Te Tali Ki ʼAkotou ʼu Fehuʼi
◼ Ko te ʼu lakaga fea ʼaē ʼe lava kau ai te ʼu fānau ʼa te ʼu mātuʼa Kilisitiano ki te fai faka mafola, ʼi muʼa ʼo tanatou liliu ko he ʼu kaugā fagona?
Ko te ʼu mātuʼa Kilisitiano ʼe nātou loto ke tuputupu tanatou fānau ʼo aʼu ki tanatou liliu ko he ʼu kaugana ʼa Sehova ʼe aga fakapotopoto pea mo faiva. (1 Sam. 2:18, 26; Luka 2:40) Tatau aipe peʼe kei liliki, kae ko te ʼu fānau ʼa he ʼu mātuʼa Kilisitiano ʼe tonu ke nātou popoto ʼi te fakahā fakaleleiʼi tanatou tui ʼaē ʼe fakatafito ki te Tohi-Tapu. ʼE tuputupu vave te fānau ʼi te faʼahi fakalaumālie mokā nātou kaugā fai faka mafola mo tanatou ʼu mātuʼa ʼi tanatou kei liliki. Kae maʼa te kau tūpulaga, ʼe maʼuhiga ke haʼu te faʼahi ʼaia mai tonatou loto ke feala ai hanatou leleiʼia te fai faka mafola, mo nātou fia liliu ko he ʼu kaugā fagona, pea mo hoko atu tanatou kau ki te gāue ʼaē ko te faka mafola ʼo te Puleʼaga. ʼE maʼua ke akoʼi fakalelei nātou e tanatou ʼu mātuʼa. (1 Tim. 4:6; 2 Tim. 2:15) Ko ʼihi kau fai faka mafola faiva ʼe feala ʼi ʼihi temi ke nātou fai faka mafola mo te ʼu fānau ʼaia, mo kapau ʼe lotolelei kiai te ʼu mātuʼa.—Vakaʼi te tohi Notre ministère, ʼi te pasina 100-101.
Ka ʼolo te ʼu fānau ʼaē ʼe lelei tanatou aga ʼo kaugā gāue mo tanatou ʼu mātuʼa ʼi te ʼu ʼapi, pea ʼe nātou ako ai peʼe feafeaʼi te fai faka mafola. Kae ʼe mole faka ʼuhiga leva ʼe ko he ʼu kaugā fagona, ʼi muʼa ʼo hanatou fealagia ʼi te faʼahi ʼaia. ʼE vakavakaʼi anai e te ʼu mātuʼa te ʼu lakaga ʼaē ʼe feala ai ki he tamasiʼi ke fai faka mafola, mokā nātou kaugā gāue fakatahi. Ko te ʼu fānau ʼaē ʼe mole heʼeki liliu ko he ʼu kaugā fagona, ʼe mole tonu ke nātou fai tokotahi te ʼu ʼaʼahi peʼe nātou kaugā ʼolo mo he tahi tamasiʼi ki te fai faka mafola. ʼE feala ke teuteuʼi e te ʼu mātuʼa tanatou fānau ki te fai faka mafola pea mo tuku ke nātou kau ki he ʼu ʼaluʼaga kehekehe ʼo te fai faka mafola, ohage ko te lau ʼo he vaega, te foaki ʼo he kiʼi pepa lotu peʼe ko he nusipepa, peʼe ko te fakahā ʼo he paki ʼi tatatou ʼu tohi. ʼI te lahilahi ake ʼa te tamasiʼi, ʼe feala ke lahi age tana kau ki te fai palalau.
Kapau ʼe akoʼi lelei te fānau, pea ʼe nātou ʼiloʼi ai te maʼuhiga ʼo te minisitelio, mo nātou tali te ʼu fakatuʼutuʼu ʼo tanatou ʼu mātuʼa pea mo nātou faiga ke lelei tanatou aga. ʼE mole tonu ki te ʼu mātuʼa ke nātou ʼave tanatou ʼu fānau ʼaē mole ko he ʼu kaugā fagona ki te ʼu fono ʼo te fai faka mafola, ʼo nātou tuku ke tokaga ki ai ʼihi. Ko te ʼu mātuʼa ʼaē ʼe tokakaga ki tanatou fānau, ʼe nātou ʼiloʼi ʼe ko tonatou maʼua ke nātou vakavakaʼi te gāue ʼo tanatou fānau. ʼE moʼoni, ʼe lagi lotolelei anai ʼihi kau fai faka mafola aga fakapotopoto, ke nātou tokoni ki te ako ʼo te fānau ʼi te kokelekasio ʼaē ʼe nātou loto moʼoni ke nātou tauhi kia Sehova ʼi te minisitelio.