Te ʼu Tagata Taupau ʼe Ko He ʼu Faʼifaʼitaki—Te Tagata Taupau Ki Te Gāue
1 ʼE tokaga fakalelei te tagata taupau ki te gāue kia meʼa fuli ʼaē ʼe pipiki ki te haʼele ki muʼa ʼo te gāue fai faka mafola ʼi te telituale ʼo te kokelekasio. ʼE maʼuhiga ʼaupito tana gāue heʼe tokoni mai kia tatou ke tou fakahoko totatou maʼua ʼaē ko te faka mafola ʼo te logo lelei. ʼI tona ʼuhiga tagata fai faka mafola faiva, ʼe ina tuku he faʼifaʼitaki lelei ʼo ina fai he ʼu fakatuʼutuʼu ʼo ʼuhiga mo te gāue fai faka mafola. ʼI tona ʼuhiga faiako lelei, ʼe tokoni ki te kau fai faka mafola takitahi ke nātou hikihiki te lelei ʼo tanatou minisitelio.—Efesi 4:11, 12.
2 ʼE vakaʼi e te tagata ʼāfea ʼaia te gāue ʼo te ʼu tagata faifekau faka minisitelio ʼaē ʼe tokakaga ki te ʼu tohi, mo te ʼu nusipepa, pea mo te ʼu telituale. ʼE ina vakaʼi anai peʼe feʼauga te ʼu tohi, mo te ʼu nusipepa, pea mo te ʼu kiʼi pepa ki te fakaʼui ʼo he ʼu faʼahiga tohi ʼi te māhina fuli. Tuʼa tahi ʼi te taʼu ʼe ina toe vakaʼi te telituale ke ina ʼiloʼi te ʼu ʼapi ʼaē ʼe tapu tona fai, pea ʼe ina hinoʼi he ʼu tēhina kua fakapotopoto ke nātou ʼaʼahi te ʼu ʼapi ʼaia.
3 ʼE maʼua ke ina fakatuʼutuʼu te ʼu faʼahi kehekehe ʼo te minisitelio, ʼo kau kiai te fai faka mafola ʼi te ʼu fale gāue, ʼi te ala, pea ʼaki te telefoni. ʼE ina fakatuʼutuʼu he ʼu ʼaho faka mafola lolotoga te vāhaʼa, ʼo feiā mo te ʼu ʼaho mālōlō. ʼE tokaga moʼoni ki te gāue ʼaē ko te fai ʼo he ʼu ako Tohi-Tapu. ʼE ina foaki he ʼu faʼahiga tokoni kia nātou ʼaē kua tahitahiga tanatou fai faka mafola, peʼe kia nātou ʼaē ʼe mole kei fai faka mafola. ʼE tokaga ki te gāue ʼo te kau pionie, pea ʼe ina vakaʼi te polokalama ʼE Tokoni Te Kau Pionie Ki ʼIhi.
4 ʼI tana kau ki te Komite Gāue ʼo Te Kokelekasio, ʼe fakahā e te tagata taupau ki te gāue he ʼu manatu ʼe ʼaoga ʼi te Ako Tohi ʼo te Kokelekasio. Ka ina ʼaʼahi takotou ako tohi, koutou kau ai pea mo koutou fai faka mafola mo ia.
5 Ko nātou fuli ʼo te kokelekasio ʼe tonu ke nātou gāue tahi ʼaki he lotolelei pea mo nātou mulimuli ki te takitaki ʼaē ʼe fai e te tagata taupau ʼo te gāue. ʼE tokoni anai te faʼahi ʼaia ke tuputupu tatatou gāue ʼaē ko te fai ʼo he ʼu tisipulo pea mo tou fiafia lahi ʼi totatou minisitelio.