Ke Lahi Age Tatatou Leleiʼia Te ʼu Kalitate ʼo Sehova

1. (1) Ko te ʼu kalitate fea ʼo Sehova ʼe lagi kotou manatu ki ai? (2) Kotea te ʼu fua lelei ʼo takotou ako te ʼu kalitate ʼo te ʼAtua?

MOKA kotou manatu kia Sehova, ko ʼona kalitate fea ʼae ʼe kotou manatu ki ai? ʼE lagi kotou manatu ki tona ʼofa, tana faitotonu, tona poto pea mo tona malohi. ʼE moʼoni ʼe tou iloʼi ʼe maʼu e Sehova te tahi age ʼu kalitate matalelei. Lolotoga ni taʼu neʼe talanoa ʼi ʼatatou tohi ki te ʼu kalitate kehekehe ʼa Sehova ʼe 40 tupu. Kapau ʼe kotou vakaʼi te ʼu kalitate takitahi ʼaia ʼi takotou ako takitokotahi peʼe fakafamili, pea kotou fakakaukauʼi age muʼa te lahi ʼo te ʼu faʼahi ka kotou ako ʼo ʼuhiga mo Sehova! ʼE kotou leleiʼia lahi age anai ʼona kalitate. Pea ʼe kotou fia faʼifaʼitakiʼi anai ia Sehova pea mo fia fakakaumeʼa mo ia.—Sos. 23:8; Pes. 73:28.

2. (1) ʼAki he faʼifaʼitaki, kotou fakaha pe feafeaʼi hatatou leleiʼia lahi age te ʼu kalitate ʼo Sehova. (2) Kotea ka tou talanoa anai ʼi te alatike ʼaeni mo te ʼu alatike ʼe lua ʼae ka hoa mai?

² ʼE feafeaʼi hakotou ako ke kotou leleiʼia lahi age he meʼa? Tou toʼo he faʼifaʼitaki. Ohage la ʼe kotou kai ki he meʼa kai foʼou. ʼUluaki, ʼe kotou tokagaʼi tona magoni, ʼe kotou ʼahiʼahi leva pea ʼe kotou iloʼi ai tona kano lelei. ʼOsi ʼaia ʼe kotou kuka leva maʼa koutou. ʼO toe feia, ʼe tou leleiʼia lahi age anai he kalitate ʼo Sehova moka tou ako muʼa te kalitate ʼaia, mo fakakaukau pe fakaha feafeaʼi e Sehova te kalitate ʼaia pea mo faʼifaʼitakiʼi leva ki muli age. (Efe. 5:1) ʼE talanoa anai ʼi te alatike ʼaeni mo te ʼu alatike ʼe lua ʼae ka hoa mai ki ʼihi kalitate ʼo Sehova. ʼO ʼuhiga mo te ʼu kalitate takitahi, ʼe tou tali anai ki te ʼu fehuʼi ʼaeni: Kotea te fakaʼuhiga ʼo te kalitate ʼaia? ʼE fakaha feafeaʼi e Sehova te kalitate ʼaia? ʼE feafeaʼi hatatou faʼifaʼitakiʼi ia Sehova moka tou fakaha te kalitate ʼaia?

ʼE FAIGAFUA TE FAKAOVI KIA SEHOVA

3, 4. (1) Kotea te fakaʼuhiga ʼo he tahi ʼe faigafua hatatou fakaovi ki ai? (2) ʼE fakaha lelei feafeaʼi e Sehova ʼe faigafua hatatou fakaovi kia te ia?

³ ʼUluaki, tou talanoa muʼa ki te fakaʼuhiga ʼo he tahi ʼe faigafua te fakaovi ki ai. ʼE agalelei, ʼe aga mo te hahaʼi pea ʼe maʼu pe tona temi ke palalau ai mo ʼihi. ʼE ha ʼi ʼana palalau, mo tona agaaga, pea mo tona fofoga ʼe fia fagono mo tokoni mai.

⁴ ʼE feia ia Sehova. Logola ʼe malohi tokotahi ʼi te ʼatulaulau, kaʼe ʼe ina fakaafe tatou ke tou faikole kia te ia. ʼE fagono ki ʼatatou faikole mo foaki mai te tokoni ʼae ʼe ʼaoga kia tatou. (Lau ia Pesalemo 145:18; Esaia 30:18, 19.) ʼE feala ke tou palalau ki te ʼAtua ʼi he potu pe, ʼi he temi pe pea ʼe mole ina lauʼia tona loaloaga. ʼE mole ita kia tatou ʼi he temi heʼe tou palalau age kia te ia. (Pes. 65:3; Sakp. 1:5) Ko te ʼu fakamatalatala ʼi te Tohi-Tapu ʼo ʼuhiga mo Sehova ʼe tupu ai hatatou palalau faʼitaliha kia te ia ʼi te faikole. Ohage la neʼe tohi e Tavite “e sio te u mata o [Sehova]” kia tatou pea ko tona “nima matau” ʼe ina tekeni tatou. (Pes. 34:16; 63:9) Pea neʼe fakatatau e te polofeta ko Esaia ia Sehova ki he tagata tauhi ovi. Neʼe ina tohi fenei: “E ina too anai te u akeno i ona nima, pea e ina [fua] anai natou i tona fatafata.” (Esa. 40:11) Kotou fakakaukauʼi age muʼa te faʼahi ʼaeni: ʼE loto e Sehova ke tou ovi kia te ia ohage pe ko he kiʼi akeno ʼi te ʼu fatafata ʼo te tagata tauhi ovi ʼofa. Moka ʼe tou manatu feia ʼo ʼuhiga mo tatatou Tamai, pea ʼe toe lahi age ai totatou ʼofa ʼae ia te ia! ʼE feafeaʼi hatatou faʼifaʼitakiʼi ia Sehova ʼi te faʼahi ʼaia?

KO HE KALITATE MAʼUHIGA ʼAUPITO KI TE KAU TAGATA ʼAFEĀ

5. He ko ʼe ʼe maʼuhiga ki te kau tagata ʼafeā ke faigafua te fakaovi kia natou?

⁵ Heʼeki faʼa fualoa, neʼe fai te fehuʼi ʼaeni ki ʼihi Fakamoʼoni ʼi te ʼu potu kehekehe ʼo te kele: “Ko te kalitate fea ʼae ʼe kotou leleiʼia lahi age ʼi he tagata ʼafeā?” Tokolahi neʼe natou tali ʼe tonu ke faigafua hatatou fakaovi ki ai. ʼE moʼoni ʼe ʼaoga ke tou gaueʼi fuli te kalitate ʼaia, kaʼe ʼe maʼuhiga tafitō ki te kau tagata ʼafeā te fai ʼo te faʼahi ʼaia. (Esa. 32:1, 2) He ko ʼe ʼe maʼuhiga ʼaupito ki te kau tagata ʼafeā ke faigafua he fakaovi kia natou? Neʼe ui e te tuagaʼane, ʼe feala ke ina iloʼi te ʼu kalitate ʼa he tagata ʼafeā mo kapau ʼe faigafua hana fakaovi ki ai pea mo palalau faʼitaliha mo ia. ʼE moʼoni te ʼu palalau ʼaia. Koia kotea ʼae ʼe feala ke kotou fai ke palalau faʼitaliha ai ʼihi mo koutou?

6. Kotea ʼae ʼe feala ke kotou fai ke palalau faʼitaliha ai ʼihi mo koutou?

⁶ Ke feala he palalau faʼitaliha ʼa ʼihi mo koutou, kotou fakaha ʼe kotou tokaga moʼoni kia natou pea mo fia tokoni kia natou. Pea ʼe palalau faʼitaliha leva anai mo koutou te ʼu tehina mo tuagaʼane, ʼo kau ai mo te kau tupulaga. (Mko. 10:13-16) Neʼe ui fenei e te kiʼi tama ʼe taʼu 12 ʼe higoa ko Carlos: “ ʼE au sio ki te kau tagata ʼafeā ʼi te fale fono ʼe malimali mo agalelei, pea ʼe au leleiʼia te faʼahi ʼaia ʼo ʼuhiga mo natou.” Koia ʼe mole tonu pe ke ui e he tagata ʼafeā ʼe fia fagono mo tokoni ki ʼihi kaʼe ʼe tonu ke ina fai te faʼahi ʼaia. (1 Soa. 3:18) ʼE feafeaʼi hana lava fai te faʼahi ʼaia?

7. He ko ʼe ʼe palalau faʼitaliha mai ʼihi moka tou tau te kiʼi kate ʼo te fakatahi? Kotea te ako ʼe tou lava taʼofi mai ai?

⁷ Tou toʼo he faʼifaʼitaki: Mole faʼa fualoa, neʼe kau te tehina ki te fakatahi ʼi te tahi fenua. ʼI tana toe liliu kio ia ʼi te vakalele, neʼe ina tau ʼi tona kofu te kiʼi kate ʼo te fakatahi neʼe tohi ai, “Ke Haʼu Te Puleʼaga ʼo Te ʼAtua!” Pea neʼe sio ki ai te tagata gaue ʼo te vakalele mo ina ui, “Ei ke haʼu!” Neʼe lelei tanā faipalalau pea neʼe tali e te tagata ʼatatou tohi. He ko ʼe ʼe palalau faʼitaliha mai te hahaʼi moka tou tau te kiʼi kate ʼo te fakatahi? Koteʼuhi ʼaki te kiʼi kate ʼe fia iloʼi ai e te hahaʼi pe tou olo ki fea pea ʼe toe ha ʼaki ai ʼe tou fia palalau mo natou ʼo ʼuhiga mo ʼatatou akonaki. ʼO toe feia, ʼe tonu ke ha ʼi he tagata ʼafeā ʼe maʼu pe tona temi ke palalau mo te ʼu tehina mo tuagaʼane. ʼE tonu ke ha feafeaʼi?

8. ʼE lava fakaha feafeaʼi e te kau tagata ʼafeā ʼe natou tokaga moʼoni ki ʼihi? Kotea ʼae ʼe logoʼi ai e natou ʼo te kokelekasio?

⁸ ʼE lahi te ʼu fenua ʼe feala ke kotou fakaha ai ʼe kotou tokaga ki ʼokotou tehina mo tuagaʼane, ʼaki hakotou malimali, peʼe ʼalofa ʼaki te nima peʼe fakamālo fakamalotoloto kia natou. Ko ai ʼuluaki ʼae ʼe tonu ke ina fai te faʼahi ʼaia? ʼE ui ʼi te Tohi-Tapu ʼi te temi ʼae neʼe fakatahi ai Sesu mo ʼana kau tisipulo, “nee fakaovi age leva, pea nee palalau leva kia natou.” (Mat. 28:18) ʼO toe feia, ʼe faiga e te kau tagata ʼafeā ia ʼaho nei ke natou fakaovi ki ʼihi pea mo palalau mo natou. Kotea ʼae ʼe logoʼi ai e natou ʼo te kokelekasio? Neʼe ui fenei e te tuagaʼane pionie ʼe taʼu 88: “Ko te malimali mo te ʼu palalau fakalotomalohi ʼae ʼe fai mai e te kau tagata ʼafeā moka au tau atu ki te Fale Fono, ʼe tupu ʼaki ai taku fia fakaovi kia natou.” Neʼe toe ui fenei e te tahi tuagaʼane: “Moka fakamālo mo malimali mai he tagata ʼafeā ʼi te fono, pea ʼe maʼuhiga ia kia au.”

KOTOU TOʼO HE TEMI MOʼO PALALAU MO TE ʼU TEHINA MO TUAGAʼANE

9, 10. (1) Kotea te faʼifaʼitaki lelei ʼe tuku mai e Sehova kia tatou? (2) ʼE lava faʼifaʼitakiʼi feafeaʼi e te kau tagata ʼafeā ia Sehova?

⁹ ʼE mahino ia, kapau ʼe tou loto ke palalau faʼitaliha mai ʼihi, pea ʼe tonu foki ke tou toʼo he temi moʼo palalau mo natou. Ko Sehova ʼe ko he faʼifaʼitaki lelei kia tatou. ʼE ui fenei ʼi te Tohi-Tapu: “E mole mamao ia maia tatou takitahi.” (Gaue 17:27) Ko te faʼahi ʼae ʼe feala ke faʼifaʼitakiʼi ai e te kau tagata ʼafeā ia Sehova, ʼe ko te palalau mo te ʼu tehina mo tuagaʼane, tupulaga mo matutuʼa, ʼi muʼa pea ʼi te hili ʼo te ʼu fono. Neʼe ui fenei e te tehina pionie: “Moka fehuʼi mai e he tagata ʼafeā pe au lelei pe pea mo fagono lelei ki taku tali, pea ʼe au logoʼi ʼe ʼofainaʼi au.” Ko te tuagaʼane ʼe kua teitei taʼu 50 tana tauhi kia Sehova, neʼe ina ui fenei: “Ko te kau tagata ʼafeā ʼae ʼe natou toʼo he temi moʼo palalau mo au ʼi te hili ʼo te fono, ʼe natou fakamaʼuhigaʼi au.”

¹⁰ ʼE moʼoni ʼe lahi te ʼu maʼua ʼa te kau tagata ʼafeā. Kaʼe ʼi te ʼu fono, ʼe tonu ke natou toʼo he temi moʼo palalau mo te ʼu tehina mo tuagaʼane.

KO SEHOVA ʼE MOLE FAKAPALATAHI

11, 12. (1) Kotea te fakaʼuhiga ʼo te mole fakapalatahi? (2) ʼE fakaha feafeaʼi ʼi te Tohi-Tapu ko Sehova ʼe mole fakapalatahi?

¹¹ Ko te tahi kalitate fakatalakitupua ʼo Sehova, ʼe ko tana mole fakapalatahi. (Gaue 10:34) Kotea te fakaʼuhiga ʼo te mole fakapalatahi? Ko tona fakaʼuhiga ke gaohi fakatatau te hahaʼi fuli. Kaʼe kapau ʼe mole tou fia fakapalatahi, pea ʼe tonu ke tou ʼuluaki manatu muʼa ʼe tonu ke gaohi fakatatau te hahaʼi fuli. Ko he tahi ʼe mole fakapalatahi, ʼe mole ina gaohi fakalelei ʼihi kaʼe tuku ʼihi, ʼo mulimuli pe ki te ʼu meʼa ʼe ha ki tuʼa ia natou peʼe ko te lahi ʼo tanatou falā. ʼE ina gaohi fakatatau natou ʼo mulimuli ki te ʼuhiga moʼoni ʼo te takitokotahi.

¹² Ko Sehova ʼe ko te faʼifaʼitaki lelei tokotahi ʼo he tahi ʼe mole fakapalatahi. ʼE ui ʼi Tana Folafola ʼe mole ina fai “he fakakehekehe ki he tahi” pea “e mole siosio tagata.” (Lau ia Gaue 10:34, 35; Tetelonome 10:17.) Tou vakaʼi ia he faʼifaʼitaki ʼo ʼuhiga mo te faʼahi ʼaia.

13, 14. (1) Neʼe kotea te fihifihia ʼa te ʼu ʼofafine ʼe toko nima ʼo Selofati? (2) Neʼe fakaha feafeaʼi e Sehova tana mole fakapalatahi?

¹³ ʼI muʼa pe ʼo te hu ʼa te kau Iselaele ki te Kele ʼo te Fakapapau, ko te ʼu ʼofafine ʼe toko nima ʼo te tagata neʼe higoa ko Selofati, neʼe ʼi ai tonatou fihifihia neʼe ʼaoga ke fakatokatoka. Neʼe kotea te fihifihia ʼaia? Neʼe kua mate tanatou tamai kaʼe neʼe mole feala ke natou maʼu tona kele ko honatou tofiga. Kotea tona tupuʼaga? Koteʼuhi ʼi te Lao, neʼe tonu pe ke tuku holo te ʼu kele ki te tamaliki tagata. Kaʼe neʼe mate tanatou tamai kaʼe neʼe mole hona ʼu foha. (Num. 26:33, 52-55) ʼE foaki anai koa te kele ʼo tanatou tamai ki ʼonatou kaiga? Kotea ʼae neʼe lava fai e te ʼu ʼofafine ʼo Selofati?

¹⁴ Neʼe natou olo ʼo kole mamahi kia Moisese ke tokoni age pea mo natou ui fenei: “Kotea e pulihi ai te higoa o tamatou tamai mai te lotolotoga o tona famili, o tupu nee mole ina mau he foha?” Neʼe tali fenei koa e Moisese: “ ʼE tonu ke mulimuli ki te lao, pea ʼe mole feala haku tokoni atu?” Kailoa ia, kaʼe neʼe ina fakafehuʼi ia Sehova ki te aluʼaga ʼaia. (Num. 27:2-5) Kotea ʼae neʼe ui e Sehova? Neʼe ina ui fenei kia Moisese: “E tonu te u ofafine o Selofati. Ke ke foaki kia natou he tofiga i te lotolotoga o te u tehina o tanatou tamai, koteuhi ko natou ae e natou mau anai te tofiga o tanatou tamai.” Kaʼe neʼe mole gata ai. Neʼe ui e Sehova kia Moisese ke ina hilifaki te faʼahi ʼaeni ki te lao: “Ka mate leva he tagata kae e mole ina mau hona foha, e kotou foaki leva tona tofiga ki tona ofafine.” (Num. 27:6-8; Sos. 17:1-6) Talu mai ai, ko te hahaʼi fafine Iselaele fuli ʼae neʼe tau mo he aluʼaga feia, neʼe maʼu mo natou he tofiga.

15. (1) ʼE feafeaʼi te aga ʼa Sehova mo tana hahaʼi, ʼo kau ai mo natou ʼae ʼe mole honatou tahi age falanakiʼaga? (2) Kotea ʼihi atu fakamatala ʼi te Tohi-Tapu ʼe ha ai ko Sehova ʼe mole fakapalatahi?

¹⁵ Neʼe ko he puleʼaki neʼe ha moʼoni ai te mole fakapalatahi! Ko te ʼu tautehina ʼaia ʼe toko nima, neʼe mole honatou tahi age falanakiʼaga, pea neʼe gaohi fakatatau mo fakaʼapaʼapaʼi natou e Sehova, ohage pe ko tana fai ki te kau Iselaele fuli. (Pes. 68:5) ʼE ko te tahi pe ʼaeni fakamatala ʼi te Tohi-Tapu ʼe ha ai ko Sehova ʼe ina gaohi fakatatau tana hahaʼi.—1 Sam. 16:1-13; Gaue 10:30-35, 44-48.

ʼE FEALA TATATOU FAIFAITAKIʼI IA SEHOVA

16. ʼE feafeaʼi hatatou mole fakapalatahi ohage ko Sehova?

¹⁶ ʼE feafeaʼi hatatou mole fakapalatahi ohage ko Sehova? Kotou manatuʼi, ʼe mole tou fakapalatahi anai mo kapau ʼe tou manatu ʼe tonu ke gaohi fakatatau te hahaʼi fuli. ʼE lagi kotou ui ʼe mole kotou fakapalatahi. Kaʼe ʼi ʼihi temi ʼe faigataʼa hatatou iloʼi moʼoni tatatou manatu ʼo ʼuhiga mo ʼihi. Koia ʼe feafeaʼi hatatou lava iloʼi ʼe mole tou fakapalatahi? Neʼe tuku mai e Sesu he faʼifaʼitaki lelei kia tatou. ʼI tana fia iloʼi pe kotea ʼae neʼe ui e te hahaʼi ʼo ʼuhiga mo ia, neʼe ina fehuʼi fenei ki ʼona kaumeʼa: “Pe ko ai au i te lau a te hahai, ia au ko te Foha o te tagata?” (Mat. 16:13, 14) ʼE lagi feala ke kotou fehuʼi fenei ki hokotou kaumeʼa ʼe palalau fakahagatonu atu anai: “ ʼI tau manatu ʼe au gaohi fakatatau koa te hahaʼi? ʼE toe manatu feia koa ʼihi?” ʼE lagi ina ui atu anai, ʼi ʼihi temi ʼe ke gaohi fakalelei age ʼihi lanu kaʼe tuku ʼihi, peʼe ke agalelei age mo natou ʼae ʼe maʼu falā peʼe popoto. Kapau ʼe ko tana tali ʼaia, pea kotea ʼae ʼe tonu ke ke fai? Faikole kia Sehova pea mo kole mamahi ke tokoni atu ke ke fetogi tau faʼahiga manatu ʼo ʼuhiga mo ʼihi ke feala ai ke ke hage ko ia, ʼo mole ke fakapalatahi.—Mat. 7:7; Kol. 3:10, 11.

17. Kotea ʼihi aluʼaga ʼe feala ke tou fakaha ai ʼe mole tou fakapalatahi?

¹⁷ ʼI te kokelekasio, ʼe feala ke tou faʼifaʼitakiʼi ia Sehova ʼaki tatatou fakaʼapaʼapa mo agalelei ki ʼotatou tehina mo tuagaʼane fuli. Ohage la moka kotou faifakaafe, ʼe feala ke kotou fakaafe natou ʼe mole kotou aga ʼi fenua tahi. Peʼe feala ke kau ai natou ʼae ʼe masisiva, peʼe ko te kau vitua, peʼe ko te kau tupulaga ʼae ʼe mole honatou famili ʼi te moʼoni. (Lau ia Kalate 2:10; Sakopo 1:27.) ʼI te gaue faifakamafola ʼe tou palalau mo te hahaʼi kehekehe, ʼo kau ai natou mai te tahi atu ʼu fenua. ʼE fai e te kautahi ʼa Sehova ni tohi Fakatohi-tapu ia lea ʼe 600 tupu. ʼE ko he faigamalie lelei ʼaupito ʼaia ʼe tou maʼu moʼo fakaha tatatou mole fakapalatahi!

18. Ka kotou fakakaukauʼi ia te faigafua ʼo tatatou fakaovi kia Sehova pea mo tana mole fakapalatahi, kotea ʼae ʼe uga ai koutou ke kotou fai?

¹⁸ Ka tou toʼo he temi moʼo fakakaukauʼi te faigafua ʼo tatatou fakaovi kia Sehova pea mo tana mole fakapalatahi, pea ʼe tou leleiʼia lahi age anai te ʼu kalitate ʼaia. Pea ʼe uga ai tatou ke tou fia faʼifaʼitakiʼi ia Sehova pea mo fakaha te ʼu kalitate ʼaia ʼi ʼatatou felogoʼi ʼae mo ʼotatou tehina pea mo natou ʼae ʼe tou felaveʼi mo ia ʼi te gaue faifakamafola.