ʼE Kotou Fakatuatuai Koa ʼi Tona Tohi?
Koteā ʼaē ʼe tonu ke kotou tohi? Ko te kate ʼo te toto Instructions médicales/Directives anticipées (DPA) ʼaē ʼe foaki ki te kau Fakamoʼoni ʼaē kua papitema. Mai tona ʼaluʼaga ʼaē “ ʼe mole kotou ʼiloʼi peʼe feafeaʼi anai tokotou ʼapogipogi,” ʼe maʼuhiga ai ke kotou fai fakatomuʼa he tonu pea mo tohi te ʼu faitoʼo ʼaē ʼe kotou tali anai mo kapau ʼe tonu ke foimo faitoʼo koutou. (Sake 4:14; Gāue 15:28, 29) Moʼo tokoni atu, neʼe fai ia te foʼi ʼata Soigner sans transfuser — Besoins et droits du patient. Kotou sioʼi ia te foʼi ʼata ʼaia pea ʼi te faikole, kotou fakakaukauʼi te ʼu meʼa neʼe kua kotou ako ʼaki te ʼu fehuʼi ʼaē ʼe tuʼu ʼi lalo.—Fakatokaga: ʼE fakahā te ʼu tafa ʼi te ʼata ʼaia, koia ʼe tonu ke vakaʼi e te ʼu mātuʼa peʼe feala anai ki tanatou ʼu fānau ʼaē kei liliki ke natou sioʼi te foʼi ʼata ʼaia.
(1) He koʼē neʼe toe vakaʼi e ʼihi tōketā te fakaʼaogaʼi ʼo te ʼu foʼi huki toto? (2) Kotou fakahā te ʼu tafa faigataʼa e tolu neʼe feala ke fai kae ʼe mole fakaʼaogaʼi ai te toto. (3) Ko te ʼu tōketā e tokofia neʼe natou tali lelei ke mole natou fakaʼaogaʼi te toto ʼi tanatou ʼu fai tafa? He koʼē ʼe natou tali lelei ke natou fai te ʼu faʼahiga tafa ʼaia? (4) Koteā te ʼu mahino foʼou fakatōketā ʼaē kua maʼu ʼo ʼuhiga mo te fakaʼaogaʼi ʼo te toto? (5) Koteā ʼaē ʼe feala ke hoko mokā fakaʼaogaʼi te ʼu foʼi huki toto? (6) Koteā te manatu ʼa te tokolahi ʼo te hahaʼi popoto ʼo ʼuhiga mo te ʼu lelei ʼo te ʼu faitoʼo ʼaē ʼe natou fetogi te ʼu foʼi huki toto? (7) Koteā ʼaē ʼe tupu ai te mole lahi ʼo te ʼu globules kula ʼi te sino? ʼE feala ke hifo ʼo fia te ʼu globules kula pea mole fua kovi anai ki te sino? Koteā ʼaē ʼe feala ke fai moʼo tokoni ki te sino ke ina maʼu he puleʼaki ki te faʼahi ʼaia? (8) ʼE lava fakahake feafeaʼi te ʼu globules kula ʼi te sino ʼo ia ʼaē ʼe mahaki? (9) Koteā ʼaē ʼe fakaʼaogaʼi ke mole lahi te puli ʼo te toto ʼi te tafa? (10) Ko te ʼu faitoʼo ʼaē ʼe fakaʼaogaʼi moʼo fetogi te ʼu foʼi huki toto ʼe feala koa ke fakaʼaogaʼi ki te ʼu kihiʼi tamaliki peʼe ki ni ʼu hahaʼi ʼe leletakiʼi ki te lōpitali heʼe tuʼutāmaki tonatou maʼuli, ohagē ko te ʼu hahaʼi ʼaē neʼe fakaʼī? (11) Koteā te ʼu lēkula tāfito ʼaē ʼe tonu ke mulimuli kiai te hahaʼi taupau mahaki? (12) He koʼē ʼe maʼuhiga ke filifili fakatomuʼa e te kau Kilisitiano he faitoʼo ʼe mole fakaʼaogaʼi ai te toto? ʼE lava feafeaʼi hatatou fai ia te faʼahi ʼaia?
Ko te tali ʼo te ʼu faitoʼo ʼaē ʼe fakahā ʼi te foʼi ʼata, ʼe fakalogo kiā tātou takitokotahi, ʼo mulimuli ki totatou leʼo ʼo loto ʼaē neʼe akoʼi ʼaki te Tohi-Tapu. Kua kotou fai koa he tonu ʼo ʼuhiga mo te ʼu faitoʼo ʼaē kā kotou tali anai maʼa koutou pea mo takotou ʼu fānau pea mo kotou tohi ai takotou kate ʼo te toto (DPA)? Kapau ʼe kotou fia maʼu he tahi ʼu manatu ʼo ʼuhiga mo te ʼu faʼahi ʼaia, kotou lau fakalelei ia te kāpite 7 ʼo te tohi “Te ʼOfa ʼo Te ʼAtua” pea mo te ʼu tohi ʼaē ʼe feala ke kotou ʼolo ʼo vakaʼi, ʼaē ʼe fakahā ʼi te kāpite ʼaia. Kotou toe vakaʼi mo te pepa ʼaē ʼe ʼalutahi mo Te Minisitelio ʼo Te Puleʼaga ʼo Novepeli ʼo te taʼu 2006, ʼaē ko tona kupu tāfito “Koteā Taku Manatu ʼo ʼUhiga Mo Te ʼu Kihiʼi Koga ʼAē ʼe Toʼo Mai Te ʼu Koga Tāfito ʼo Te Toto Pea Mo Te ʼu Faitoʼo ʼAē ʼe Fakaʼaogaʼi Kiai Toku Toto?” Pea kotou vakaʼi fakalelei peʼe totonu takotou tohi ki takotou kate ʼo te toto (DPA) ia te ʼu faitoʼo ʼaē neʼe kotou filifili ke fai kiā koutou. ʼE tonu ke kotou fakamahino kātoa ia te ʼu tonu ʼaē neʼe kotou tukupau kiai kiā nātou ʼaē neʼe kotou tohi tonatou ʼu higoa ʼi takotou foʼi kate toto, pea mo he tahi pē ʼi tokotou fāmili ʼe mole ko he Fakamoʼoni ʼa Sehova.
[Paki ʼo te pasina 3]
• Kua kotou filifili koa ia te ʼu faitoʼo pea mo te ʼu tafa ʼaē ʼe kotou tali maʼa koutou pea mo takotou fānau?
• ʼE kotou ʼave koa mo koutou ia takotou kate ʼo te toto (DPA) kua tohi kātoa mo kapau lā ʼe tonu ke foimo faitoʼo koutou?