Ko He Fetogi ʼi Te ʼu Hola ʼAē ʼe Fakamaʼua Ki Te Kau Pionie
1 ʼE tou fakafetaʼi fuli ki te gāue kinakina ʼa te kau pionie katoa pea mo te kau pionie vaeluaʼi temi ʼi te loto kokelekasio. Tatau aipe peʼe veliveli te ʼu telituale pea mo fai tuʼumaʼu, ʼe tuku mai e te kau pionie he faʼifaʼitaki lelei ʼaki tanatou gāue fakamalotoloto ki te Puleʼaga. ʼE nātou fakaloto mālohiʼi te kau fai faka mafola fuli ke nātou haga kumi tuʼumaʼu aipe te hahaʼi ʼaē ʼe “lotolelei” ki te moʼoni.—Gāue 13:48.
2 Neʼe tokagaʼi e te Sosiete te lahi ʼo te ʼu fihifihia ʼaē ʼe tau mo te kau pionie, tāfito ʼo ʼuhiga mo te kumi ʼo he gāue kogaʼi ʼaho ke feala hanatou totogi te ʼu meʼa ʼaē ʼe ʼaoga kia nātou pea ke nātou hoko atu tanatou gāue pionie katoa. ʼUhi ʼaē ko te haʼele kovi ʼo te ekonomika ʼi ʼihi fenua, kua liliu ʼo faigataʼa te toʼo ʼo te selevisi pionie, tatau aipe peʼe kita holi mālohi kiai. ʼI te ʼu māhina ʼaenī kua hili, neʼe vakaʼi fakalelei e te Sosiete te ʼu ʼaluʼaga ʼaia.
3 Koia, ʼuhi ko te ʼu faʼahi ʼaia, neʼe fakasiʼisiʼi e te Sosiete te ʼu hola ʼaē ʼe fakamaʼua ki te kau pionie katoa pea mo te kau pionie vaeluaʼi temi. ʼO kamata ʼi te māhina ʼo Sanualio 1999, ʼe fakamaʼua anai ki te kau pionie katoa te ʼu hola e 70 ʼi te ʼu māhina fuli, ʼo fakakatoa ʼi te ʼosi ʼo te taʼu ko hola e 840. ʼE fakamaʼua anai ki te kau pionie vaeluaʼi temi te ʼu hola e 50 ʼi te māhina. Ko te ʼu hola ʼaē ʼe fakamaʼua ki te kau pionie makehe pea mo te kau misionea ʼe mole fetogi ia, mai tona ʼuhiga ʼaē ʼe fai e te Sosiete he ʼu fakatuʼutuʼu moʼo tokoni ki te ʼu meʼa ʼaē ʼe ʼaoga tāfito kia nātou. ʼAki te tokoni ʼaia, ʼe faigafua anai tanatou tokagaʼi tāfito tanatou gāue fai faka mafola pea mo te fai ʼo ni ʼu tisipulo.
4 ʼE tou fakaʼamu ʼaki te fetogi ʼaia ʼo te ʼu hola ʼa te kau pionie, ke nātou taupau maʼu te pilivilesio makehe ʼaia. ʼE toe fealagia anai foki ki te tahi ʼu kaugā fai faka mafola hanatou toʼo te selevisi pionie katoa pea mo vaeluaʼi temi. Ko te faʼahi ʼaia ʼe ko he tapuakina moʼoni anai kia nātou fuli ʼi te kokelekasio!