Ko He Fai Faka Mafola Makehe Moʼo Tufa ʼo Te Kaupepa Lahi Foʼou
1 Tokolahi te hahaʼi ia ʼaho nei ʼe nātou tuʼania ʼo ʼuhiga mo te ʼu ʼaluʼaga ʼo te malamanei, kae tokosiʼi ʼe nātou mahino ki te tupuʼaga ʼo te feiā ʼo te malamanei, mo te meʼa ʼaē ka hoko ʼi te ka haʼu, pea mo te meʼa ʼaē ʼe tonu ke nātou fai ke nātou hāo ʼi te fakamāu ka hoko mai. (Esk. 9:4) Moʼo tokoni kia nātou ke nātou mahino ki te faka ʼuhiga ʼo totatou temi, ʼe fakahoko anai ia he fai faka mafola makehe moʼo tufa ʼo te kaupepa lahi foʼou Veillez ! (Koutou Nonofo ʼAlaʼala!) ʼaē ka kamata anai ʼi te Mōnite ʼaho 18 ʼo ʼOketopeli ki te ʼAhotapu ʼaho 14 ʼo Novepeli.
2 ʼE feala ke tufa te kaupepa lahi ʼaia ʼi te fai faka mafola ʼi te ʼu ʼapi, mokā tou fai tatatou ʼu ʼaʼahi, ʼi te fai fagonogono faigamālie, peʼe ʼi te telituale ʼo te ʼu fale gāue. Kae ʼe mole tonu ke tufa fakavalevale te kaupepa lahi Veillez ! ʼE tonu pe ke tuku he kaupepa lahi kia nātou ʼaē ʼe nātou fia ʼiloʼi moʼoni te ʼu meʼa ʼaē ʼe ʼui ʼi te Tohi-Tapu ʼo ʼuhiga mo te fakamahinohino ʼo te ʼu meʼa ʼaē ʼe hoko ʼi te malamanei. ʼE feala ke tuku age he kiʼi pepa lotu kia nātou ʼaē ʼe mole faʼa fia logo ki te logo ʼaē ʼe tou tala.
3 ʼE feala hakotou uga he tahi ke fia logo mo kapau ʼe koutou ʼui fēnei:
◼ “Tokolahi ʼe nātou tuʼania ʼo ʼuhiga mo te ʼu fihifihia lahi pea mo te ʼu meʼa fakalialia ʼaē kua hoko māhani ia ʼaho nei. [Koutou talanoa ki he fihifihia neʼe hoko ʼe ʼiloʼi lelei ʼi te telituale.] ʼE koutou ʼiloʼi koa ko te ʼu meʼa ʼaia neʼe fakakikite ʼi te Tohi-Tapu? [Tuku ke fai mai hana tali. Pea koutou lau age he vaega faka Tohi-Tapu ʼe ʼalutahi mo te fihifihia ʼaē neʼe koutou talanoa kiai, ohage ko Mateo 24:3, 7, 8; Luka 21:7, 10, 11; peʼe ko 2 Timoteo 3:1-5.] ʼE fakahā mai ʼi te Tohi-Tapu te faka ʼuhiga ʼo totatou temi pea koteā ʼaē ka hoko anai ki te malamanei. ʼE ke fia ʼiloʼi he tahi age ʼu meʼa? [Tuku ke fai mai hana tali. Koutou tuku age te kaupepa lahi mo kapau neʼe koutou sio ʼe ina fia lau moʼoni.] ʼE mole totogi te kaupepa lahi ʼaenī. Kapau ʼe ke fia foaki mai he kiʼi meʼa ʼofa ki tamatou gāue ʼaē ʼe fai ʼi te malamanei katoa, pea ʼe mātou tali fakafiafia anai.”
4 Peʼe feala ke koutou ʼui fēnei:
◼ “Tokolahi ia ʼaho nei ʼe nātou hoha ʼuhi ko te ʼu meʼa fakamataku ʼaē ʼe hoko peʼe ko te ʼu meʼa fakaʼofaʼofa ʼe hoko kia tatou takitokotahi. Ko ʼihi ʼe nātou feʼekeʼaki pe koʼe ʼe mole tāʼofi e te ʼAtua te ʼu meʼa ʼaia ke ʼaua naʼa hoko. ʼE ʼui papau mai ʼi te Tohi-Tapu kua vave hoko mai te temi ʼaē ka pulihi anai e te ʼAtua te ʼu mamahi ʼo te malamanei. Koʼeni te ʼu tapuakina ʼaē ka foaki anai e te ʼAtua ki te malamanei. [Lau ia Pesalemo 37:10, 11.] ʼE ke fia ʼiloʼi he tahi age ʼu meʼa?” Koutou fakaʼosi ʼaki te ʼu palalau fakaʼosi ʼo te faʼifaʼitaki ʼaē ʼe tuʼu ʼi ʼoluga.
5 Koutou fehuʼi age te higoa pea mo te tuʼasila ʼo te hahaʼi fuli ʼaē ʼe nātou toʼo hanatou kaupepa lahi, pea koutou fakatuʼutuʼu ke koutou ʼaʼahi nātou moʼo taupau tanatou fia logo. ʼI Te Minisitelio ʼo Te Puleʼaga ʼo Novepeli 2004, ʼe koutou maʼu ai anai he ʼu tokoni moʼo fai ʼo te ʼaʼahi. Kapau ʼi takotou ʼuluaki fai palalau mo he tahi, ʼe hā ai tana fia logo, ʼe feala ke koutou kamata he ako Tohi-Tapu ʼi te temi pe ʼaia, ʼo koutou fakaʼaogaʼi te kaupepa lahi Veillez ! peʼe ko he tahi age tohi, ohage ko te kaupepa lahi Fakamaʼua.
6 ʼE maʼu anai te ʼu kaupepa lahi foʼou ʼi te ʼosi pe ʼo te Fono Gāue ʼaē ka vakaʼi ai te alatike ʼaenī. ʼE kole ki te kau fai faka mafola pea mo te kau pionie ke nātou ʼuluaki toʼo muʼa te ʼu kaupepa lahi ʼaē ʼe ʼaoga anai kia nātou, ʼi te ʼu ʼuluaki ʼaho ʼaē ka kamata ai te fai faka mafola makehe ʼaia. ʼOfa pe ke tapuakina e Sehova te gāue makehe ʼaia ʼaē ka fai moʼona fakavikiviki pea mo fua lelei ki te hahaʼi ʼaē ʼe loto moʼoni ʼi te ʼu potu fuli pe.—Pes. 90:17.