“ ʼE Tonu Koa Ke ʼAu ʼAlu Ki He Tahi Koga Meʼa?”
1 Moʼo tali ki te fakatotonu ʼa Sesu ke tou “olo o fakahoko he u tisipulo i te atu puleaga,” tokolahi ʼi te ʼu kaugana ʼa Sehova neʼe nātou mavae ki te ʼu koga meʼa ʼaē ʼe ʼaoga lahi ai he kau gāue. (Mat. 28:19) Neʼe nātou faʼifaʼitakiʼi ia Paulo, ʼaē neʼe tali ki te pāui ʼaenī: “Fakalaka mai ki Masetonia o tokoni mai kia matou.” (Gaue 16:9) ʼE koutou lava fakahoko feafeaʼi te faʼahi ʼaia?
2 Te ʼu Faʼahi ʼAē ʼe Tonu Ke Koutou Fai: ʼE ʼi ai koa he faʼahi ʼo te telituale ʼo tokotou kokelekasio ʼe tahitahiga tona gāueʼi? Kapau koia, pea ʼe tonu ke koutou faiga tāfito ʼo gāueʼi te ʼu telituale ʼaia. ʼI muʼa ʼo hakotou fakatuʼutuʼu ke koutou ʼolo ki he koga meʼa, koutou felogoi muʼa mo tokotou ʼu tagata ʼāfea ke nātou fakahā atu peʼe tonu ke koutou ʼolo kiai. ʼE toe lelei pe foki ke koutou fakalavelave ki tokotou tagata taupau faka silikosikilipisio peʼe ina ʼiloʼi he kokelekasio ʼe tuʼu ōvi ki te koga meʼa ʼaē ka koutou ʼolo ʼo fakahoko ai tokotou minisitelio. ʼI te tahi faʼahi, kapau kua koutou fakakaukauʼi lelei te faʼahi ʼaia, pea ʼe koutou fia ʼolo anai ʼo tokoni ʼi he tahi kolo ʼo te fenua peʼe ko he tahi age fenua. Kapau ko tokotou loto ʼaia, pea ʼe tonu anai ke koutou fai fakatahi mo te kolesi ʼo tokotou ʼu tagata ʼāfea, he tohi ki te filiale ʼo ʼuhiga mo te koga meʼa ʼaē ʼe koutou fia gāue ai, ʼo koutou fakahā fakalelei age tokotou ʼaluʼaga faka teokalatike. ʼE lagi lelei age muʼa hakotou ʼolo ʼo vakaʼi te koga meʼa ʼaia, ʼi muʼa ʼo hakotou ʼolo ʼo nonofo ai.
3 Fakakaukauʼi Lelei ʼi Muʼa ʼo Hakotou Mavae Ki He Tahi Fenua: Tokolahi totatou ʼu tēhina ʼe nātou ʼolo ki te tahi ʼu fenua ʼuhi ko te faigataʼa ʼo te maʼuli peʼe ko tanatou fia hāo mai te ʼu fakafeagai. Kae ʼi te temi ʼaia, ko ʼihi neʼe nātou tō ki te hele ʼa te hahaʼi kākā he neʼe nātou fakapapau age ʼe nātou tokoni anai kia nātou, mokā ʼe nātou tau ki he tahi fenua, kae neʼe nātou kaihaʼa tanatou falā pea mo nātou līaki nātou. ʼI ʼihi temi neʼe faigaʼi e te ʼu hahaʼi kākā ʼaia, ke nātou fakaneke te hahaʼi matāpule ke nātou fai he ʼu gāue heʼeʼaoga. Koia ko te maʼuli ʼo te kau matāpule neʼe kovi age ʼi tonatou maʼuli ki muʼa atu. ʼE lagi nātou kole anai ki te ʼu tēhina ke nātou nonofo muʼa ʼio nātou pea mo tokoni age kia nātou, ʼo fakatupu ʼaki ai he kavega ki he tahi ʼu famili Kilisitiano, ʼaē ʼe ʼi ai pe la mo tonatou ʼu fihifihia. Ko te tahi ʼu famili neʼe tahi ʼalu pea mo maʼuli mamahi ʼuhi ko te taʼi ʼu fakatuʼutuʼu hala ʼaia.—1 Tim. 6:8-11.
4 Kapau ʼe koutou mavae ki he tahi fenua ʼuhi ko te faigataʼa ʼo tokotou maʼuli, ʼaua naʼa galo kia koutou ʼe ʼi ai anai mo te ʼu faigataʼaʼia ʼi te fenua ʼaia. ʼE faigafua age te fakatokatoka ʼo tokotou ʼu fihifihia ʼi te fenua ʼaē ʼe koutou ʼiloʼi tona lea, pea mo tona agaaga, ʼi hakotou kamata he maʼuli foʼou ʼi he koga meʼa ʼe mole koutou māhani ai.