He ʼu Manatu ʼo ʼUhiga Mo Te ʼu Nusipepa

Te Tule Leʼo ʼaho 1 ʼo Sūnio

“ ʼE lahi te ʼu fakamatala ʼe nātou talanoa ai ʼo ʼuhiga mo te fakaʼaogaʼi kovi ʼo te falā ʼaē neʼe foaki e te hahaʼi, pea ʼe ʼi ai ʼihi hahaʼi ʼe nātou fia ʼiloʼi peʼe lelei koa hanatou foaki he ʼu meʼa ʼofa ki te ʼu kautahi ʼaē ʼe tokoni ki te hahaʼi faigataʼaʼia. Tahi ʼaē meʼa e hahaʼi ia nātou ʼaē ʼe maʼuʼuli ʼi te faigataʼaʼia. ʼI tau manatu, koteā ʼaē ʼe feala ke tou fai? [Tuku ke fai mai hana tali. Pea koutou lau age ia Hepeleo 13:16.] ʼE fakamahino mai e te nusipepa ʼaenī te faʼahiga foaki ʼaē ʼe leleiʼia e te ʼAtua.”

Réveillez-vous ! ʼaho 8 ʼo Sūnio

“Ia ʼaho nei, ʼe hage ʼe mole kei maʼuhiga ki te hahaʼi te ʼu aga ʼaē ʼe lelei pea mo tonu ke fai, ohage ko tanatou fai ʼi te temi muʼa. ʼE ke sio koa ki te hoko ʼo te faʼahi ʼaia? [Tuku ke fai mai hana tali.] ʼE lelei hatatou fakatokagaʼi neʼe fakakikite e te Tohi-Tapu te faʼahi ʼaia. [Lau age ia 2 Timoteo 3:​1-5.] Ko te Réveillez-vous ! ʼaenī ʼe talanoa ki te tupuʼaga ʼo te fetogi ʼaia ʼo te ʼu aga pea mo te meʼa ka hoko ʼi te ka haʼu.”

Te Tule Leʼo ʼaho 15 ʼo Sūnio

“ ʼE manatu e ʼihi ko Sesu neʼe ko te tagata ʼaē neʼe lahi tokotahi ʼi te hisitolia. Ko ʼihi ʼe nātou fia ʼiloʼi pe neʼe maʼuli moʼoni koa. ʼI tau manatu, ʼe maʼuhiga koa te ʼu meʼa ʼaē ʼe tou tui kiai ʼo ʼuhiga mo ia? [ʼI tana ʼosi tali atu, koutou lau age ia Gaue 4:​12.] Koteā te fakamoʼoni ʼe tou maʼu ko Sesu neʼe maʼuli moʼoni ʼi te kele? ʼE tali te nusipepa ʼaenī ki te fehuʼi ʼaia.”

Réveillez-vous ! ʼaho 22 ʼo Sūnio

“Tokolahi te hahaʼi ʼe nātou tuʼania ʼo ʼuhiga mo te kele. ʼI tau manatu, ʼe feala anai koa ke taupau te ʼu vao matuʼa ʼo te malamanei ʼaē ʼe ʼua lahi ai? [Tuku ke fai mai hana tali.] ʼE fakamatala e te nusipepa ʼaenī te ʼu faiga ʼa te tagata moʼo hāofaki te ʼu vao matuʼa ʼaia. ʼE toe fakahā ai peʼe hoko feafeaʼi anai te fakapapau taulekaleka ʼaenī ʼa te ʼAtua.” Koutou lau age ia Isaia 11:9.