Tou Faʼifaʼitakiʼi Te Manatu ʼa Sesu
1. Ko te manatu fea ʼaē neʼe maʼu e Sesu?
1 Logola neʼe mole heʼeki tou sio kia Sesu, te ʼAlo ʼo te ʼAtua, kae kua tou ʼofa moʼoni kia ia, he neʼe tou lau te ʼu fakamatala ʼo tona maʼuli pea mo tona minisitelio ʼi te Tohi-Tapu. (1 Pet. 1:8) ʼI tana fakalogo ki te finegalo ʼo tona Tāmai, neʼe ina tuku tana tuʼulaga māʼoluga ʼaē ʼi selo, kae haʼu ki te kele. ʼI tana tupu tagata, neʼe fakafisi kia ia totonu, kae tauhi ki te hahaʼi pea mo ina foaki tona maʼuli moʼo hāofaki ia te malamanei. (Mat. 20:28) ʼE uga fēnei tatou e te Folafola ʼa te ʼAtua: “Koutou taupau te manatu ʼaē neʼe toe maʼu foki e Kilisito Sesu.” ʼE tou lava faʼifaʼitaki feafeaʼi tana manatu faka sakilifisio?—Filp. 2:5-8, MN.
2. Koteā te faigataʼaʼia ʼe tau mo te kau Kilisitiano tokolahi, pea koteā ʼaē ʼe lava tokoni kia nātou?
2 Kapau ʼe Tou Gaʼegaʼe: Logola ko Sesu neʼe haohaoa, kae neʼe ʼi ai te ʼu temi neʼe gaʼegaʼe ai. ʼI te tahi lakaga, neʼe ina fai te fagonogono loaloaga ki te fafine Samalitana, logola neʼe kua “gaʼegaʼe ʼi te fagona.” (Soa. 4:6, MN ) Ia ʼaho nei, ʼe lahi te kau Kilisitiano ʼe nātou tau mo te faigataʼaʼia ʼaia. Hili te vāhaʼa neʼe tou gāue kinakina ai, ʼe lagi faigataʼa hatatou maʼu he mālohi ke tou kau ki te gāue fai faka mafola. Kae kapau ʼe tou kau tuʼumaʼu ki te gāue, pea ʼe tou sio anai ko te minisitelio faka Kilisitiano ʼe ina fakaloto mālohiʼi tatou ʼi te faʼahi fakalaumālie.—Soa. 4:32-34.
3. ʼE tou lava faʼifaʼitaki feafeaʼi kia Sesu, ʼi tana tali lelei ke ina ako te hahaʼi?
3 ʼI te tahi ʼaho, neʼe ʼalu ia Sesu mo tana kau tisipulo ki he potu lāvaki ke feala ai hanatou mālōlō. Kae neʼe ʼiloʼi e te tokolahi te koga meʼa ʼaē neʼe nātou ʼolo kiai, pea neʼe nātou feleleʼi ʼo muʼamuʼa ia nātou. Neʼe mole ʼita ai ia Sesu kia nātou, kae “neʼe ʼofa mamahi kia nātou” pea neʼe ina kamata “akonaki kia nātou te ʼu meʼa lahi.” (Mko. 6:30-34, MN ) ʼE tonu ke tou maʼu he manatu feiā mo kapau ʼe tou fia kamata pea mo fai he ʼu ako Tohi-Tapu. ʼE tonu ke tou faiga mālohi pea mo ʼofa moʼoni ki te hahaʼi. Kapau ʼe mole heʼeki koutou maʼu hakotou ako Tohi-Tapu, koutou haga faiga ke koutou maʼu hakotou ako.
4. ʼE lava tokoni feafeaʼi mai te selevisi pionie ke tou faʼifaʼitaki te manatu ʼa Kilisito?
4 Koutou Fakamuʼamuʼa Te ʼu Meʼa Fakalaumālie: Ko te selevisi pionie vaeluaʼi temi ʼe lava tokoni mai ke tou fakamuʼamuʼa tāfito te ʼu meʼa fakalaumālie. Neʼe faitohi fēnei te tuagaʼane kei finemui: “Ko te faʼe ʼo taku kaumeʼa fafine, neʼe ina fakaloto mālohiʼi māua ke ma pionie vaeluaʼi temi mo ia lolotoga he māhina. ʼE ʼau fiafia ʼaupito ʼi taku kau mo ia ki te gāue ʼaia. Kua ʼau feʼiloʼiʼaki lelei mo te ʼu tēhina mo tuagaʼane, pea kua nātou hage ko hoku famili. Tahi ʼaē meʼa, neʼe lahi te ʼu lakaga neʼe ʼau maʼu ke ʼau palalau mo te hahaʼi ʼo ʼuhiga mo Sehova pea mo akoʼi kia nātou te ʼu moʼoni taulekaleka ʼo te Puleʼaga. Ko te ʼu faʼahi fuli ʼaia neʼe tokoni mai kia ʼau ke ʼau ōvi ʼaupito kia Sehova pea mo tana kautahi.”—Pes. 34:8.
5. He koʼe ʼe tonu ke tou haga faiga ke tou faʼifaʼitakiʼi te manatu ʼa Sesu?
5 ʼE tou kau fuli ki te tau ʼo te kakano agahala pea mo totatou holi ʼaē ke tou fakafiafia ia Sehova. (Loma 7:21-23) ʼE tonu ke tou tekeʼi te manatu ʼa te mālama, ʼaē ko te fia maʼuli fakafīfīmālie. (Mat. 16:22, 23) ʼAki tona laumālie maʼoniʼoni, ʼe lava tokoni mai ia Sehova ke tou mālo ʼi te faʼahi ʼaia. (Kal. 5:16, 17) ʼI tatatou fakatalitali ke tou hū ki te mālama foʼou ʼaē neʼe fakapapau mai e te ʼAtua, tou faʼifaʼitaki ki te manatu ʼa Sesu, ʼo tou fakamuʼamuʼa te ʼu gāue ʼo te Puleʼaga pea mo tatatou ʼofa ki te hahaʼi.—Mat. 6:33; Loma 15:1-3.