Ko He ʼAta ʼe Ina Fakahā Lelei Te Maʼuhiga ʼo Te Faʼahiga Tafa Kua Fai
ʼAki te temi, ʼe tali e te kau tōketā ia te manatu pea mo te ʼu meʼa ʼaē fakamaʼua age e te hahaʼi māhahaki. Neʼe maʼu ai te ʼu faitoʼo pea mo te ʼu manatu foʼou, ʼe feala ke fua lelei ki te kau Fakamoʼoni ʼa Sehova. (Gaue 15:28, 29) Ko te faʼahi tāfito ʼaia ʼaē ʼe talanoa kiai te ʼata Soigner sans transfuser—Besoins et droits du patient. Koutou sioʼi te ʼata ʼaia pea mo toe vakavakaʼi te ʼu meʼa ʼaē neʼe koutou ako.—Fakatokaga: ʼUhi ʼaē ʼe hā ʼi te ʼata ʼaia he ʼu tafa, ʼe tonu ke vakaʼi e te ʼu mātuʼa peʼe feala anai ki tanatou ʼu fānau ʼaē kei liliki ke nātou sioʼi te ʼata ʼaia.
(1) He koʼe neʼe toe vakaʼi e ʼihi tōketā te fakaʼaogaʼi ʼo te ʼu foʼi huki toto? (2) Koutou fakahā te ʼu tafa faigataʼa e tolu ʼe feala ke fai kae mole fakaʼaogaʼi te toto. (3) Ko kau tōketā e tokofia neʼe nātou tali lelei ke mole nātou fakaʼaogaʼi te toto ʼi tanatou ʼu fai tafa? He koʼe ʼe nātou tali lelei te ʼu faʼahiga tafa ʼaia? (4) Koteā te ʼu mahino foʼou faka tōketā ʼaē kua maʼu ʼo ʼuhiga mo te fakaʼaogaʼi ʼo te toto? (5) Koteā ʼaē ʼe feala ke hoko mokā fakaʼaogaʼi te ʼu foʼi huki toto? (6) Koteā te manatu ʼa te tokolahi ʼo te hahaʼi popoto ʼo ʼuhiga mo te ʼu faitoʼo ʼaē ʼe nātou fetogi te ʼu foʼi huki toto? (7) Koteā ʼaē ʼe tupu ai te mole lahi ʼo te ʼu globules kula ʼi te sino? ʼO aʼu ki te ʼu globules kula e fia ʼe mole fua kovi anai ki te sino? Koteā ʼaē ʼe feala ke fai moʼo tokoni ki te sino ke ina maʼu he puleʼaki ki te faʼahi ʼaia? (8) ʼE lava fakatuputupu feafeaʼi te ʼu globules kula ʼi te sino ʼo ia ʼaē ʼe mahaki? (9) Koteā ʼaē ʼe fakaʼaogaʼi ke mole lahi te hali ʼo te toto ʼi te tafa? (10) Ko te ʼu faitoʼo ʼaē ʼe fakaʼaogaʼi moʼo fetogi te ʼu foʼi huki toto ʼe feala koa ke fakaʼaogaʼi maʼa te ʼu kihiʼi tamaliki peʼe ki ni hahaʼi ʼe leletakiʼi ki te lōpitali heʼe tuʼutāmaki tonatou maʼuli, ohage ko te ʼu hahaʼi ʼaē neʼe fakaʼī? (11) Koteā te ʼu lēkula tāfito ʼaē ʼe tonu ke mulimuli kiai te hahaʼi taupau mahaki? (12) He koʼe ʼe maʼuhiga ke filifili fakatomuʼa e te kau Kilisitiano he faitoʼo ʼe mole fakaʼaogaʼi ai te toto? E feafeaʼi hatatou fai ia te faʼahi ʼaia?
Ko te tali ʼo te ʼu faitoʼo ʼaē ʼe fakahā ʼi te ʼata ʼe ʼa tatou takitokotahi te vakaʼi te faʼahi ʼaia, ʼo mulimuli ki totatou leʼo ʼo loto ʼaē neʼe akoʼi ʼaki te Tohi-Tapu. ʼE kua koutou filifili koa maʼa koutou pea mo takotou fānau, he ʼu faitoʼo moʼo fetogi ʼaki te ʼu foʼi huki toto? Ko nātou ʼaē ʼe mole ko he kau Fakamoʼoni ʼi tokotou loto fale, ʼe tonu mo nātou ke nātou ʼiloʼi lelei te ʼu meʼa ʼaē kua tou filifili pea mo fakamahino age tona tupuʼaga.—Vakaʼi “Te ʼu Fehuʼi ʼa Te Kau Lautohi” ʼi te ʼu Tule Leʼo ʼo te ʼaho 15 ʼo Sūnio 2004 pea mo te ʼaho 15 ʼo ʼOketopeli 2000.