ʼE Koutou Leleiʼia Koa Te ʼu Meʼa Taputapu?
1 Ka fehuʼi mai peʼe tou leleiʼia te ʼu meʼa taputapu, pea mahino papau ia ʼe tou foimo ʼio anai kiai! Koteā he ʼu meʼa taputapu ʼa te ʼAtua ʼe tou leleiʼia?
2 ʼE maʼuhiga ʼaupito kia tatou tatatou ʼu felogoi ʼaē ʼe tou maʼu takitokotahi mo tatatou Tāmai ʼaē ʼi selo! ʼE ina ʼui papau mai kapau ʼe ‘tou fakaōvi kia te ia pea e fakaōvi mai anai kia tatou.’ (Skp. 4:8) Kanaʼauala te totogi ʼaē neʼe foaki faka sakilifisio e Sesu Kilisito, ʼe mole feala ki he tahi ke ina maʼu te maʼuli heʼegata. (Soa. 3:16) ʼAki he loto fakafetaʼi moʼoni, ʼe tou fakahā ʼi te ʼaho fuli ʼi tatatou ʼu faikole ʼe tou leleiʼia ʼaupito te meʼa ʼofa maʼuhiga ʼaia ʼo te ʼAtua.
3 ʼE toe taputapu kia tatou te Folafola ʼa te ʼAtua, te Tohi-Tapu, ʼo feiā mo te kautahi fakakelekele ʼa Sehova. ʼE tou fakahā tatatou fakafetaʼi ki te ʼu fakatuʼutuʼu ʼaia mai ia Sehova, mokā tou maʼuliʼi te ʼu pelesepeto ʼo te Tohi-Tapu, mo fakamālohiʼi totatou ʼofa fakatautehina, mo tou mulimuli fakalelei ki te pule faka teokalatike, pea mo tou lagolago ki te ʼu tēhina takitaki.—1 Pet. 1:22.
4 ʼAki te tagata kaugana agatonu mo poto, ʼe tou maʼu he tuʼuga meʼa kai fakalaumālie. ʼE hoko moʼoni anai te faʼahi ʼaia ʼi te taʼu ʼaenī, ʼi te Fakatahi Faka Tisitilike ʼaē ko tona kupu tāfito: “Tou Maʼuliʼi Te Folafola ʼa Te ʼAtua.” ʼE akoʼi mai anai te ʼu meʼa maʼuhiga ʼaupito, pea ʼe tou fakatahi anai mo ʼotatou tēhina mo tuagaʼane, ʼaē ʼe nātou ʼaoga ʼaupito kia tatou. ʼE tou lava fakahā feafeaʼi tatatou loto fakafetaʼi ki te fakatuʼutuʼu taputapu ʼaia?
5 ʼAua Naʼa Tou Meʼa Noaʼi Te Fale ʼo Sehova: Neʼe fai e Nehemia te fakatokaga ki te kau Iselaele ʼaē neʼe gāue kinakina moʼo toe laga te ʼu kaupā ʼo Selusalemi, ke ‘ ʼaua naʼa nātou meʼa noaʼi te fale ʼo tonatou ʼAtua.’ (Neh. 10:39) Ia ʼaho nei, ko te “fale” ʼo Sehova ʼe ko tana fakatuʼutuʼu ki te tauhi, pea ʼe kau ki te fakatuʼutuʼu ʼaia te ʼu fakatahi faka tisitilike. Moʼo fakaʼapaʼapa ki te fakatuʼutuʼu ʼaia, ʼe tonu ke tou kau kiai pea mo tou fakalogo lelei, ʼo tou fakahā ai kia Sehova ʼe maʼuhiga ʼaupito kia tatou te ʼu meʼa kai ʼaē neʼe ina teuteuʼi. (Hep. 10:24, 25) Koteā te ʼu fakatuʼutuʼu ʼaē ʼe tonu ke tou fai ʼi te temi nei moʼo fakahā ʼe tou leleiʼia katoa te fakatahi taputapu ʼaē ka hoko mai?
6 Tou Kau Ki Te ʼu ʼAho e Tolu: ʼE tonu ke tou tahi fakatuʼutuʼu ke tou kau ki te ʼu ʼaho e tolu ʼo te fakatahi, ʼi te ʼaho 15 ki te 17 ʼo Sepetepeli peʼe ko te ʼaho 22 ki te 24 ʼo te taʼu 2000. ʼE koutou fakatuʼutuʼu koa ke koutou ʼōmai fakatomuʼa ʼi te ʼaho fuli, pea mo koutou nonofo ʼo aʼu ki te faikole fakaʼosi ʼo te ʼAhotapu? Kapau ʼe koutou fai feiā, pea ʼe lahi anai te ʼu tapuakina ʼaē ka koutou maʼu. ʼE mole lagi faigafua tuʼumaʼu hakita kau ki he fakatahi. ʼE lagi tonu ke koutou lotomālohi moʼo kole he ʼu ʼaho mālōlō ki takotou patolo. ʼE mole lagi faʼa lelei tuʼumaʼu takotou ʼu meʼa feʼoloʼaki. Kae ʼaua naʼa koutou tuku ki te ʼu ʼaluʼaga ʼaia ke nātou fakaloto vaivaiʼi takotou fia kau ki te fakatahi.
7 Koʼeni Te Faʼifaʼitaki Lelei: ʼI te taʼu ʼaenī kua hili, ʼi tanatou ʼolo ki te fakatahi faka tisitilike, ko te ʼu tēhina ʼo te fenua ʼo Afelika ʼaē ʼe hoko ai te tau, neʼe nātou felāveʼi mo te kau solia. Neʼe fehuʼi age ki te ʼu tēhina: “Ko ai ia koutou, pea ʼe koutou ʼolo kifea?” Neʼe nātou tali fēnei: “Ko mātou ko te kau Fakamoʼoni ʼa Sehova, pea ʼe mātou ʼolo ki te fakatahi faka tisitilike.” Neʼe ʼui fēnei e te tahi tagata solia: “Ko koutou kau Fakamoʼoni ʼa Sehova, ʼe mole koutou matataku ʼi he meʼa. Koutou ʼolo, pea koutou fai takotou fakatahi, heʼe mole hoko anai he fihifihia. Kae ʼe tonu ke mahino kia koutou ʼe koutou felāveʼi anai mo he ʼu kūtuga solia tokolahi. Koutou haʼele tuʼumaʼu ʼi te lotomalie ʼo te ala! Kapau ʼe koutou sio ki he fakapupu ʼa he tokolahi, pea koutou haga haʼele aipe ʼi te lotomalie ʼo te ala!” Neʼe nātou mulimuli kiai, pea nātou aʼu haohaoa ki te fakatahi. Neʼe tapuakina te ʼu tēhina ʼaia he neʼe nātou fakahā tanatou leleiʼia ia te ʼu meʼa taputapu.
8 Ohage ko totatou ʼu tēhina ʼi Afelika, ʼe tou toe felāveʼi mo he ʼu faigataʼaʼia. Kae ʼe mahino papau ia ʼe tou lava faʼifaʼitakiʼi tanatou tui, pea mo tou lotomālohi ke tou kau ki te ʼu koga fuli ʼo tatatou fakatahi faka tisitilike. Kapau ʼe tonu ke koutou fai he ʼu fetogi, pea koutou kumi te takitaki ʼa Sehova, heʼe koutou ʼiloʼi ʼe ina tapuakina anai tatatou ʼu faiga ʼaē ke tou kau ki te ʼu ʼaho fuli ʼo te fakatahi.
9 Tou Maʼu Te ʼu Tapuakina: ʼE tou holi mālohi ki te Folafola ʼa te ʼAtua, heʼe tou ʼiloʼi ʼe tou lava tuputupu ai ki te fakamaʼuli. (1 Pet. 2:2) Ko tatatou kau ki te fakatahi faka tisitilike pea mo tatatou fakalogo ki te polokalama, ʼe tokoni anai kia tatou takitokotahi ke tou fakamālohi tatatou tui ki te Folafola ʼaia, pea ke lelei age tatatou tauʼi te ʼu ʼohofi ʼa Satana. Kapau ʼe tou fai feiā, pea ʼe tou fakahā anai kia Sehova pea kia nātou fuli ʼaē ʼe nātou mamata kia tatou, ʼe tou leleiʼia te ʼu meʼa taputapu katoa pea “ ʼe mole tou kau ia nātou ʼaē ʼe holomuli . . . kae ia nātou ʼaē ʼe tui ki te hāofaki ʼo te nefesi.”—Hep. 10:39, MN; 12:16; Taag. 27:11.
10 ʼE tou tui papau ʼe avahi anai e Sehova ʼAtua te ʼu matapā ʼo te lagi, pea ʼe ina fakatō mai anai he ʼu tapuakina lahi ʼi te faʼahi fakalaumālie. (Mlk. 3:10) Koutou fakatuʼutuʼu ke koutou kau ki te Fakatahi Faka Tisitilike ʼaē ko tona kupu tāfito: “Tou Maʼuliʼi Te Folafola ʼa Te ʼAtua,” mai te kamataʼaga ʼo te polokalama ʼo te Feliaono uhu ʼo aʼu ki te faikole fakaʼosi pea mo te “Ameni!” ʼo te ʼAhotapu hili hoʼatā. ʼE koutou fiafia anai kapau ʼe koutou fai te faʼahi ʼaia!