Ko He Polokalama Foʼou ʼo Te Fakatahi Faka Silikosikilipisio
1 Ke mālohi tatatou tui ʼi te mālama maveuveu ʼaenī, ʼe tonu ke tou falala kia Sehova. ʼE tou lava fakahā feafeaʼi tatatou falala? ʼE hā feafeaʼi tatatou falala kia Sehova ʼi totatou maʼuli takitokotahi pea mo faka famili? ʼE tokoni feafeaʼi mai ia te falala ʼaia ke tou tauʼi te ʼu fakaneke ʼo te mālama ʼa Satana? Ko te polokalama ʼo te fakatahi faka silikosikilipisio ʼo te taʼu 2003, ʼe ina tali anai ki te ʼu fehuʼi ʼaia. Ko tona kupu tāfito “Falala Kia Sehova Pea Mo Fai Te Meʼa ʼAē ʼe Lelei.”—Pes. 37:3.
2 ʼE mole tou fakahā pe tatatou falala kia Sehova ʼi he ʼu lakaga makehe, peʼe ʼi te ʼu temi ʼaē ʼe tou felāveʼi ai mo he faigataʼaʼia. Kae ʼe tonu ke tou fakahā ʼi te ʼu faʼahi fuli ʼo totatou maʼuli. ʼE fakahā lelei te faʼahi ʼaia ʼi te ʼuluaki akonaki, “Tou Falala Kia Sehova ʼi Te Temi Fuli Pe.” (Pes. 62:8) Ko te ʼu akonaki e fā ʼi te kupu tāfito “Tou Fakahā Tatatou Falala Kia Sehova,” ʼe ina fakahā mai anai peʼe feafeaʼi hatatou maʼu pea mo maʼuliʼi te ʼu manatu faka Tohi-Tapu, ke fua lelei ai tatatou nofo ʼohoana, moʼo fakatokatoka te ʼu fihifihia ʼi te loto fale, pea mo tou ʼiloʼi te ʼu meʼa ʼaē ʼe ʼaoga kia tatou ʼi te faʼahi fakasino.
3 ʼE faiga mālohi e te mālama ʼa Satana ke tou maʼu te manatu hala ʼo ʼuhiga mo te meʼa ʼaē ʼe lelei pea mo ʼaē ʼe kovi, pea ke mole tou ʼiloʼi ai pe koteā ʼaē ʼe tonu ke fakamuʼamuʼa ʼi totatou maʼuli. (Isa. 5:20) Ko te ʼu akonaki “Tou Tokakaga Ki Te ʼu Meʼa Vaʼiganoa ʼo Te Maʼuli,” pea mo te akonaki “Tou Hola Mai Te Meʼa ʼAē ʼe Kovi—Kae Tou Fai Te Meʼa ʼAē ʼe Lelei,” ʼe fakaloto mālohi ai anai tatatou fakatotonu ke tou lagolago ki te ʼu lekula māʼoluga ʼa Sehova.—Amosi 5:14.
4 ʼI te temi ʼaē ka fakagata ai e Sehova te tuʼu ʼaenī, ʼe tonu anai ke falala katoa te kau kaugana ʼa te ʼAtua kia te ia. ʼE fakahā lelei te faʼahi ʼaia ʼi te akonaki ki te kaugamālie, ko tona kupu tāfito “Kua Ōvi Mai Te Faka ʼĀteaina Mai Te ʼu Mamahi ʼo Te Mālama ʼAenī.” Hili ʼaia, pea ʼe feala anai hatatou sivisivi ia tatou totonu ʼaki te akonaki “ ʼE Tāu Anai Koa Mo Koutou Ke Koutou Maʼu Te Puleʼaga ʼa Te ʼAtua?” ʼE fakaʼosi te polokalama ʼaki te tokoni ʼaē “Tou Falala Ki Te ʼu Fakapapau ʼa Sehova.”
5 ʼI te ʼu fakatahi fuli, ko te lakaga ʼaē ʼe maʼuhiga ʼe ko te akonaki ʼo te papitema. Ko nātou ʼaē ʼe fia papitema ʼe tonu ke nātou foimo fakahā te faʼahi ʼaia ki te taupau pelesita, ke feala ke fai te ʼu fakatuʼutuʼu ʼaē ʼe ʼaoga kiai.
6 ʼI te ʼu ʼaho fakamataku ʼaenī, ʼe ko Sehova tokotahi pe ʼaē ʼe feala ke tou falala ki ai koteʼuhi ʼe mole fetogi tana ʼu fakatuʼutuʼu. (Pes. 118:8, 9) ʼOfa pe ke toe mālohi age tatatou falala kia te ia ʼi tatatou kau ki te polokalama katoa ʼo te fakatahi faka silikosikilipisio.