Gāue Lelei Fuli Pe”
1 Ia ʼaho nei, ʼe tapuakina te hahaʼi ʼa Sehova he kua mahu te ʼu meʼa kai fakalaumālie lelei ʼaē ʼe nātou maʼu. (Isa. 25:6) ʼE lahi te ʼu tohi faka Tohi-Tapu ʼe feala ke tou fakaʼaogaʼi ki tatatou ako takitokotahi mo tatatou ako faka famili, pea mo tou fakaʼaogaʼi ki te ʼu fono ʼo te kokelekasio pea mo te ʼu fakatahi lalahi. Kae ʼe tou fakaʼaogaʼi moʼoni koa te ʼu meʼa fuli ʼaia ʼaki te fakatuʼutuʼu ʼaē ke tou liliu ʼo ‘faiva, pea ke tou maʼu katoa te ʼu meʼa ʼaē ʼe ʼaoga ki te gāue lelei fuli pe’?—2 Tim. 3:17.
2 Koutou fakakaukauʼi age muʼa te meʼa kai fakalaumālie ʼo te taʼu 1998 ʼaenī, ʼaē kua fakalaka nei ʼi tona vaelua! ʼAki te ʼu fono ʼaē ʼe fai ʼi te vāhaʼa fuli, ʼe tou vakaʼi ai te ʼu puani maʼuhiga ʼo te ʼu tohi e 22 ʼo te ʼu Tohi Faka Keleka Faka Kilisitiano, mo vakaʼi ʼi te tohi Auxiliaire pour une meilleure intelligence de la Bible te maʼuli ʼo te ʼu hahaʼi e toko 49 ʼo te hisitolia faka Tohi-Tapu, pea mo tou vakaʼi te ʼu pasina e 106 ʼo te tohi Prédicateurs. ʼE tou toe vakaʼi foki mo te ʼu kapite e 6 ʼo te tohi Te ʼAtamai Mālama, pea ʼe tou ako te ʼu kapite e 5 ʼo te tohi Te Manuʼia Faka Famili. Tahi ʼaē meʼa, ʼe fafaga tatou ʼi te faʼahi fakalaumālie ʼaki tatatou ʼu Minisitelio ʼo Te Puleʼaga e 12, pea mo te ʼu alatike ako e 52 ʼo Te Tule Leʼo, pea mo te ʼu akonaki ʼaē ʼe fai ʼi te vāhaʼa fuli ki te kaugamālie ʼo ʼuhiga mo te ʼu moʼoni faka Tohi-Tapu kehekehe. ʼE toe hilifaki ki te ʼu meʼa fuli ʼaia te ʼu polokalama ʼo te ʼu fakatahi. ʼE ko he toe meʼa kai fakalaumālie lelei ʼaia ʼaē ʼe foaki mai kia tatou!
3 Tou Fakafetaʼi Ki Te ʼu Fakatuʼutuʼu ʼAē ʼe Fai e Sehova: Ke ʼaoga moʼoni kia tatou te ʼu fakatuʼutuʼu ʼaia, ʼe tonu ke tou mahino pe koʼe ʼe foaki mai e Sehova te toe meʼa kai fakalaumālie ʼaia. Kapau ʼe tou kai ki te ʼu meʼa lelei ʼaia, pea ʼe tuputupu ai tatatou tui pea ʼe fakamālohiʼi ai tatatou ʼu felogoi mo ia. (1 Tim. 4:6) Kae ko te meʼa kai fakalaumālie ʼaē ʼe foaki mai kia tatou ʼe mole ʼaoga pe moʼo akoʼi ʼo tatou. Kae ʼe ina uga tatou ke tou vaevae te moʼoni mo ʼihi, pea ʼe tokoni kia tatou ke tou faiva ʼi te fai ʼo te faʼahi ʼaia ʼi totatou ʼuhiga kau minisi ʼo te logo lelei.—2 Tim. 4:5.
4 ʼAua naʼa tou meʼa noaʼi te ʼu meʼa ʼaē ʼe ʼaoga kia tatou ʼi te faʼahi fakalaumālie, kae tou ʼuakai tuʼumaʼu ki te tuʼuga meʼa kai fakalaumālie lelei ʼaē ʼe tuku ʼi te laupapa ʼa Sehova. (Mateo 5:3; 1 Pet. 2:2) Kapau ʼe tou loto ke ʼaoga moʼoni te ʼu meʼa fuli ʼaia kia tatou, pea ʼe maʼua ke tou toʼo hotatou temi ki te ʼu faʼahi maʼuhiga ohage la ko tatatou ako takitokotahi tuʼumaʼu pea mo te ako faka famili, pea mo tatatou kau tuʼumaʼu ki te ʼu fono. (Efesi 5:15, 16) Kapau ʼe tou fai te ʼu faʼahi ʼaia, pea ʼe tou maʼu anai he ʼu fakapale fakatupu fiafia, ohage ko tona ʼui e te ʼu palalau fakaloto mālohi ʼaē neʼe tohi e Paulo ki te kau Kilisitiano Hepeleo agatonu, ʼaē ʼe tou maʼu ia Hepeleo 13:20, 21.