“Tou To Te Pulapula ʼo Te Puleʼaga” ʼo Tou ʼAve Tuʼumaʼu Te ʼu Nusipepa Ki Te Hahaʼi
1 Ko te katiko 133 ʼi te tohi katiko Fakafalani Tou Fakavikiviki Kia Sehova ʼAki ʼAtatou ʼu Hiva, ʼe fēnei tona kupu tāfito, “Tou To Te Pulapula ʼo Te Puleʼaga.” ʼE fakatafito ki te lea fakatātā ʼa Sesu ʼaē ʼe ina fakatatau te fai ʼo ni ʼu tisipulo ki te to ʼo he pulapula. (Mateo 13:4-8, 19-23) ʼE ʼui fēnei e te katiko: “Ke tou maʼu he ʼu fua lelei ʼo te pulapula lelei/ʼE tonu ke tou faiga mālohi.” ʼE lava feafeaʼi hatatou hikihiki te ʼu fua lelei ʼo totatou minisitelio? Ko he puleʼaki ʼe feala ke tou fai, ʼe ko te maʼu ʼo he ʼu hahaʼi ke tou ʼave tuʼumaʼu kia nātou te ʼu nusipepa.
2 ʼE feala ke tou fakahoko te ʼu fakatuʼutuʼu kehekehe ʼaki tatatou ʼave tuʼumaʼu te ʼu nusipepa ki te hahaʼi. (1) ʼAki takotou ʼaʼahi te hahaʼi tuʼa lua ʼi te māhina, ʼe koutou liliu māmālie anai ʼo kaumeʼa mo nātou ʼaē ʼe nātou fia ʼiloʼi te moʼoni. (2) ʼE koutou haga fafaga anai nātou ʼaki te ʼu logo ʼo te fakamaʼuli ʼaē ʼe maʼu ʼi Te Tule Leʼo pea mo te Réveillez-vous! (3) ʼI takotou fai palalau mo nātou, ʼe lagi koutou tokoni anai ki te hahaʼi ke nātou leleiʼia te moʼoni faka Tohi-Tapu, ʼo iku ai ki he ako Tohi-Tapu.—1 Pe. 2:2.
3 E Feafeaʼi Te ʼAve Tuʼumaʼu ʼo Te ʼu Nusipepa Ki Te Hahaʼi: Ka fia toʼo e he tahi te ʼu nusipepa, koutou fakamahino age ki ai ʼe ʼi ai te ʼu alatike makehe ʼi te ʼu nusipepa foʼou fuli, pea ʼe ko he meʼa fakafiafia anai kia koutou hakotou ʼave tuʼa lua kia ia ʼi te māhina. ʼI takotou ʼosi mavae iō ia, koutou tohi tona higoa pea mo tona tuʼasila, mo te ʼaho ʼaē neʼe koutou ʼaʼahi ai ia ia, mo te numelo ʼo te ʼu nusipepa ʼaē neʼe koutou tuku age ki ai, mo te alatike ʼaē neʼe koutou talanoa kiai, pea mo te ʼu faʼahi ʼaē neʼe ina fia ʼiloʼi tāfito.
4 ʼE feala hakotou fakatuʼutuʼu ke koutou fakahoahoa lelei te ʼu ʼapi ʼaē ʼe koutou ʼave putuputu kiai te ʼu nusipepa, tatau aipe peʼe ko ʼapi e tahi peʼe lua ʼi te kamata. ʼAki te temi, koutou hilifaki kiai te ʼu ʼapi foʼou ʼaē ʼe koutou ʼave tuʼumaʼu kiai te ʼu nusipepa. Kapau ʼe fakahaʼuhaʼu ʼo kaugamālie te hahaʼi ʼaē ʼe nātou toʼo te ʼu nusipepa, pea ʼe lagi lelei anai ke koutou fakatuʼutuʼu lelei takotou feʼoloʼaki ʼi te telituale moʼo ʼave te ʼu nusipepa, ke faigafua tona fai. Koutou tohi fakalelei te ʼu numelo ʼo te ʼu nusipepa ʼaē neʼe koutou tuku ki te hahaʼi pea mo te ʼaho ʼaē neʼe koutou fai ai te ʼaʼahi. Koutou tohi mo te ʼu meʼa ʼaē neʼe koutou palalau kiai, pea mo te meʼa ʼaē ʼe feala ke koutou fai ke toe ʼāsili ai te fia ʼiloʼi ʼa te hahaʼi ia te moʼoni mokā koutou toe ʼaʼahi ia nātou.
5 Tou ʼAve Tuʼumaʼu Ki Te Hahaʼi Faifakatau Pea Mo Te Hahaʼi Gāue: ʼE lahi te ʼu faʼifaʼitaki ʼe nātou fakahā mai ko te hahaʼi ʼaē ʼe gāue ʼi te ʼu fale koloā pea mo te tahi ʼu hahaʼi gāue, ʼe nātou tali ke tou ʼave tuʼumaʼu te ʼu nusipepa kia nātou. Ko te tagata ʼāfea neʼe ina ʼave tuʼumaʼu te ʼu nusipepa ki te pule ʼo tona kolo. Ko te kaugā fai faka mafola neʼe ina kamata he ako Tohi-Tapu mo te tagata kua taʼu 80 ʼe patolo ʼi te matani gāue lahi, pea ko te tagata ʼaia kua taʼu hogofulu tana toʼo tuʼumaʼu te ʼu nusipepa!
6 Neʼe hū te tuagaʼane ki te fale koloā pea felāveʼi ai mo te taumatuʼa neʼe mole nā faʼa leleiʼia tana ʼaʼahi. Kae ʼi tanā toʼo te ʼu nusipepa, neʼe fakatotonu ai e te tuagaʼane ke ina hilifaki ia nāua ʼaia ki tana lisi ʼo te ʼu hahaʼi ʼaē ʼe ina ʼave tuʼumaʼu ki ai te ʼu nusipepa. ʼAki te temi, neʼe fia tuku e te tuagaʼane tana ʼaʼahi tuʼumaʼu ia nāua he neʼe mole nā aga fakakaumeʼa pea neʼe mole nā fia tali age tana ʼu fehuʼi. Kae neʼe faikole te tuagaʼane ʼo ʼuhiga mo te faʼahi ʼaia pea neʼe ina tuku leva te tohi Mauli O Heegata ki te taumatuʼa. ʼI tana ʼosi lau te tohi, neʼe ʼui fēnei e te fafine: “Kua ʼau maʼu te moʼoni!” Neʼe kamata ai tanā ako Tohi-Tapu, pea ki muli age neʼe papitema leva te taumatuʼa. Neʼe maʼu he ʼu fua lelei ʼo te faʼa kātaki ʼo te tuagaʼane.
7 E Feafeaʼi Te Fai ʼo Te ʼAʼahi: Ka koutou maʼu he nusipepa foʼou, koutou lau tona ʼu alatike fuli. Koutou kumi he ʼu puani ʼe fia ʼiloʼi anai e te hahaʼi ʼaē ka koutou ʼolo ʼo ʼave ki ai te ʼu nusipepa. Pea ʼi takotou ʼaʼahi nātou, ʼe feala ke koutou ʼui fēnei: “ ʼI taku lau te alatike ʼaenī, neʼe ʼau manatu ʼe ke toe leleiʼia anai mo koe.” ʼE feala ki te kau fai faka mafola fuli ke nātou ʼave tuʼumaʼu te ʼu nusipepa ki te hahaʼi. Tatau aipe mo he kiʼi toe veliveli ʼe feala ke ina ʼui: “Kua ʼau fiafia ʼi taku toe felāveʼi mo koe. Neʼe ʼau haʼu mo tau ʼu nusipepa foʼou ʼo Te Tule Leʼo pea mo te Réveillez-vous! ʼE ʼau mahalo ʼe ke leleiʼia anai te alatike ʼaenī ko tona kupu tāfito . . .”
8 Koutou faiga ke fia ʼiloʼi e te hahaʼi te ʼu alatike ʼo te ʼu nusipepa ʼaē ka hoa mai, ʼo koutou fakaʼaogaʼi te kiʼi talanoa ʼaē ʼe higoa “ ʼI Te Tule Leʼo ʼAē Ka Hoa Mai.” Ka tā he ʼu alatike ʼe koga kehekehe, koutou fakahā kia ia ʼaē ʼe ina lau pea koutou fakaloto mālohiʼi ia ia ke mole tō ʼi he koga ʼo te ʼu alatike ʼaia. ʼAua naʼa galo kia koutou, ko te ʼu temi fuli ʼaē ʼe koutou ʼolo ai ʼo ʼave te ʼu nusipepa kia ia, ʼe koutou lau anai ko te ʼaʼahi. Pea ko te meʼa ʼaē ʼe maʼuhiga tāfito, koutou manatuʼi tatatou fakatuʼutuʼu ʼaē ke liliu te ʼu ʼaʼahi ʼaia ko he ʼu ako Tohi-Tapu.
9 Koutou Fai He Polokalama Ke Koutou ʼAʼahi Tuʼumaʼu Te Hahaʼi: ʼE feala ke koutou ʼave te ʼu nusipepa ki te hahaʼi ʼi te temi pe ʼaē ʼe koutou loto ki ai—ʼi te uhu, ʼi te fakaʼosi ʼo te hili hoʼatā, ʼi te afiafi, peʼe ʼi te fakaʼosi vāhaʼa ʼi takotou ʼosi fai faka mafola ʼi te ʼu ʼapi. Kapau ʼe mole feala ke koutou ʼolo ʼo tuku te ʼu nusipepa koteʼuhi ʼe koutou mahaki peʼe koutou mālōlō, koutou kole ki he tahi ʼi te kokelekasio ke ina fai te faʼahi ʼaia maʼa koutou. Kapau ʼe koutou fai feiā, pea ko te hahaʼi ʼaē ʼe koutou ʼaʼahi tuʼumaʼu ʼe nātou maʼu tautonu anai tanatou ʼu nusipepa.
10 Ko he tahi faʼahiga to ʼo te pulapula ʼo te Puleʼaga ko te ʼave tuʼumaʼu ʼo Te Tule Leʼo pea mo te Réveillez-vous! ki te hahaʼi ʼaē ʼe nātou toʼo tuʼumaʼu. ʼI takotou akoʼi kia nātou te ʼu moʼoni faka Tohi-Tapu, ʼe lagi nātou mahino anai ki te faka ʼuhiga ʼo te folafola ʼo te Puleʼaga, pea ʼe nātou fakatupu anai te ʼu fua ʼo te Puleʼaga mo koutou.—Mateo 13:8, 23.