Te Polokalama Foʼou ʼo Te ʼu Fakatahi Faka Silikosikilipisio

ʼE tou ʼiloʼi ʼe tāu mo Sehova ʼAtua ke tou ʼofa kia te ia pea mo tou tauhi ʼāteaina kia te ia. Kae ʼe faiga e te mālama ke ina fakahēʼi tatou, ke tou līaki tatatou ʼu felogoi lelei mo ia. (Soa. 17⁠:14) Ke tuputupu totatou ʼofa kia Sehova pea ke tou lotomālohi moʼo tekeʼi te ʼu meʼa ʼo te mālama ʼaē ʼe fakatupu tuʼutāmaki ki totatou maʼuli fakalaumālie, ko te polokalama foʼou ʼo te ʼu fakatahi faka silikosikilipisio ki te taʼu 2001 ʼe fēnei anai tona kupu tāfito “Koutou ʼOfa Ki Te ʼAtua​—⁠Kae ʼAua Naʼa Koutou ʼOfa Ki Te ʼu Meʼa ʼo Te Mālama.”​—⁠1 Soa. 2⁠:​15-17.

Ko tatatou ʼofa lahi kia Sehova, ʼe ina uga tatou ke tou fagonogono ʼo ʼuhiga mo ia. Kae maʼa te tokolahi ʼo te hahaʼi ʼo te ʼAtua, ʼe mole ko he meʼa faigafua te minisitelio. ʼI te koga ʼaē ko tona kupu tāfito “Ko Te ʼOfa Ki Te ʼAtua ʼe Ina Fakaloto Mālohiʼi Tatou ʼi Tatatou Minisitelio,” ʼe tou vakaʼi ai anai pe neʼe lava tauʼi feafeaʼi e te tokolahi tonatou umiuminoa, pea mo te tahi ʼu fihifihia ke feala hanatou kau katoa ki te gāue ʼaia.

ʼE malave feafeaʼi kia tatou te ʼu aga heʼeʼaoga ʼo te mālama? Ko te ʼu aga ʼaē neʼe koviʼia e te hahaʼi ki muʼa atu, ʼi te temi nei ʼe mole kei valokiʼi e te hahaʼi. Ko te akonaki “Ko Te Hahaʼi ʼAē ʼe ʼOʼofa Kia Sehova ʼe Nātou Fehiʼa Ki Te Meʼa ʼAē ʼe Kovi” pea mo te ʼu akonaki ʼaē ʼe fai ki te kupu tāfito ʼaenī “ ʼE Feafeaʼi Kia Koutou Te ʼu Meʼa ʼo Te Mālama?,” ʼe ina fakaloto mālohiʼi anai tatou ke tou haga fakafisi ki te ʼu holi kovi.

ʼE kau anai ki te polokalama, he faʼifaʼitaki ʼo ʼuhiga mo te Ako ʼo te Minisitelio Faka Teokalatike pea mo te Fono Gāue, pea mo he fakanounou ʼo te ako ʼo Te Tule Leʼo ʼo te vāhaʼa. Ko te Akonaki ki te Kaugamālie ʼaē ko tona kupu tāfito ʼaenī “ ʼE Mālo Feafeaʼi Te ʼOfa Pea Mo Te Tui ʼi Te Mālama,” ʼe ina fakaloto mālohiʼi anai tatou ke tou faʼifaʼitaki kia Sesu moʼo tekeʼi te ʼu fakahala ʼa te mālama. (Soa. 16⁠:33) Koutou fakaafe takotou ʼu ako Tohi-Tapu. Ko ia ʼaē ʼe fia papitema, ʼe tonu ke ina foimo fakahā ki te tagata taupau pelesita, ke ina fai he ʼu fakatuʼutuʼu ʼo ʼuhiga mo te faʼahi ʼaia.

Ko te fakatahi faka silikosikilipisio ʼaia, ʼe ina fakatokagaʼi mai anai pe koteā ʼaē ʼe tonu ke tou ʼofa tāfito kiai, ke feala hatatou maʼu te ʼu tapuakina lahi mai ia Sehova. Koia, koutou kau ki te polokalama katoa ʼaia!