Ke Lelei Age Tatatou Minisitelio: Tou ʼAʼahi Ia Natou ʼAe ʼe Natou Toʼo Tuʼumaʼu ʼAtatou Nusipepa

He Koʼe ʼe Maʼuhiga? Tokolahi ʼe natou leleiʼia ʼatatou nusipepa, kaʼe ʼe mole natou fia ako ia te Tohi-Tapu. ʼE lagi natou leleiʼia pe natou tanatou lotu, pe ʼe mole honatou temi moʼo fai hanatou ako. Kaʼe ʼaki tanatou lau tuʼumaʼu ʼatatou nusipepa, ʼe feala ai ke natou fia mahino ki te Folafola ʼa te ʼAtua. (1 Pet. 2:2) ʼE feala pe ke ʼi ai he alatike ʼe ina leleiʼia. Pe neʼe hoko he aluʼaga ʼi tona maʼuli. Kapau ʼe tou ʼaʼahi tuʼumaʼu ia natou ʼaia, pea ʼe tou felogoʼi lelei anai mo natou. ʼE feala ai ke tou iloʼi ia te ʼu faʼahi ʼae ʼe natou hoha peʼe tuʼania ki ai. Pea ʼe feala pe ke kamata ai hanatou ako Tohi-Tapu.

Te ʼu Meʼa ʼAe ʼe Tonu Ke Ke Fai:

ʼI te mahina fuli, fai he polokalama ke kotou olo ʼo ʼave ki ʼakotou ʼaʼahi ia te ʼu nusipepa foʼou ʼo Te Tule Leʼo pea mo te Réveillez-vous ! ʼE feala pe ke kotou ʼaʼahi liuliuga ia natou ʼi te mahina, moʼo foaki he tahi age tohi ʼe tufa ʼi te mahina ʼaia. ʼE tou maʼu ai anai he ʼu fua lelei.—Vakaʼi ia Te Minisitelio ʼo Te Puleʼaga ʼo Sanualio 2014, ʼi te pasina 3.
Tou teuteuʼi ia te ʼu ʼaʼahi takitahi. ʼE mole kotou olo pe ʼo tuku age ia te ʼu nusipepa, kaʼe kotou faigaʼi ke kotou faipalalau mo ia ke tupu ai hana fia mahino ki te Tohi-Tapu.
Tou fakaʼaogaʼi ia te ʼu faigamalie fuli moʼo kamata he ako Tohi-Tapu. Kapau ʼe fehuʼi atu e ia ʼae ʼe kotou ʼaʼahi, pe kotea te manatu ʼa te Tohi-Tapu ʼo ʼuhiga mo he aluʼaga, kotou tuku age ia te tohi ʼae ʼe natou maʼu ai ia te tali, pea mo kotou faipalalau mo ia. Ia muʼa ʼo takotou mavae, kotou fai he fehuʼi, ʼe kotou tali anai ki ai moka kotou toe liliu mai. Kapau ʼe kotou ʼaʼahi liuliuga ia natou, ʼo kotou fakaʼaogaʼi ia te Tohi-Tapu, peʼe ko he tohi Fakatohi-tapu, kua feala ke kotou lau ko he ako Tohi-Tapu. Kapau neʼe kotou tuku age ki ai ia te kaupepa lahi Logo Lelei ʼe feala ke kotou faʼifaʼitakiʼi he kiʼi ako. ʼE feala pe ke kotou fakaha age ki ai ia te ʼu kiʼi ʼata viteo He Koʼe ʼe Lelei Ke Ke Ako Te Tohi-Tapu? pea ʼE Feafeaʼi Te Fai ʼo He Ako Tohi-Tapu? Tatau aipe pe neʼe mole fia ako he tahi te Tohi-Tapu ʼi muʼa atu, kaʼe ʼe feala pe ke fetogi ia te ʼu aluʼaga ʼo tona maʼuli. ʼE feala pe ke kotou toe fakalavelave age ki ai.

ʼAhiʼahi Fai Te Faʼahi ʼAeni Lolotoga Te Mahina:

Fai he lisi ʼo natou ʼae ʼe natou toʼo tuʼumaʼu ʼatatou nusipepa. Kotou foaki age kia natou ia te ʼu nusipepa ʼo te mahina pea mo kotou ui age ʼe kotou ʼomai anai ʼo toe ʼavage ki ai ia te ʼu nusipepa foʼou.