ʼE Koutou Maʼuliʼi Koa Te ʼu Tokoni ʼo Te Fakatahi Faka Tisitilike “Te ʼu Faiako ʼo Te Folafola ʼa Te ʼAtua”?
1 Ko nātou ʼaē neʼe kau ki te fakatahi faka tisitilike ʼo te taʼu ʼaenī, neʼe nātou tokagaʼi te loto moʼoni ʼa te hahaʼi ʼa Sehova, ke nātou fakahoko te fakatotonu ʼaē ke nātou akoʼi ki te hahaʼi te Folafola ʼa te ʼAtua. (Mat. 28:19, 20) ʼI takotou liliu kiō koutou, neʼe ko te ʼu puani tāfito fea ʼaē neʼe koutou fakatotonu ke koutou mulimuli kiai ʼi tokotou maʼuli pea mo te minisitelio?
2 Ko Te Tohi-Tapu ʼe ʼAoga Moʼo Akoʼi: Ko te kupu tāfito ʼo te ʼuluaki ʼaho neʼe ina faka maʼuhigaʼi te vaega ʼo 2 Timoteo 3:16. Ko te akonaki tāfito neʼe ina fakahā ke feala hatatou liliu “Ko He ʼu Faiako ʼe Katoa ʼi Te Folafola ʼa Te ʼAtua,” ʼe tonu ke maʼuhiga ʼaupito kia tatou te Folafola ʼa te ʼAtua, ke maʼuhiga age ʼi te ʼu manatu ʼo te tagata peʼe ko te talatisio, pea ke tou fakaʼaogaʼi tuʼumaʼu. ʼE tonu ke tou toe kole ʼi te ʼaho fuli te laumālie maʼoniʼoni ke tokoni mai kia tatou ʼi totatou minisitelio, pea mo tou faiga ke tou maʼu te ʼofa, te fua ʼaē ʼe maʼuhiga tāfito ʼo te laumālie. Pea ʼe tonu ke tou tuku ki te kautahi ʼa Sehova ʼaē ʼi te kele, ke ina akoʼi tatou ki te minisitelio ʼaki te ʼu fono.
3 Ko te ʼu akonaki ʼaē neʼe fai ʼi te Feliaono, ʼi te kupu tāfito “Tou Akoʼi Ia Tatou Mokā Tou Akoʼi Te Hahaʼi,” neʼe fakahā ai ʼe tonu ke tou tuku he faʼifaʼitaki lelei ʼo ʼuhiga mo (1) te mulimuli ki te ʼu lao ʼa te ʼAtua ʼi te ʼu faʼahi fuli ʼo te aga ʼaē ʼe tonu ke fai e he Kilisitiano, (2) te taupau ʼo te ʼu agamāhani ʼo ʼuhiga mo te ako, pea mo (3) te pulihi ʼo te ʼu aga pea mo te ʼu meʼa ʼi totatou loto pea mo totatou ʼatamai ʼaē ʼe feala ke fakaʼaogaʼi e te Tevolo. Pea neʼe tou ako te ʼu meʼa ʼe feala ke tou fai moʼo puipui totatou famili mai te faʼahi kua mafola ʼi te malamanei, te ʼu paki heʼeʼaoga. Neʼe fakaloto mālohiʼi te ʼu mātuʼa ke ʼaua naʼa nātou sioʼi he ʼu felāveʼi fakasino, tatau aipe peʼe ko he kiʼi temi nounou, pea ke nātou leʼoleʼo tanatou fānau mokā nātou fakaʼaogaʼi te Internet pea ka nātou sio televisio.
4 ʼI te akonaki fakamuli ʼo te ʼaho ʼaia, neʼe ʼāsili mālohi ai tatatou fakatotonu ʼaē ke tou taupau fakalelei te mālama ʼaē ʼe haʼu mai ia Sehova, ke tou mulimuli lelei ki te kalasi fakanofo agatonu ʼa te ʼAtua, pea mo tou lagolago ki te mafola ʼo te tokalelei ʼa te hahaʼi ʼa Sehova. Neʼe kua koutou lau koa te tohi fakamuli ʼaē neʼe tā, La prophétie dʼIsaïe, lumière pour tous les humains II.
5 ʼE Tou Popoto ʼi Te Akoʼi ʼo Te Hahaʼi: Ko te vaega tāfito ʼo te lua ʼaho neʼe ko 2 Timoteo 2:2. ʼI takotou fakalogo te ʼu akonaki ʼo te Moeaki uhu, neʼe koutou tokagaʼi koa te ʼu tokoni ʼaē neʼe ʼui ai peʼe feafeaʼi (1) hatatou kumi te hahaʼi ʼaē ʼe lelei tonatou loto, (2) hatatou taupau tanatou fia ʼiloʼi te moʼoni, pea mo (3) hatatou akoʼi nātou ke nātou mulimuli ki te ʼu meʼa ʼaē neʼe fakatotonu e Kilisito? Ka koutou ʼolo ʼo faka mafola, ʼe koutou maʼuliʼi koa te ʼu meʼa ʼaē neʼe koutou ako—ke koutou fakahā ki te hahaʼi he manatu faka Tohi-Tapu e tahi pea mo fakatuʼutuʼu te ʼaʼahi?
6 Neʼe fakahā ʼi te polokalama ʼo te hili hoʼatā te maʼuhiga ʼaē ke tou faʼifaʼitakiʼi te Faiako Lahi, ko Sesu. Koteā te ʼu faʼahi ʼaē ʼe koutou faiga ai ke koutou hage ko ia? ʼAki te meʼa ʼaē neʼe koutou ako ʼi te lua akonaki ʼo te ʼaho, ʼe lava feafeaʼi “Ke ʼAoga Lahi Kia Koutou Te Ako Faka Teokalatike”? Koteā te ʼu tokoni ʼaē neʼe koutou maʼuliʼi moʼo hikihiki takotou tokaga lelei ʼi takotou ako takitokotahi pea mo te ʼu fono?
7 ʼE mahino papau ia ko te tohi foʼou Tirez profit de l’École du ministère théocratique, ʼe tokoni anai kia tatou ke tuputupu tatatou poto ʼi te faiakonaki pea mo te akoʼi ʼo te Folafola ʼa te ʼAtua ki te hahaʼi. ʼE tou faiga tāfito anai ke tou hikihiki te lelei ʼo tatatou ʼu faiakonaki, he neʼe ko te fakaʼiloga ʼaia ʼo te ʼu kaugana agatonu ʼa te ʼAtua ʼo te temi muʼa. ʼI te ʼu kapite fuli ʼo te tohi foʼou ʼaia ʼe ʼi ai te kiʼi talanoa, ʼe fakahā nounou ai te meʼa ʼaē ʼe tonu ke tou fai, he koʼe ʼe maʼuhiga, pea ʼe feafeaʼi tona fai. ʼE tou toe maʼu ai mo he ʼu faʼifaʼitaki. ʼE maʼu e te ʼu tuagaʼane he ʼu faʼifaʼitaki e 29 ʼe feala ke nātou filifili ʼi tanatou faiakonaki. ʼAki te temi, ʼe fai anai he ʼu fetogi ʼi te fakaʼaluʼalu ʼo te ako. ʼE koutou ako koa pea mo teuteuʼi tuʼumaʼu te Ako ʼo Te Minisitelio Faka Teokalatike ke fua lelei kia koutou ʼi te vāhaʼa fuli?
8 ʼAki Te Temi, ʼe Tou Liliu Ko He Kau Faiako: Neʼe fakahā e te vaega ʼo Hepeleo 5:12 te ʼu manatu ʼaē ka vakaʼi ʼi te ʼAhotapu. Ko te ʼu akonaki ʼo te uhu ʼi te kupu tāfito “ ʼE Teuteuʼi Tatou e Te Lea Faka Polofeta ʼo Malakia Ki Te ʼAho ʼo Sehova,” neʼe ina uga tatou ke tou foaki te meʼa ʼaē ʼe lelei ki te ʼAtua pea ke tou fehiʼa ki te ʼu faʼahiga aga kākā fuape, ke feala hatatou hāo ʼi te ʼaho lahi pea mo fakamataku ʼa Sehova. Ko te kiʼi gaoʼi “Tou Fakaʼapaʼapa Ki Te Pule ʼa Sehova,” neʼe ina fakahā lelei mai pe neʼe taki feafeaʼi e te fialahi, te fia maʼu tuʼulaga, te mānumānu, pea mo te mole agatonu ʼo Kole pea mo tana hahaʼi ke nātou agatuʼu kia Sehova totonu. Ko te akonaki ʼaē neʼe hoa kiai, neʼe ina fakatokagaʼi tāfito ʼe tonu ʼi te temi nei ke fakalogo te ʼu famili pea mo te kokelekasio ki te takitaki ʼa te ʼAtua. Ko te akonaki ki te kaugamālie, ko tona kupu tāfito “Ko Ai ʼAē ʼe Ina Akoʼi Te Moʼoni Ki Te ʼAtu ʼu Puleʼaga?,” neʼe ina fakahā lelei ʼe ko te kau Fakamoʼoni ʼa Sehova ʼaē ʼe nātou fai te faʼahi ʼaia. ʼE mole hage ko te Keletiate, ʼaē ʼe nātou lau ʼaki pe tonatou gutu ʼe nātou akoʼi ki te hahaʼi te moʼoni ʼo te Tohi-Tapu.
9 ʼE hā lelei mai ʼe akoʼi tatou e Sehova ke tou liliu ko he kau faiako popoto ʼo tana Folafola. Tou maʼuliʼi te ʼu meʼa ʼaē neʼe akoʼi mai, ʼo tou ‘tokakaga tuʼumaʼu kia tatou pea mo tatatou faiako, ke feala hatatou hāofaki ia tatou, pea mo nātou ʼaē ʼe fakalogo mai kia tatou.’—1 Tim. 4:16.