Tou Kau Katoa Ki Te Taʼukai
1 Ko te ʼu polofeta ʼa Sehova ʼo te temi muʼa, ohage ko Sesu Kilisito, neʼe nātou talanoa ʼo ʼuhiga mo te gāue, ʼaē ko te tānaki ʼo te hahaʼi. (Isa. 56:8; Esk. 34:11; Soa. 10:16) ʼE fakahoko te gāue ʼaia ʼi te temi nei, heʼe faka mafola ʼi te malamanei katoa te logo lelei ʼo te Puleʼaga. (Mat. 24:14) Kua ʼiloga lelei te kehekehe ʼo nātou ʼaē ʼe tauhi ki te ʼAtua pea mo nātou ʼaē ʼe mole tauhi kia te ia. (Mlk. 3:18) Koteā tona faka ʼuhiga kia tatou?
2 Totatou Maʼua: ʼE lelei kia tatou te faʼifaʼitaki ʼa Paulo, he neʼe gāue katoa ʼi te faka haʼele ki muʼa ʼo te minisitelio faka Kilisitiano. Neʼe ina logoʼi ʼe ko hona maʼua ke faka mafola, ke feala ki te hahaʼi fuli ke nātou logo ki te logo lelei pea ke hāofaki nātou. Neʼe uga ai ia ia ke gāue tuʼumaʼu maʼa te hahaʼi ʼaia. (Loma 1:14-17) Mai tona ʼuhiga ʼaē ʼe tuʼutāmaki te hahaʼi ʼi te temi nei, koia ʼe mole tonu koa la ke tou gāue mālohi moʼo faka mafola ki te hahaʼi ʼo totatou telituale?—1 Ko. 9:16.
3 Tou Foimo Gāue: ʼE lava fakatatau te gāue faka mafola ki te kumi pea mo te hāofaki ʼo te hahaʼi ʼaē ʼe tuʼutāmakiʼia. ʼE tonu ke kumi peʼe ʼifea te hahaʼi, pea mo hāofaki nātou naʼa tauhala. Kua nounou te temi. ʼE ʼi ai te ʼu hahaʼi ʼe tonu ke hāofaki! Koia neʼe uga ai e Sesu tana ʼu tisipulo ke nātou “faikole ki te Aliki o te taukai, ke ina fekaui mai he kau gaue ki tana taukai.”—Mat. 9:38.
4 ʼI te temi nei, ko te tokolahi ʼo te kau gāue ʼo te Puleʼaga, ʼi tanatou mahino ʼaē kua nounou te temi, ʼe nātou fakalahi tanatou gāue moʼo hāofaki te hahaʼi. Ko te tūpulaga ʼe higoa ko Hirohisa neʼe nofo mo tana faʼe pea mo tona ʼu kiʼi tēhina mo tuagaʼane e toko fā. Moʼo taupau tona loto fale, neʼe ʼala ʼi te hola tolu māfoatā moʼo tufa te ʼu nusipepa. Logola te faʼahi ʼaia, kae neʼe fia gāue lahi ia Hirohisa ʼi te minisitelio, pea neʼe kamata tana selevisi pionie. ʼE koutou lava fai koa he ʼu puleʼaki moʼo fakalahi takotou kau ki te gāue ʼaia ʼaē ka mole toe fai anai?
5 “Kua nounou te temi.” (1 Ko. 7:29, MN ) Koia, ʼofa pe ke tou fai ia meʼa fuli ʼaē ʼe tou lavaʼi ʼi te gāue maʼuhiga ʼaupito ʼaē ʼe fai ʼi te kele katoa—te faka mafola ʼo te logo lelei pea mo te fai ʼo ni ʼu tisipulo. Neʼe fakatatau e Sesu tana minisitelio ki te tānaki ʼo te taʼukai. (Mat. 9:35-38) Kapau ʼe tou kau katoa ki te taʼukai, pea ko te ʼu fua ʼo tatatou gāue, ko te tokoni ki he tahi ke kau ki te toe hahaʼi tokolahi ʼo te kau atolasio ʼaē ʼe talanoa kiai ia Apokalipesi 7:9, 10.