Te Letelete—ʼE Ko He Faigamālie Koa Ki He Gāue ʼe Lahi Age?
1 Tokolahi te hahaʼi ʼaē ʼe gāue kinakina ʼe nātou fakaʼamu ki te temi letelete, ʼaē ka nātou ʼāteaina ai mai te faigataʼa pea mo te ʼu fakaneke ʼo te gāue. Kae ʼi te agamāhani, ko te hahaʼi ʼaē ʼe letelete ʼe mole kei nātou fiafia, mole kei nātou fai he meʼa, pea ʼe nātou matutuʼa vave. Kapau ko he tahi ʼe mole ina fai he ʼu gāue ʼe ʼaoga pea ʼe feala ke liliu ʼo tuʼania fau kia ia. Neʼe fakamatala ʼi te nusipepa ʼo Pelesile ko te hahaʼi ʼaē neʼe letelete neʼe nātou meo ʼo ʼuhiga mo tanatou ‘mole kei fiafia, tanatou ʼitaʼita, mo tanatou matataku, tanatou mole kei ʼaoga, mo tonatou loto hoha, pea mo tanatou mole kei fai ʼo he ʼu fakatuʼutuʼu ʼi tonatou maʼuli.’
2 Kae ko te fetogi ʼaia, ʼe ko he faigamālie maʼa te tokolahi ʼo te kau Kilisitiano ke nātou fakatuputupu tanatou ʼu gāue fakalaumālie. Ko te tēhina neʼe kamata pionie hili vāhaʼa e lua ʼi tona taʼu 65, neʼe ina ʼui fēnei: “Neʼe mole heʼeki ʼau ʼiloʼi ʼi toku maʼuli he temi feiā neʼe lahi ai te ʼu tapuakina ʼi te ʼu taʼu e hogofulu ʼaenī kua hili ʼo taku gāue pionie.” Neʼe tohi fēnei e te taumatuʼa: “Ko te ʼu taʼu ʼaē neʼe maʼuhiga moʼoni kia māua, neʼe kamata ʼi te temi ʼaē neʼe ma pionie ai.” Ei, maʼa te tokolahi, ko te letelete ʼe ko te faigamālie ʼaia moʼo fakalahi tonatou minisitelio pea mo maʼu he ʼu tapuakina lahi mai ia Sehova.
3 Koutou Maʼumaʼua Tuʼumaʼu Pea Mo Maʼu He ʼu Fua ʼi Takotou Gāue: Tokolahi ia nātou ʼaē kua letelete ʼi te temi nei, neʼe nātou lahilahi ake kae neʼe mole honatou ʼu koloā ohage ko te temi ʼaenī, pea talu mai tanatou kei liliki neʼe nātou ako te gāue kinakina. Logola ʼe mole kei nātou maʼu te mālohi ʼo te temi tūpulaga, kae ʼe kei fua lelei tanatou gāue. ʼI te tahi filiale, ko te 22 ʼi te teau ʼi te kau pionie—ko te ʼu tēhina mo tuagaʼane e toko 20 000—ʼe nātou teitei taʼu 60. Ko te ʼu hahaʼi matutuʼa ʼaia ʼe nātou tokoni ʼaupito ki te gāue fai faka mafola. Ko tanatou kua māhani ki te ʼu ʼaluʼaga ʼo te maʼuli pea mo tanatou ʼu kalitate fakaʼatua ʼe fua lelei ki te kokelekasio ʼaē ʼe nātou gāue ai.—Skp. 3:17, 18.
4 Ko te maʼumaʼua tuʼumaʼu ʼi te minisitelio faka Kilisitiano ʼe feala ke maʼu ai te mālohi pea ʼe ina hikihiki te maʼuli. Ko te tuagaʼane ʼe taʼu 84 neʼe kamata pionie ʼi tana letelete, neʼe ina ʼui fēnei: “Ko taku ako te Tohi-Tapu mo te ʼu hahaʼi tokolahi ʼe nātou fia ʼiloʼi te moʼoni, neʼe tokoni mai ke ʼau gāueʼi tuʼumaʼu taku fakakaukau. ʼE mole haku motokā, koia ʼe lahi taku haʼele lalo, pea ʼe ʼau mālohi ai.” Neʼe ʼui fēnei e te taumatuʼa pionie kua matutuʼa: “ ʼAki te selevisi pionie, ʼe ma mālolohi ai ʼi te faʼahi fakasino pea ʼi te faʼahi ʼo te fakakaukau. ʼE ma fakatahi tuʼumaʼu, pea ʼe lahi te ʼu temi ʼe ma pa kokolo ai pea mo fiafia ai.”
5 Koutou ʼOlo Ki Te ʼu Faʼahi ʼAē ʼe ʼAoga Kiai He Kau Gāue: Ko ʼihi Kilisitiano letelete ʼaē ʼe mole honatou fihifihia ʼi te faʼahi ʼo te paʼaga, neʼe nātou fia ʼolo ʼo gāue ʼi te ʼu faʼahi ʼaē ʼe ʼaoga lahi ai he kau fai faka mafola ʼo te Puleʼaga. Ko ʼihi neʼe nātou fakalahi tanatou minisitelio ʼo nātou ʼolo ʼo gāue ʼi he telituale ʼe mole ko he ʼu hahaʼi ʼo tonatou lea. Ohage ko te ʼapositolo ko Paulo, ko te kau fai faka mafola faʼafai ʼaia ʼe nātou “fai ia mea fuli aia uhi ko te Evaselio, ke [nātou] mau ai [honatou] vaega.”—1 Ko. 9:23.
6 Ko te taumatuʼa neʼe nā kamata pionie ʼi tanā ʼosi taupau tanā ʼu tama e lua. Hili ni ʼu taʼu ʼaē neʼe nā pionie ai, neʼe nā kamata ako te lea faka Siaina. ʼI tanā kua taʼu 70 tupu, neʼe nā fiafia ʼi tanā sio ʼaē kua liliu ko he kokelekasio, te kiʼi kūtuga lea faka Siaina ʼaē neʼe nātou gāue fakatahi. ʼE liliu te ʼu taumatuʼa feiā ko he ʼu tapuakina lahi!
7 ʼE Mole He Letelete ʼi Te Minisitelio: Logola ʼe letelete ki muli age te hahaʼi tokolahi mai tanatou gāue, kae ʼe mole he letelete maʼa he Kilisitiano ʼi te selevisi ki te ʼAtua. Ko tatou fuli ʼe tonu ke tou haga nonofo agatonu ʼo aʼu ki “te fakaʼosi.” (Mat. 24:13, 14, MN ) ʼE mahino ia, ʼuhi ko tanatou kua matutuʼa, ko ʼihi ʼe mole kei feala ke nātou gāue lahi ohage ko tanatou fai ʼi te temi muʼa ʼi te selevisi kia Sehova. Kae ʼe ko he meʼa fakaloto mālohi tatatou sio ʼaē kia nātou ʼe nātou gāue fakamalotoloto ʼaki tonatou loto katoa! ʼE ʼui papau e te Folafola ʼa te ʼAtua kia nātou, ko Sehova ʼe mole ina galoʼi anai tanatou gāue pea mo te ʼofa ʼaē neʼe nātou fakahā ki tona huafa.—Luka 21:1-4; Hep. 6:10.
8 Kapau kua koutou vave letelete, he koʼe koa ʼe mole koutou fakakaukauʼi ʼi te faikole peʼe lava feafeaʼi hakotou fakaʼaogaʼi lelei te fetogi ʼaia ʼo tokotou maʼuli? ʼAki te tokoni ʼa te ʼAtua, ʼe feala ke koutou fakaʼaogaʼi te temi letelete ohage ko he faigamālie ke lahi age takotou gāue ʼaē ʼe ina fakavikiviki ai Sehova pea mo koutou maʼu ai he ʼu tapuakina lahi.—Pes. 148:12, 13.