Te Tali Ki ʼAkotou ʼu Fehuʼi

◼ ʼE tonu ke tou maʼu feafeaʼi te ʼu Tule Leʼo pea mo te ʼu Réveillez-vous !?

Kua fuafualoa te fakagata ʼo te apone ki te ʼu nusipepa pea mo te ʼu foʼi kaseti ʼo Te Tule Leʼo pea mo te Réveillez-vous !, koia ʼe tonu ai ki te kau fai faka mafola fuli ke nātou toʼo tanatou ʼu nusipepa, mo te ʼu foʼi kaseti, pea mo te ʼu pa fakatagi MP3 ʼi tanatou kokelekasio. Gata pe ki te ʼu nusipepa pea mo te ʼu foʼi kaseti maʼa te hahaʼi kivi, ʼe momoli kia nātou ʼaē ʼe ʼaoga kiai. Koutou tokagaʼi, ko te ʼu kokelekasio ʼe feala ke nātou fakaʼui te ʼu nusipepa ʼaē kua puke ʼi te ʼu foʼi kaseti peʼe ko te ʼu pa fakatagi MP3 ʼi te pepa Fakaʼui ʼo Te Kokelekasio (M-202). ʼE toe fakaʼaogaʼi anai te pepa ʼaia moʼo fakaʼui he ʼu nusipepa ʼi he tahi lea peʼe ko te ʼu nusipepa ʼaē ʼe mataʼi tohi lalahi.

Kapau ʼe kole atu e he tahi ʼi takotou telituale ke koutou foaki age te ʼu nusipepa, pea koutou manatuʼi ʼo foimo ʼave hana ʼu nusipepa. Ko te hahaʼi ʼaē kua fakamavae ʼe feala ke nātou maʼu te ʼu nusipepa peʼe ko te tahi ʼu tohi ʼi te tufaʼaga tohi ʼo te Fale ʼo Te Puleʼaga. Ko nātou kua fakamavae ʼe mole tonu ke kau ia nātou ʼaē ʼe koutou ʼolo tuʼumaʼu ʼo ʼave kiai hanatou ʼu nusipepa.

Ko te ʼu apone ʼaē ka fai pe anai e te filiale ʼi Amelika, ʼe ko nātou ʼaē ʼe mole feala ke ʼave hanatou ʼu nusipepa e he kaugā fai faka mafola ʼo te kokelekasio. Kapau ʼe fakaʼui e te Komite Gāue ʼo Te Kokelekasio he apone maʼa he tahi ʼe mole feala ke ina maʼu te ʼu nusipepa ʼi he tahi age faʼahi, pea ʼe tonu ki te sikalaipe ke ina fai he tohi nounou ʼe fakahā ai neʼe kua vakaʼi pea mo tali te apone ʼaia e te Komite Gāue ʼo Te Kokelekasio.

Ko tona faka ʼuhiga ʼe mole tonu ki te ʼu kaugā fai faka mafola ke nātou faitohi ki te filiale moʼo fai he ʼu apone. ʼE toe fakaliliu anai ki te kokelekasio te ʼu apone ʼaē ʼe fai e he ʼu kaugā fai faka mafola peʼe ko he tahi ʼe ina fia logo.

◼ ʼE lava maʼu feafeaʼi te ʼu nusipepa e he tahi ʼe nofo ʼi te fale pilisoni?

Kapau ko te kokelekasio ʼaē ʼe fai faka mafola ʼi te fale pilisoni ʼe feala ke ina foaki te ʼu nusipepa ki te kau pilisoni, pea ʼe feala ke foaki e he ʼu kaugā fai faka mafola te ʼu nusipepa Te Tule Leʼo pea mo te Réveillez-vous ! mokā nātou ʼolo ʼo fai faka mafola ai. Kapau ʼe mole feala, pea ʼe feala kia ia ʼaē ʼe pilisoni ke faitohi ki te filiale ke fai hana apone. ʼE feala ke toe fai feiā pe maʼa nātou ʼaē neʼe fakamavae kae nātou fia maʼu hanatou ʼu nusipepa.