Tou Faʼifaʼitakiʼi Te Mole Fakapalatahi ʼa Sehova
1 ʼE tokaga Sehova ki te hahaʼi. ʼE mole fakapalatahi, pea ʼe ina tali te hahaʼi fuli ʼaē ʼe nātou fai tona finegalo. (Gaue 10:34, 35) ʼO toe feiā pe mo Sesu, neʼe mole fakapalatahi ʼi tana faka mafola ki te hahaʼi. (Luka 20:21) ʼE ʼaoga ke tou faʼifaʼitaki kia nāua, ohage ko tona fai e Paulo ʼaē neʼe ina tohi fēnei: “Kia natou fuli e ko tonatou Aliki e tahi, e koloaʼia kia natou fuape e natou paui kia te ia.”—Loma 10:12.
2 Ka tou tala te logo lelei ʼo te Puleʼaga ʼo te ʼAtua ki te hahaʼi fuli, pea ʼe tou fakavikiviki ki te ʼAtua. ʼE tonu ke tou haga vaevae te logo fakaofoofo ʼaia mo te hahaʼi, tatau aipe pe koteā tonatou lanu, pe neʼe feafeaʼi tonatou ako, peʼe nātou maʼu koloā peʼe kailoa. (Loma 10:11-13) Ko tona faka ʼuhiga, ke tou fai faka mafola ki te hahaʼi ʼaē ʼe nātou fia logo—tagata, fafine, tūpulaga, pea mo matutuʼa. ʼE tonu ke tou ʼolo ki te ʼu ʼapi fuli ke logo te hahaʼi fuli ki te moʼoni.
3 Koutou Tokaga Ki Te Hahaʼi Fuli: ʼE tou fakatuʼutuʼu ke tou felāveʼi mo he hahaʼi tokolahi. ʼAki te manatu ʼaia, neʼe ʼolo ʼihi ʼo faka mafola ʼi te ʼu pilō ʼa te kau tōketā, mo te ʼu lopitali, pea mo te ʼu fale mahaki ʼaē ʼe ʼave kiai te kau toloke. Ko ʼihi neʼe ʼolo ʼo fai faka mafola ki te hahaʼi ʼaē ʼe nātou teuteuʼi te kau mate ki tonatou ʼavaifo, ʼo feiā ki te ʼu pule faleako pea mo te hahaʼi fai tokoni ʼi te ʼu faleako, pea mo te ʼu tuʼi fakamāu. Ka tou fai palalau mo te hahaʼi maʼu tuʼulaga ʼaia, ʼe lelei ke tou fakahā age tatatou leleiʼia te gāue ʼaē ʼe nātou fai maʼa te hahaʼi. Koutou aga fakaʼapaʼapa, pea mo koutou filifili he ʼu alatike ʼe ʼalutahi mo tanatou gāue pea mo te ʼu fihifihia ʼaē ʼe tau mo nātou.
4 ʼI te tahi lakaga, neʼe fai palalau te tuagaʼane mo te tuʼi fakamāu ʼi tona pilō. ʼI tanā ʼosi fai palalau, neʼe ʼui fēnei e te tuʼi fakamāu: “ ʼE ke ʼiloʼi pe koteā te meʼa ʼaē ʼe ʼau leleiʼia ʼi te kau Fakamoʼoni ʼa Sehova? ʼE ʼau leleiʼia koutou heʼe ʼi ai takotou ʼu pelesepeto mālohi ʼe koutou mulimuli tuʼumaʼu kiai.” Neʼe lelei te fai faka mafola ʼaē neʼe fai ki te tagata maʼu tuʼulaga ʼaia.
5 ʼE mole tou ʼiloʼi te loto ʼa te hahaʼi. Kae kapau ʼe tou fai palalau mo te hahaʼi fuli, pea ʼe tou fakahā ai tatatou falala ʼaē, ʼe takitaki e Sehova tatatou gāue. Tahi ʼaē meʼa, ʼe ko he fealagia ʼaia ki te hahaʼi ke nātou fakalogo pea mo tali te logo ʼo te ʼamanaki. (1 Tim. 2:3, 4) Tou fakaʼaogaʼi fakapotopoto totatou temi pea mo faʼifaʼitakiʼi te mole fakapalatahi ʼa Sehova, ʼo tou fakahā ki te hahaʼi fuli te logo lelei.—Loma 2:11; Ef. 5:1, 2.