ʼE Koutou Faʼifaʼitaki Koa Ki Totatou ʼAtua ʼAē ʼe Mole Fakapulepule?

ʼE FEALA ke tou maʼu ʼifea​—te mole fakapulepule? ʼE ʼi ai te Tahi ʼe mole fakapulepule, ʼe ʼāteaina mai te fakapalatahi, pea mo te fakakeheʼi ʼo te hahaʼi ʼuhi ko tonatou lanu pea mo te filifili hahaʼi. ʼE ko Sehova ʼAtua, te Tupuʼaga ʼo te malamanei. Kae, ʼo ʼuhiga mo te tagata, neʼe tohi fēnei e te tagata faitohi Pilitania ʼo te 19 sēkulō ko Charles Lamb: “Kia ʼau, ʼe ʼau ʼui fakalelei, ko te fonu ʼo te ʼu fakapalatahi​—ʼe fakatahi ai te ʼofa pea mo te fehiʼa.”

ʼE lahi ʼaupito te fakapulepule ʼa te tagata. Kua hili kiai ni ʼu sēkulō neʼe fakatokagaʼi e te Hau poto ko Salomone ʼo Iselaele, ko te “tagata ʼe ina puleʼi te tagata ki tona malaʼia.” (Tagata Tānaki 8:9) ʼE ʼāsili tuputupu te fehiʼa ki te hahaʼi ʼo he tahi lanu, te ʼu fihi faka puleʼaga, pea mo te ʼu kē faka famili. Koia, ʼe fakapotopoto koa te tui ʼaē ʼe feala ke fakatuputupu e te hahaʼi he sosiete ʼe mole aga fakapulepule?

ʼE tonu ke tou faiga fakamalotoloto ke tou lolomi tatatou ʼu aga, pea ke tou līaki te ʼu aga fakapalatahi ʼaē neʼe tauaka ia tatou. (Efesi 4:​22-​24) ʼE lagi mole tou tokagaʼi kae ʼe feala ke tou maʼu he ʼu aga feiā ʼuhi ko te faʼahi ʼaē neʼe tou tutupu ai, pea mo te faʼahi ʼaē neʼe tou ako ai, pea ko te ʼu aga ʼaia ʼe mālohi ʼi totatou famili, ʼi te ʼu hahaʼi ʼo totatou lanu, pea mo te hahaʼi ʼo totatou fenua. Ko te ʼu aga ʼaia ʼaē ʼe hage ʼe mole faʼa kovi, ʼi te agamāhani ʼe ko he ʼu meʼa ʼe kua tauaka mālohi ia tatou, pea ʼe tupu ai te ʼu aga fakapulepule. Ko te tagata fai lao Écossais ko Francis Jeffrey neʼe ina ʼui fēnei: “ ʼE lagi kua mālama ki te tagata fuli pe, ia te lahi pea mo te mālohi ʼo tana ʼu fakapalatahi.”

Kua mahino kia Lenaa ʼe tonu ke ina tauʼi mālohi tana aga fakapulepule. Moʼo tauʼi ʼo te ʼu manatu fakapalatahi ʼaē ʼi totatou loto, ʼe ina ʼui fēnei, ʼe tonu “ke kita faiga mālohi, koteʼuhi ʼe mālohi ʼaupito te ʼu meʼa ʼaē neʼe akoʼi mai kia tatou ʼi totatou kei liliki.” Tahi ʼaē meʼa, ʼe ʼui e Lena ʼe tonu ke fakamanatuʼi tuʼumaʼu mai kia tatou te faʼahi ʼaia.

Ko Te Fakamatala ʼo ʼUhiga Mo Te Mole Fakapulepule ʼa Sehova

Ko Sehova ʼe ko he faʼifaʼitaki haohaoa ʼo te mole fakapulepule. Talu mai te kamataʼaga ʼo te Tohi-Tapu, ʼe tou lau ai pe neʼe feafeaʼi tana fakahā tana mole fakapulepule ʼi tana ʼu felogoi mo te hahaʼi. ʼE feala ke lahi te ʼu meʼa ʼaē ʼe tou ako mai te ʼu faʼifaʼitaki ʼaia pea mo te ʼu fakamanatu ʼaia.

Neʼe fakahā e Sehova tana mole fakapulepule ʼi tana fakaʼaogaʼi te ʼapositolo Sutea ko Petelo ke ina faka mafola te logo lelei kia Kolonelio pea mo ʼihi kau Senitile ʼi te taʼu 36 ʼo totatou temi. ʼI te temi ʼaia neʼe ʼui fēnei e Petelo: “Ko te ʼAtua ʼe mole fakapulepule; kae ʼi te fenua fuli pe ko te tagata ʼaē ʼe manavasiʼi kia te ia pea mo maʼuliʼi te faitotonu ʼe ina leleiʼia.”​—Gāue 10:34, 35.

ʼI tana ʼu felogoi mo te malamanei, neʼe fakahā fakalelei e Sehova tana mole fakapulepule. Neʼe ʼui fēnei e Sesu Kilisito ʼo ʼuhiga mo tana Tāmai: “ ʼE ina fakahopo ake tona laʼā ki te kau agakovi pea mo te kau agalelei, pea ʼe ina fakatō te ʼua ki te kau agatonu pea mo te kau heʼe agatonu.” (Mateo 5:​45) Neʼe toe hoko atu te vikiʼi e Petelo ia Sehova ʼi tona ʼuhiga ʼAtua ʼaē ʼe mole fakapulepule, ʼo ina ʼui fēnei: “ ʼE faʼa kātaki kia koutou heʼe mole ina loto ke fakaʼauha he tahi, kae ʼe loto ia ke aʼu te hahaʼi fuli ki te fakahemala.”​—2 Petelo 3:9.

ʼI te ʼu ʼaho ʼo Noe, neʼe “lahi ʼaupito te agakovi ʼa te tagata ʼi te kele pea ko te ʼu fakakaukau ʼo tona loto neʼe kovi pe ia ʼi te temi fuli pe,” koia neʼe fakatuʼutuʼu ai e Sehova ke ina fakaʼauha te hahaʼi. (Senesi 6:​5-7, 11, 12) Kae, neʼe faʼu e Noe te aleka ʼo mulimuli ki te fakatuʼutuʼu ʼa te ʼAtua pea neʼe sio fuli kiai te hahaʼi ʼo tona temi. Logope la tana faʼu te aleka pea mo tona ʼu foha, kae ko Noe neʼe ko te “tagata faka mafola faitotonu.” (2 Petelo 2:5) Logope la tana ʼiloʼi ʼaē ʼe kovi te loto ʼo te hahaʼi ʼo te temi ʼaia, neʼe fakahā e Sehova kia nātou fuli he logo ʼe mahino lelei. Neʼe loto ia ke mahino kia nātou pea mo lave ki tonatou loto te logo ʼaia, ʼo ina fakatotonu kia Noe ke ina faʼu te aleka pea mo fai faka mafola. Neʼe nātou maʼu te faigamālie fuli ke nātou tali te logo ʼaia, kae “neʼe mole nātou fakatokagaʼi he meʼa ʼo aʼu ki te haʼu ʼa te tulivio pea ʼave ai ia nātou fuli.”​—Mateo 24:39.

ʼE ko he faʼifaʼitaki lelei ʼaia ʼo ʼuhiga mo te tui ʼaē ko Sehova ʼe mole fakapulepule! ʼI te ʼu ʼaho fakamuli ʼaenī, ʼe uga te kau kaugana ʼa te ʼAtua ke nātou fakahā te logo lelei ʼo te Puleʼaga ʼo mole nātou aga fakapulepule. Tahi ʼaē meʼa, ʼe nātou fakahā te ʼaho lagavaka ʼo Sehova. ʼE hā lelei ki te hahaʼi, ʼe mole nātou fakapulepule, heʼe nātou fakahā te logo ʼa Sehova ki te hahaʼi fuli.​—Isaia 61:​1, 2.

Ko te ʼu fakapapau ʼaē neʼe fai e Sehova ki te pateliaka ko Apalahamo, mo Isaake, pea mo Sakopo neʼe hā lelei ai ko te ʼAtua ʼe mole fakapulepule. ʼAki tonatou hōloga faka famili ʼe haʼu mai ai ia Ia ʼaē neʼe fakanofo ke ina ‘tapuakina moʼoni te ʼatu puleʼaga fuli pe ʼo te kele.’ (Senesi 22:18; 26:4; 28:14) Neʼe ko Sesu tonu ia ia ʼaē neʼe fakanofo. ʼAki te mate ʼo Sesu pea mo tona fakatuʼuake, neʼe foaki e Sehova te ala ʼo te fakamaʼuli ki te hahaʼi fakalogo fuli. ʼIo, ko te ʼu fua lelei ʼo te sakilifisio faitotogi ʼa Kilisito ʼe feala ke maʼu e te hahaʼi fuli.

ʼI te ʼu temi ʼo Moisese, neʼe hā te mole fakapulepule ʼa Sehova ʼi tana tokaga ʼaē ki te ʼu taʼahine ʼa Selofehate. Ko te ʼu taʼahine ʼaia e nima neʼe nātou tau mo te faigataʼaʼia ʼo ʼuhiga mo te tofiʼa ʼo tanatou tāmai ʼi te Kele ʼo te Fakapapau. Neʼe hoko te faʼahi ʼaia heʼe ko te agaʼi fenua ʼi Iselaele, neʼe ko te foaki ʼo te tofiʼa ʼo te kele ki te ʼu foha ʼo te tagata. Kae, neʼe mate ia Selofehate ka mole hona foha ke ina tuku ki ai te tofiʼa ʼaia. Koia ko te ʼu taʼahine e nima ʼa Selofehate neʼe nātou ʼōmai ʼo fai tanatou kole kia Moisese ke mole fakakeheʼi nātou, ʼo nātou ʼui fēnei: “He koʼe koa ʼe tonu anai ke pulihi te higoa ʼo tamatou tāmai ʼi te lotolotoiga ʼo tona famili ʼuhi ko tana mole maʼu hona foha? Foaki mai kia mātou he kele ʼi te lotolotoiga ʼo te ʼu tēhina ʼo tamatou tāmai.” Neʼe fagono ia Sehova ki tanatou ʼu kole pea neʼe ina ʼui kia Moisese: “Kapau ʼe mate he tagata ka mole ʼi ai hona foha, ʼe tonu ke koutou foaki tona tofiʼa ki tona ʼofafine.”​—Faka au 27:​1-​11.

ʼI te hisitolia ʼaia, ʼe hā ai te ʼofa pea mo te mole fakapulepule! Ke nātou ʼiloʼi papau ko te tofiʼa ʼe mole feala tona foaki ki he tahi telepi mokā ʼohoana te ʼu taʼahine, neʼe fakamaʼua ke nātou ʼohoana pe ʼi “te famili ʼo te telepi ʼo tanatou ʼu tāmai.”​—Faka au 36:​5-​12.

ʼE toe hā te mole fakapulepule ʼa Sehova ʼi te ʼu ʼaho ʼo te tuʼi fakamāu pea mo polofeta ko Samuele. Neʼe fakatotonu age e Sehova kia ia ke ina fakanofo he hau foʼou ʼi te telepi ʼo Suta, ʼi te famili ʼo Sese te tagata mai Petelehemi. Kae neʼe ko te ʼu foha e hiva ʼo Sese. Ko ai anai ʼaē ka fakanofo hau? Neʼe tokagaʼi e Samuele te vaka tagata ʼo Eliape. Kae, neʼe mole sioʼi e Sehova te ʼu agaaga ʼo te sino. Neʼe ina ʼui age kia Samuele: “ ʼAua naʼa ke sio ki tona fofoga pea mo te agaaga ʼo tona sino . . . Heʼe ko te sio ʼa te tagata ʼe mole ko te sio ʼa te ʼAtua, koteʼuhi ʼe sio te tagata ki te meʼa ʼaē ʼe hā ki te ʼu mata; kae kia Sehova, ʼe sio ia ki te ʼuhiga ʼo te loto.” Ko Tavite, te foha muli ʼo Sese ʼaē neʼe fakanofo.​—1 Samuele 16:​1, 6-​13.

Te Meʼa ʼe Tou Ako Mai Te Mole Fakapulepule ʼa Sehova

Ko te ʼu tagata ʼāfea ʼe tonu ke nātou faʼifaʼitaki kia Sehova, ʼo nātou sioʼi te ʼu kalitate fakalaumālie ʼo he Kilisitiano. ʼE faigafua tatatou fakamāu he tahi ʼaki tatatou ʼu manatu totonu, ʼo tou faka fealagia ki te ʼu meʼa ʼaē ʼi totatou loto ke nātou fakakoviʼi tatatou faʼahiga sio. Ohage ko te ʼui ʼa te tagata ʼāfea, “ ʼE ʼau faiga ke ʼau gaohi leleiʼi toku ʼu tēhina mo tuagaʼane, ʼo mulimuli ki te meʼa ʼaē ʼe loto kiai ia Sehova, kae ʼe mole ʼau fai ʼo mulimuli ki taku ʼu manatu.” ʼI meʼa lelei foki mokā fakaʼaogaʼi e te kau kaugana fuli ʼa Sehova tana Folafola moʼo takitaki ʼo nātou!

Ko te ʼu faʼifaʼitaki faka Tohi-Tapu ʼaē kua tou ʼosi talanoa kiai, ʼe tokoni kia tatou ke tou tauʼi te ʼu manatu fakapalatahi ʼaē ʼe maʼu e te hahaʼi ʼo ʼuhiga mo te lotu peʼe ko te fenua. Kapau ʼe tou faʼifaʼitaki kia Sehova ʼaē ʼe mole fakapulepule, pea ʼe tou puipui ai te kokelekasio faka Kilisitiano mai te fakapalatahi, mo te fakakeheʼi ʼo te hahaʼi ʼuhi ko tonatou lanu, pea mo te filifili hahaʼi.

Neʼe mahino ki te ʼapositolo ko Petelo ko te “ ʼAtua ʼe mole fakapulepule.” (Gāue 10:34) Ko te filifili hahaʼi ʼe fakafeagai ki te aga fakapulepule, pea ʼe ina maumauʼi te ʼu lekula ʼo te ʼofa pea mo te logo tahi. Neʼe ʼofa mamahi ia Sesu ki te hahaʼi māsisiva, te hahaʼi vaivavai, pea neʼe ina fakamaʼamaʼa tanatou ʼāmoga. (Mateo 11:28-30) Neʼe mole hage ia ko te kau takitaki lotu Sutea, ʼaē neʼe nātou pule fakaʼaliki ki te hahaʼi, ʼo nātou faka mafasia ʼaki te ʼu kavega mo te ʼu lekula mamafa. (Luka 11:45, 46) ʼE mahino papau ia, ko tanatou fai te faʼahi ʼaia pea mo tanatou fakahā tanatou leleiʼia tāfito ia te hahaʼi maʼu koloā, neʼe mole ʼalutahi mo te ʼu akonaki ʼa Kilisito.​—Sake 2:​1-4, 9.

Ia ʼaho nei, ko te ʼu tagata ʼāfea ʼe nātou mulimuli ki te pule ʼa Kilisito, pea ʼe mole nātou fakapulepule kia nātou fuli ʼaē kua foaki tonatou maʼuli kia Sehova. Mai tona ʼaluʼaga ʼaē ʼe nātou ‘fafaga te faga ōvi ʼa te ʼAtua ʼaē neʼe tuku age kia nātou,’ koia ʼe mole nātou fakahā te fakakeheʼi ʼo te ʼu tēhina mo te ʼu tuagaʼane ʼuhi ko tonatou ʼu ʼaluʼaga faka ekonomike, tanatou aga, peʼe ko te ʼu vāhaʼa faka famili. (1 Petelo 5:2) ʼAki tanatou faʼifaʼitaki ki te ʼAtua ʼaē ʼe mole fakapulepule, pea mo tanatou fakalogo ki tana ʼu fakatokaga ʼaē ke mole fakakeheʼi te hahaʼi, ʼe fakatuputupu ai anai e te ʼu tagata ʼāfea te mole fakapulepule ʼi te kokelekasio.

Ko te kokelekasio faka Kilisitiano ʼa te kau Fakamoʼoni ʼa Sehova, ʼe ko he famili fakatautehina ʼi te malamanei katoa. ʼE ko he fakamoʼoni ʼaia ʼe feala ke hoko moʼoni te ʼui ʼe takitaki anai e Sesu he sosiete fakatagata ʼe mole fakapalatahi, pea ʼe mole maʼu ai te fakapulepule. Ko te kau Fakamoʼoni ʼa Sehova kua nātou “kofuʼi te ʼuhigaʼi tagata foʼou ʼaē neʼe fakatupu ʼo mulimuli ki te finegalo ʼo te ʼAtua ʼi he faitotonu pea mo he agatonu moʼoni.” (Efesi 4:​24) ʼIo, ʼe nātou mulimuli ki te faʼifaʼitaki haohaoa ʼa Sehova ʼAtua ʼaē ʼe mole fakapulepule, pea ʼe nātou maʼu te ʼamanaki ʼaē ke nātou maʼuʼuli ʼo heʼegata ʼi te mālama foʼou ʼaē ʼe mole toe maʼu ai anai te fakapulepule.​—2 Petelo 3:​13.

[Nota ʼi te lalo pasina]

[Paki ʼo te pasina 26]

Neʼe mahino ki te ʼapositolo ko Petelo ko te ʼAtua ʼe mole fakapulepule