ʼE Kotou ʼIloʼi Koa Ia Te ʼu Faitoʼo ʼAē ʼe Feala Ke Fai Atu?
Kua lahi ia te ʼu lōpitali ʼi te mālamanei kua tafa ai ia te hahaʼi kae mole fakaʼaogaʼi kiā nātou ʼaia ia te toto. Kua kotou ʼiloʼi koa pea mo mahino kātoa ki te ʼu faitoʼo ʼaē ʼe kotou lava maʼu kae ʼe mole fakaʼaogaʼi ai te toto? ʼE tonu ke kotou ʼiloʼi ia te ʼu faitoʼo ʼaia, ke feala ai hakotou toʼo ia he ʼu tonu kua kotou ʼiloʼi pea mo mahino ai ki te faitoʼo pea mo te tafa ʼaē kā fai kiā koutou. Kotou sioʼi ia te foʼi ʼata Pas de sang : la médecine relève le défi. ʼOsi leva, ʼi te faikole kotou toe vakaʼi ia te ʼu meʼa ʼaē neʼe kotou ako ʼaki te ʼu fehuʼi ʼaē ʼe tuʼu ʼi lalo.—Fakatokaga: Mai tona ʼaluʼaga ʼaē, ko te foʼi ʼata ʼe fakahā fakanounou ai ia te ʼu fai tafa, ʼe tonu anai ki te ʼu mātuʼa ke natou fakatokaga mokā natou sioʼi mo tanatou ʼu fānau ʼaē kei liliki.
(1) Koteā te tupuʼaga tāfito ʼaē ʼe mole tali ai e te kau Fakamoʼoni ʼa Sehova te ʼu foʼi huki toto? (2) Koteā te ʼu faitoʼo ʼaē ʼe loto kiai te kau Fakamoʼoni ʼa Sehova? (3) Koteā te meʼa ʼaē ʼe feala ke kole e ia ʼaē ʼe mahaki? (4) He koʼē ʼe ko he aga fakapotopoto te filifili ʼo te ʼu faitoʼo ʼaē ʼe natou fetogi te ʼu foʼi huki toto? (5) Kā lahi fau te toto ʼaē neʼe puli, koteā te ʼu ʼuluaki faʼahi maʼuhiga e lua ʼe tonu ke fai e te kau tōketā? (6) Koteā te ʼu faʼahiga fakatuʼutuʼu faitoʼo e fā moʼo fetogi te ʼu foʼi huki toto? (7) Koteā ʼaē ʼe lava fai e te kau tōketā (a) moʼo fakasiʼisiʼi te hali ʼo te toto, (b) moʼo taupau te ʼu globules rouges, (c) moʼo fakatuputupu ke lahi te toto, pea (d) ke toe maʼu kātoa te toto ʼaē neʼe puli? (8) Fakamatala te ʼu agaaga ʼo te ʼu faitoʼo ʼaē (a) ko te hémodilution pea mo (b) te récupération de sang épanché. (9) Koteā ʼaē ʼe tonu ke fakahā atu ʼo ʼuhiga mo te ʼu faitoʼo ʼaē ʼe natou fetogi te ʼu foʼi huki toto? (10) ʼE feala koa ke fai he ʼu tafa lalahi pea mo faigataʼa ʼe mole fakaʼaogaʼi ai te ʼu foʼi huki toto? (11) Koteā te manatu lelei kua maʼu e te kau tōketā?
Ko te tali ʼo he ʼu faitoʼo neʼe tou sio kiai ʼi te foʼi ʼata, ʼe tahi fakalogo pē kiā kita takitokotahi, ʼo tahi mulimuli pē ki tona leʼo ʼo loto ʼaē neʼe akoʼi ʼaki te Tohi-Tapu. Kua kotou tukupau koa ki he tonu ʼo ʼuhiga mo he ʼu faitoʼo ʼe kotou tali ke fai kiā koutou pea mo takotou fānau, pea mo kotou tohi ki takotou kiʼi kate toto? Ke kātoa ia takotou mahino ki te ʼu ʼaluʼaga ʼaia, kotou toe lau fakalelei ia te ʼu ʼalatike “Te ʼu Fehuʼi ʼa Te Kau Lautohi” ʼo Te Tule Leʼo ʼo te ʼaho 15 ʼo Sūnio 2004, pea mo ʼaē ʼo te ʼaho 15 ʼo ʼOketopeli 2000. ʼOsi ʼaia, toe lau mo te ʼalatike ʼo te pepa ʼaē neʼe tufa tahi mo Te Minisitelio ʼo Te Puleʼaga ʼo Novepeli 2006, “Koteā Taku Manatu ʼo ʼUhiga Mo Te ʼu Kihiʼi Koga ʼAē ʼe Toʼo Mai Te ʼu Koga Tāfito ʼo Te Toto Pea Mo Te ʼu Faitoʼo ʼAē ʼe Fakaʼaogaʼi Kiai Toku Toto?” moʼo fai hakotou ʼu tonu ʼo ʼuhiga mo te ʼu faitoʼo ʼaē ʼe kotou tali anai peʼe kotou fakafisi anai kiai. Ki muli age leva, kotou tohi fakalelei ʼi takotou kiʼi kate toto ia te ʼu meʼa ʼaē ʼe kotou loto kiai. ʼE tonu ke kotou fakamahino kātoa ia te ʼu tonu ʼaē neʼe kotou tukupau kiai kiā nātou ʼaē neʼe kotou tohi tonatou ʼu higoa ʼi takotou kiʼi kate toto, pea mo he tahi pē ʼi tokotou fāmili ʼe mole ko he Fakamoʼoni ʼa Sehova.
[Paki ʼo te pasina 3]
• Kua kotou ʼiloʼi koa ia te ʼu faitoʼo ʼaē ʼe kotou tali anai peʼe kotou fakafisi anai kiai maʼa koutou totonu pea mo takotou fānau?
• ʼE ʼi ai koa hakotou kiʼi kate toto kua tohi kātoa kiai ia te ʼu faitoʼo ʼaē ʼe kotou loto kiai mokā hoko kiā koutou he tuʼutāmaki fakapunamaʼuli?