Te Tali Ki ʼAkotou ʼu Fehuʼi

◼ Ko te temi fea ʼaē ʼe lelei ai ke fakatuʼutuʼu he kiʼi kūtuga lea matāpule?

Kapau ʼi te telituale ʼa he kokelekasio, ʼe lahi ai te hahaʼi ʼe nātou palalau ki he tahi lea, pea ʼe faiga anai e te kau tagata ʼāfea ke nātou vakaʼi peʼe feafeaʼi hanatou fakatuʼutuʼu te gāue fai faka mafola ʼi te lea ʼaia. (Minisitelio Fakafalani ʼo Sūlio 2002 pasina 1; Minisitelio Fakafalani ʼo Fepualio 1998 pasina 3 ki te 4) ʼE lagi kaugamālie te faʼahiga hahaʼi ʼo te lea ʼaia ʼi te ʼu telituale ʼo te ʼu kokelekasio e lua peʼe laka atu. ʼI te taʼi ʼaluʼaga ʼaia, ʼe takitaki anai te faʼahi ʼaia e te (peʼe ko te ʼu) tagata taupau faka silikosikilipisio, ʼo tokoni ki te ʼu kokelekasio ke nātou fetokoniʼaki ʼi te gāue fai faka mafola. ʼI ʼihi temi, ʼe fai anai he akonaki ki te kaugamālie, peʼe ko he ako ʼo Te Tule Leʼo moʼo fakafuafua peʼe ko hahaʼi e fia ka nātou kau anai ki te ʼu fono ʼi te lea ʼaia.

ʼE feala anai ke fakatuʼutuʼu he kiʼi kūtuga ʼo he lea matāpule, mo kapau ʼe maʼu ai te ʼu faʼahi ʼaenī: (1) ʼE ʼi ai he kau fai faka mafola peʼe ko he ʼu hahaʼi ako ʼe nātou mahino lelei ki te logo lelei ʼi te lea ʼaia. (2) ʼE feala ki he tagata ʼāfea peʼe ko he tagata faifekau faka minisitelio ke ina takitaki, pea mo fai he fono tuʼa tahi ʼi te vāhaʼa. (3) E lotolelei e he kolesi ʼa he kau tagata ʼāfea ke nātou lagolago ki te kiʼi kūtuga ʼaia. Kapau ʼe koia ʼaia, pea ʼe tonu anai ki te ʼu tagata ʼāfea ke nātou fakahā ki te filiale, ke fakamoʼoni ki te kiʼi kūtuga ʼaia, pea ʼe fakahā anai he tahi ʼu faʼahi ʼo ʼuhiga mo te fakatuʼutuʼu ʼaia.

Ko te teitei kūtuga fuli, ʼe nātou kamata fai ʼi te vāhaʼa fuli te Ako Tohi. Ki muli age, ʼe tali anai e te kau tagata ʼāfea ke fai he tahi ʼu fono, ohage ko te Akonaki Ki Te Kaugamālie, pea mo te Ako ʼo Te Tule Leʼo. Ko te akonaki 2, 3, mo te 4 ʼo te Ako ʼo Te Minisitelio Faka Teokalatike, ʼe lava fai ʼi he tahi kalasi mo kapau ʼe lava fai tokoni ai he tagata ʼāfea peʼe ko he tagata faifekau faka minisitelio ʼe nā ʼiloʼi lelei te lea. Kae ko te kiʼi kūtuga ʼaia ʼe kau fakatahi anai mo te kokelekasio ki te ʼuluaki akonaki, ki te ʼu puani maʼuhiga, pea mo te Fono Gāue. ʼE toe lava foki ki te kiʼi kūtuga ʼaia ke fakatuʼutuʼu hanatou ʼu ʼaho fai faka mafola.

Ko te kiʼi kūtuga katoa ʼaia ʼe nātou gāue ʼo mulimuli ki te takitaki ʼa te kolesi ʼa te kau tagata ʼāfea. ʼE tonu ki te kau tagata ʼāfea ke nātou fai he ʼu tokoni ʼe fakafuafua lelei, pea ke nātou vakavakaʼi fakalelei te ʼu faʼahi ʼaē ʼe ʼaoga ki te kiʼi kūtuga ʼaia. Mokā ʼaʼahi e te tagata taupau te kokelekasio ʼaē ʼe tokaga ki te kiʼi kūtuga ʼaia, ʼe ina fai anai he ʼu fakatuʼutuʼu ke gāue fakatahi mo te kiʼi kūtuga ʼaia, moʼo fakaloto mālohiʼi nātou ʼi te faʼahi fakalaumālie. ʼAki te tapuakina ʼa Sehova, ʼe liliu anai ʼi he temi te kiʼi kūtuga lea matāpule ʼaia ko he kokelekasio.