Te Polokalama Foʼou ʼo Te Fakatahi Makehe ʼAho Tahi

ʼE lahi te ʼu fakamatala kua maʼu ʼi te temi nei ʼo ʼuhiga mo te taupau ʼo totatou mafu ke haohaoa pea ke tou maʼuli fiafia pea ke tou maʼuli fualoa. Kae ʼe maʼuhiga age te agaaga ʼo totatou mafu fakatātā peʼe ko totatou loto fakalaumālie. Koia ʼe tō lelei te kupu tāfito ʼo te polokalama ʼo te fakatahi makehe ʼaho tahi, ʼaē ka kamata anai ʼi te māhina ʼo Sepetepeli ʼo te taʼu 2003: “Tou Tauhi Kia Sehova Mo He Loto Katoa.” (1 Fkma. 28:9) Koteā ʼapē te ʼu meʼa ʼaē ka tou akoʼi ʼi te fakatahi ʼaia?

ʼE fai anai e te taupau faka silikosikilipisio te akonaki “Tou Tokoni Ki Te Hahaʼi Ke Nātou Tauhi Kia Sehova ʼAki He Nefesi Fiafia.” ʼE fakahāhā anai e te ʼu fakafehuʼi ia te fiafia ʼe maʼu mai te ʼaʼahi ʼo te hahaʼi ʼaē ʼe fia logo, pea mo te fai ʼo he ʼu ako Tohi-Tapu mo he ʼu hahaʼi ʼe nātou fia tauhi kia Sehova. ʼE mahino ia ko nātou fuli ʼaē ka kau anai ki te fakatahi, ʼe nātou maʼu anai he fīmālie pea mo he fakaloto mālohi ʼaki te ʼuluaki akonaki ʼo te tēhina ʼaē ka ina ʼaʼahi te fakatahi pea ʼe fēnei tona kupu tāfito, “Tou Hāofaki Totatou Loto ʼi He Malamanei Tokakovi.” ʼE fakaʼosi anai te polokalama ʼo te uhu ʼaki te akonaki ʼo te papitema.

ʼI te hili hoʼatā, ʼe tou vakavakaʼi anai ʼaki te akonaki “Tou Fakalahi Tatatou Tokoni” peʼe feafeaʼi hatatou tokoni ki niʼihi. Koteā ʼaē ʼe lava fai e te ʼu mātuʼa moʼo puipui te loto ʼo tanatou fānau mai te ʼu fakaneke kovi pea mo tokoni kia nātou ke nātou fakaōvi kia Sehova? ʼI te akonaki ko tona kupu tāfito ʼaenī “Tou Tokoni Ki Tatatou Fānau Ke Nātou Fakafiafia Ia Sehova,” ʼe tuku mai anai he ʼu tokoni ʼaoga, pea mo fakahāhā mai anai peʼe feafeaʼi hatatou lava fai te faʼahi ʼaia.

ʼE tou fakaʼaogaʼi koa te ʼu meʼa fuli ʼe foaki mai e Sehova moʼo taupau totatou loto ke haohaoa pea mo mālohi ʼi te faʼahi fakalaumālie? ʼI te akonaki fakaʼosi ʼo te tēhina ka ina ʼaʼahi te fakatahi ʼaē ko tona kupu tāfito “Tou Taupau Maʼu Totatou Loto Ke Katoa ʼi Tatatou Tauhi Kia Sehova,” ʼe faka maʼuhigaʼi ai anai he ʼu koga tāfito e fā ke tou taupau ai totatou maʼuli fakalaumālie. ʼE lahi koa totatou temi pea mo tatatou ʼu faiga ki te faikole fakamalotoloto, mo te ako ʼo te Folafola ʼa te ʼAtua, mo te fai faka mafola, pea mo tou fakatahi mo ʼihi Kilisitiano? ʼE feala koa hatatou hikihiki he faʼahi ʼi te ʼu faʼahi ʼaia?

ʼE fai mai te fakaafe ʼaenī e Sehova: “ ʼAumai tou loto ki te akonaki, pea mo tou taliga ki te ʼu folafola ʼo te ʼatamai mālama.” (Taag. 23:12) ʼO kamata atu nei, koutou fakatuʼutuʼu ke koutou kau ki te ʼaho maʼuhiga ʼaia ʼaē ka tou ako ai te Tohi-Tapu. Kapau ʼe koutou fai feiā, pea ʼe fakaloto mālohiʼi anai koutou ke koutou haga tauhi kia Sehova mo he loto katoa pea mo he nefesi fiafia.