Tou ʼOʼofa Ki Te Hahaʼi—ʼO Mole Tou Fakapalatahi Mokā Tou Fai Faka Mafola
1 Neʼe sio te ʼapositolo ko Soane ki te ʼāselo ʼe lele ʼi te lotomalie ʼo te lagi, ʼo tala ia te logo lelei heʼegata ki te hahaʼi ʼo “te puleʼaga kehekehe, te telepi kehekehe, te lea kehekehe pea mo te hahaʼi kehekehe.” (Apk. 14:6, MN ) ʼE tou muliʼi koa ia te faʼifaʼitaki ʼa te ʼāselo, ʼo mole tou fakapalatahi mokā tou fai faka mafola? ʼE lagi mole tou tokagaʼi, kae ʼe feala ke hā ʼe tou fakapalatahi, mokā tou fakahā tatatou ʼu manatu ʼo ʼuhiga mo he ʼu faʼahiga meʼa. ʼE feala ke ʼiloga ia te faʼahi ʼaia ʼi tatatou faʼahiga fakahā ia te logo lelei ki te hahaʼi. Koia, ʼe tonu ke tou ʼoʼofa fakamalotoloto ki te hahaʼi mokā tou fai faka mafola ki he tahi lanu.
2 Te ʼu Hahaʼi ʼo Tokotou Telituale: ʼE ʼi ai koa ni hahaʼi ʼi tokotou telituale neʼe ko he ʼu hahaʼi neʼe feholaki mai tonatou fenua? ʼE feala pe ke mole tou tokagaʼi nātou, koia tou kumi te ʼu hahaʼi ʼaia pea mo tou faiga ke tou feʼiloʼiʼaki lelei mo nātou. Ko te ʼu meʼa fea ʼaē ʼe ʼaoga pea mo lelei kiā nātou, te ʼu meʼa ʼaē ʼe nātou fēhihiʼa kiai, te ʼu meʼa ʼaē ʼe nātou mātataku kiai pea mo manatu hala kiai? Koutou faigaʼi ke koutou popoto ʼi te faka mafola ʼo te logo ʼo te Puleʼaga. (1 Ko. 9:19-23) Ohage ko te ʼapositolo ko Paulo, ʼe tonu ke tou logoʼi ʼe ko hotatou maʼua ke tou faka mafola ia te logo lelei ki te hahaʼi fuli ʼo totatou telituale, ia nātou ʼe ʼōmai mai he tahi fenua, ia nātou ʼe kehekehe tanatou ʼu agaʼi fenua, mo tanatou lea, pea mo nātou ʼaē ʼe māsisiva.—Loma 1:14.
3 E feafeaʼi hakotou fai faka mafola ki he tahi ʼe mole koutou lea tahi? Koutou fakaʼaogaʼi te kiʼi kaupepa Une bonne nouvelle pour des gens de toutes nations. Koutou fakaʼaogaʼi he tahi ʼu kiʼi pepa lotu peʼe ko he ʼu kaupepa lalahi ʼi te lea ʼa te hahaʼi ʼo tokotou telituale. (Vakaʼi Te Minisitelio ʼo Te Puleʼaga ʼo Sūlio 2003, p. 4 pal. 2 mo te 3.) Tahi ʼaē meʼa, ko ʼihi kau fai faka mafola neʼe nātou faiga ʼaupito ke nātou ako ʼi he tahi lea ia te ʼu palalau ʼo ʼuhiga mo te faifakamālo peʼe ko he ʼu ʼuluaki palalau faigafua. ʼI te agamāhani, ko te hahaʼi ʼe nātou leleiʼia mokā nātou logo ʼe tou palalau ʼi tanatou lea, tatau aipe peʼe ko he ʼu kiʼi kupu veliveli pe, kae ʼe feala pe anai hanatou fia logo ki te logo lelei.
4 Tou Faʼifaʼitakiʼi Ia Sehova: Kapau ʼe tou fakaaʼu te logo lelei ki te hahaʼi ʼo te ʼu lanu kehekehe, ʼe tou faʼifaʼitakiʼi ia te ʼAtua ko Sehova ʼaē ʼe mole fakapalatahi, heʼe “ko tona finegalo ke fakamauli te tagata fuape, pea ke natou kaku ki te iloi o te mooni.”—1 Tim. 2:3, 4.