Tou Kamata He ʼu Ako Tohi-Tapu Mo Natou ʼAe ʼe Natou Toʼo Tuʼumaʼu ʼAtatou Nusipepa
1. He ko ʼe talu mai fualoa ʼe fakalotomalohiʼi tatou e te kautahi ʼa Sehova ke tou maʼu he hahaʼi ʼe natou toʼo tuʼumaʼu ʼatatou nusipepa?
1 Tokolahi ʼe mole natou fia ako te Tohi-Tapu mo tatou, kaʼe ʼe natou leleiʼia te lau ʼo ʼatatou nusipepa. Koia, talu mai fualoa mo te fakalotomalohiʼi ʼo tatou e te kautahi ʼa Sehova ke tou maʼu he hahaʼi ʼe natou toʼo tuʼumaʼu ʼatatou nusipepa. Koteʼuhi, ka lau tuʼumaʼu e te hahaʼi ʼatatou nusipepa, pea ʼe feala ke natou fia mahino ki te Folafola ʼa te ʼAtua. (1 Pet. 2:2) Ki muli age, ʼe lagi natou leleiʼia he manatu, ʼo feala ai ke natou tali hanatou ako Tohi-Tapu.
2. ʼE feafeaʼi hakotou taupau te fia mahino ʼa natou ʼae ʼe natou toʼo tuʼumaʼu ʼatatou nusipepa?
2 Kotou Fakavai Te Pulapula ʼo Te Moʼoni: ʼE mole kotou liliu pe ʼo tuku ia te ʼu nusipepa, kaʼe ʼe kotou faiga ke kotou faipalalau pea mo feiloʼiʼaki mo ia. ʼE tokoni atu anai te faʼahi ʼaia ke kotou iloʼi tona aluʼaga, mo te ʼu faʼahi ʼe fia palalau ki ai, pea mo tana tui, pea ʼe feala ai ke kotou maʼu te fakasiosio tonu moka kotou faipalalau mo ia. (Taag. 16:23) Kotou teuteuʼi lelei takotou ʼaʼahi. Kapau ʼe feala, kotou fakamaʼuhigaʼi he manatu peʼe ko he vaega Tohi-Tapu ʼi te ʼu nusipepa, ʼo kotou fakavai te pulapula ʼo te moʼoni ʼi tona loto. (1 Ko. 3:6) Kotou tohi te ʼaho ʼae ʼe kotou fai ai te ʼaʼahi, mo te nusipepa ʼae neʼe kotou tuku, pea mo te ʼu manatu mo te ʼu vaega ʼae neʼe kotou faipalalau ki ai.
3. ʼE tonu ke kotou ʼaʼahi tuʼa fia natou ʼae ʼe natou toʼo tuʼumaʼu ʼatatou nusipepa?
3 ʼE Tonu Ke Kotou ʼAʼahi Tuʼa Fia Natou? ʼE tonu ke kotou liliu tuʼa tahi ʼi te mahina ʼo tuku te ʼu nusipepa fakamuli kia natou ʼae ʼe natou toʼo tuʼumaʼu. Kaʼe, ʼo mulimuli ki tokotou aluʼaga pea mo te fia iloʼi ʼa he tahi, ʼe lagi kotou fakatuʼutuʼu ke kotou ʼaʼahi liuliuga ia ia. Ohage la, hili he vahaʼa ʼe tahi peʼe lua ʼi takotou tuku te ʼu nusipepa, ʼe feala ke kotou toe liliu pea mo ui fenei: “ ʼE au fia fakaha atu pe he manatu ʼi te alatike ʼaeni ʼo te nusipepa ʼae neʼe au tuku atu.” ʼE fakatupu ai tana fia lau ia te alatike. Kaʼe kapau kua ina ʼosi lau te alatike, pea ʼe feala ke kotou fehuʼi age pe kotea la tana manatu pea mo kotou faipalalau fakanounou ki ai. Pea kapau leva ʼe ina leleiʼia te lau ʼo ʼatatou tohi, pea ʼe feala ke kotou toe liliu age mo he kiʼi pepa lotu, peʼe ko he kaupepa lahi, peʼe ko te tohi ʼae ʼe tou tufa ʼi te mahina ʼaia.
4. ʼI ʼihi temi, kotea ʼae ʼe feala ke kotou fai ke tou iloʼi ai pe tali anai ʼe natou ʼae ʼe natou toʼo tuʼumaʼu ʼatatou nusipepa hanatou ako Tohi-Tapu?
4 ʼAua naʼa kotou atalitali ke kole atu ʼe ia ʼae ʼe kotou ʼaʼahi ia hana ako Tohi-Tapu, kaʼe ke kotou fakaafe ia ia ke fai hana ako. Pea tatau aipe pe neʼe kua fakafisi atu, ʼe feala ʼi ʼihi temi ke kotou fakaha age te alatike ʼae ko tona kupu tafitō “Te ʼu Tali Ki Te ʼu Fehuʼi Fakatohi-tapu” ʼi Te Tule Leʼo pea mo kotou vakaʼi pe fia faipalalau ki ai. ʼE lagi feala ke kotou kamata atu aipe he ako Tohi-Tapu. Kaʼe kapau ʼe mole feala ke kotou kamata he ako Tohi-Tapu, kotou haga ʼave ʼana nusipepa moʼo taupau tana fia lautohi.