ʼE Kotou Fakatuatuai Koa ʼi Tona Tohi?

Koteā ʼaē ʼe tonu ke kotou tohi? Ko te tohi ʼo te foʼi kate toto Instructions médicales/Directives anticipées (DPA) ʼaē ʼe foaki ki te kau Fakamoʼoni ʼaē kua papitema. ʼUhi ʼaē “ ʼe mole kotou ʼiloʼi peʼe feafeaʼi anai tokotou ʼapogipogi,” ʼe maʼuhiga ke kotou fai fakatomuʼa he tonu pea mo tohi te ʼu faitoʼo ʼaē ʼe kotou tali anai mokā ʼe tonu ke fai fakavilivili kiā koutou he faitoʼo. (Sake 4:14; Gāue 15:28, 29) Moʼo tokoni atu, neʼe fai ia te ʼata Soigner sans transfuser — Besoins et droits du patient. Kotou sioʼi ia te foʼi ʼata ʼaia pea ʼi te faikole, kotou fakakaukauʼi te ʼu meʼa neʼe kua kotou ako ʼaki te ʼu fehuʼi ʼaē ʼe tuʼu ʼi lalo.—Fakatokaga: ʼUhi ʼaē ʼe hā ʼi te ʼata ʼaia te ʼu tafa, ʼe tonu ke vakaʼi e te ʼu mātuʼa peʼe feala anai ki tanatou ʼu fānau ʼaē kei liliki ke natou sioʼi te ata ʼaia.

(1) He koʼē neʼe toe vakaʼi e ʼihi tōketā te fakaʼaogaʼi ʼo te ʼu foʼi huki toto? (2) Kotou fakahā te ʼu tafa faigataʼa e tolu neʼe feala ke fai kae ʼe mole fakaʼaogaʼi ai te toto. (3) Ko te ʼu tōketā e tokofia neʼe natou tali lelei ke mole natou fakaʼaogaʼi te toto ʼi tanatou ʼu fai tafa? He koʼē ʼe natou tali lelei ke natou fai te ʼu faʼahiga tafa ʼaia? (4) Koteā te ʼu mahino foʼou fakatōketā ʼaē kua maʼu ʼo ʼuhiga mo te fakaʼaogaʼi ʼo te toto? (5) Koteā ʼaē ʼe feala ke hoko mokā fakaʼaogaʼi te ʼu foʼi huki toto? (6) Koteā te manatu ʼa te tokolahi ʼo te hahaʼi popoto ʼo ʼuhiga mo te ʼu faitoʼo ʼaē ʼe natou fetogi te ʼu foʼi huki toto? (7) Koteā ʼaē ʼe tupu ai te mole lahi ʼo te ʼu globules kula ʼi te sino? ʼE feala ke hifo ʼo fia te ʼu globules kula pea mole fua kovi anai ki te sino? Koteā ʼaē ʼe feala ke fai moʼo tokoni ki te sino ke ina maʼu he puleʼaki ki te faʼahi ʼaia? (8) ʼE feafeaʼi ke lava hake te ʼu globules kula ʼi te sino ʼo ia ʼaē ʼe mahaki? (9) Koteā ʼaē ʼe fakaʼaogaʼi ke mole lahi te puli ʼo te toto ʼi te tafa? (10) Ko te ʼu faitoʼo ʼaē ʼe fakaʼaogaʼi moʼo fetogi te ʼu foʼi huki toto ʼe feala koa ke fakaʼaogaʼi ki te ʼu kihiʼi tamaliki peʼe ki ni ʼu hahaʼi ʼe leletakiʼi ki te lōpitali heʼe tuʼutāmaki tonatou maʼuli, ohagē ko te ʼu hahaʼi ʼaē neʼe fakaʼī? (11) Koteā te ʼu lēkula tāfito ʼaē ʼe tonu ke mulimuli kiai te hahaʼi taupau mahaki? (12) He koʼē ʼe maʼuhiga ke filifili fakatomuʼa e te kau Kilisitiano he faitoʼo ʼe mole fakaʼaogaʼi ai te toto? ʼE feafeaʼi hatatou fai ia te faʼahi ʼaia?

Ko te tali ʼo te ʼu faitoʼo ʼaē ʼe fakahā ʼi te ʼata ʼe ʼa tātou takitokotahi te vakaʼi te faʼahi ʼaia, ʼo mulimuli ki totatou leʼo ʼo loto ʼaē neʼe akoʼi ʼaki te Tohi-Tapu. Kua kotou fai koa he tonu ʼo ʼuhiga mo te ʼu faitoʼo ʼaē kā kotou tali anai maʼa koutou pea mo takotou ʼu fānau? Kapau ʼe kotou fia maʼu he tahi ʼu manatu ʼo ʼuhiga mo te ʼu faʼahi ʼaia, kotou vakaʼi ia te ʼalatike “Te ʼu Fehuʼi ʼa Te Kau Lautohi” ʼi Te Tule Leʼo ʼo te ʼaho 15 ʼo Sūnio 2004 pea mo te ʼaho 15 ʼo ʼOketopeli 2000, pea mo te pepa neʼe tufa tahi mo Te Minisitelio ʼo Te Puleʼaga ʼo Novepeli ʼi te taʼu 2006, ʼaē ko tona kupu tāfito “Koteā Taku Manatu ʼo ʼUhiga Mo Te ʼu Kihiʼi Koga ʼAē ʼe Toʼo Mai Te ʼu Koga Tāfito ʼo Te Toto Pea Mo Te ʼu Faitoʼo ʼAē ʼe Fakaʼaogaʼi Kiai Toku Toto?” ʼE tonu ke kotou fakamahino kātoa ia te ʼu tonu ʼaē neʼe kotou tukupau kiai kiā nātou ʼaē neʼe kotou tohi tonatou ʼu higoa ʼi takotou foʼi kate toto, pea mo he tahi pē ʼi tokotou fāmili ʼe mole ko he Fakamoʼoni ʼa Sehova.