Te Polokalama Foʼou ʼo Te Fakatahi Makehe ʼAho Tahi
1 Ko te ʼu sulunale, te televisio pea mo te hahaʼi faiako, ʼe nātou uga te hahaʼi ke nātou koloaʼia ʼi te faʼahi fakasino, kae ko te Folafola ʼa te ʼAtua ʼe ina uga tatou ke “Tou Koloaʼia ʼi He ʼu Gāue Lelei.” (1 Tim. 6:18) Ko te kupu tāfito ʼaia ʼo te polokalama ʼo te fakatahi makehe ʼaho tahi ʼaē ka kamata ʼi Sepetepeli ʼo te taʼu 2002. Koteā te ʼu fakaloto mālohi ʼaē ka foaki mai anai ʼi te fakatahi ʼaia?
2 ʼE fai anai te akonaki e te tagata taupau faka silikosikilipisio, ʼo ina fakamahino mai te faka ʼuhiga ke “Tou Koloaʼia Kia Mata ʼo Te ʼAtua,” pea ʼe ina fakafehufehuʼi anai ʼihi ʼe nātou faiga mālohi ke nātou maʼu he ʼu koloā fakalaumālie. ʼI tana ʼuluaki akonaki ʼo te ʼaho ʼaia, ko te tēhina ʼaē ʼe ina ʼaʼahi te fakatahi, ʼe ina fakahā anai te fakahoko e te hahaʼi ʼa te ʼAtua “Te ʼu Gāue Lelei ʼi Te Temi Taʼukai ʼAenī.” ʼE uga anai ia tatou fuli ke tou vakaʼi, peʼe tou lava fakalahi feafeaʼi tatatou kau ki te gāue ʼo te taʼukai ʼaē neʼe fakatotonu mai e te ʼAtua ke tou fakahoko ia ʼaho nei.
3 ʼE ko he meʼa fakafiafia hatatou sio ki te kau tūpulaga Kilisitiano ʼe nātou kumi he ʼu koloā fakalaumālie! ʼE ko he faka kolōlia ʼaia kia Sehova, pea ʼe tokoni te faʼahi ʼaia ki te kau tūpulaga ke nātou fakatuʼu he fakatafito lelei ki te ka haʼu, ʼo ʼuhiga mo te ʼu pilivilesio ʼo te gāue. Ko te akonaki “Tou Vikiʼi Te Kau Tūpulaga Ki Te ʼu Gāue Lelei ʼAē ʼe Nātou Fai Moʼo Fakavikiviki Kia Sehova,” ʼe ina fakahā anai te ʼu gāue lelei ʼaē ʼe fai e te kau tūpulaga Kilisitiano ʼo totatou telituale.
4 Koteā te ʼu fua ʼo hatatou fai he ʼu gāue lelei? Ko te tēhina ʼaē ka ina ʼaʼahi te fakatahi, ʼe talanoa anai ki te faʼahi ʼaia ʼi tana akonaki fakaʼosi, “Koutou Haga Fai He ʼu Gāue Lelei, Pea ʼe Tapuakina Anai Koutou e Sehova.” ʼE talanoa anai kia puani e fā ʼe feala ke tou maʼu ai he ʼu tapuakina: (1) kia tatou takitokotahi, (2) ʼi te famili, (3) ʼi te kokelekasio, pea (4) ʼi tatatou kautahi ʼi te malamanei katoa.
5 Ko nātou ʼaē kua nātou foaki tonatou maʼuli kia Sehova, ʼe feala anai ke nātou papitema. Kapau kua koutou fealagia, pea koutou foimo fakahā ki te taupau pelesita.
6 Ka fakahā atu te ʼaho ʼo takotou fakatahi, koutou foimo fai he ʼu fakatuʼutuʼu ke koutou kau kiai. Koutou faiga ke koutou ʼōmai fakatomuʼa ki te fakatahi ʼaia, ke feala hakotou kau ki te hiva ʼo te katiko pea mo te faikole ʼo te kamata. Ko tatatou ʼōmai ki te fakatahi pea mo tatatou fakalogo lelei lolotoga te polokalama katoa ʼo te ʼaho makehe ʼaia, ʼe ina fakaloto mālohi anai tatou ke tou haga hoko atu totatou maʼuli ʼaē ʼe ina fakaliliu tatou ke tou koloaʼia kia mata ʼo totatou ʼAtua, ia Sehova.