Tou Fakafetaʼi Ki Te Lotoʼofa ʼo Sehova
ʼi Te Fakamanatu ʼo Te Mate ʼo Kilisito ʼi Te ʼAho 24 ʼo Malesio
1. Neʼe fakahā feafeaʼi e Sehova ia tona lotoʼofa ʼaē kiā tatou?
1 Neʼe ʼui fēnei e te tagata fai pesalemo: “Ê! Ke tou fakafetaʼi kiā Sehova ki tona lotoʼofa pea mo tana ʼu gāue fakaofoofo ki te ʼu foha ʼo te tagata.” (Pes. 107:8) ʼE lahi ʼaupito ia te lotoʼofa ʼo Sehova ki te hahaʼi. Pea ʼe ʼasi lelei ia te faʼahi ʼaia ʼi te fakavikiviki ʼaenī: “Neʼe haga lagolago ai tou lotoʼofa kiā te au, Ê Sehova.” (Pes. 94:18) ʼI tana foaki tona ʼAlo ulutokotahi maʼa tatou, neʼe fakahā ai e Sehova tona lotoʼofa lahi ʼaē kiā tatou!—1 Soa. 4:9, 10.
2. ʼE tou lava fakahā feafeaʼi ia totatou loto fakafetaʼi ʼaē kiā Sehova?
2 ʼI te fakaōvi mai ʼo te ʼAho Fakamanatu ʼo te mate ʼo Kilisito, e feafeaʼi hatatou fakahā ʼe tou loto fakafetaʼi ki “te lotoʼofa ʼo te ʼAtua”? (Pes. 59:17) ʼE tou faiga fuli anai ke tou maʼu he temi moʼo metitāsioʼi te ʼu meʼa ʼaē neʼe fai e Sesu ʼi te ʼu ʼaho fakamuli ʼo tona maʼuli ʼaē ʼi te kele. (Pes. 143:5) ʼE lelei anai hatatou toe lau te ʼu vaega faka Tohi-Tapu ʼaē neʼe fakatuʼutuʼu ki te ʼAho Fakamanatu, ʼaē ʼe tuʼu ʼi te kaupepa Tou Vakaʼi Ia Te Tohi-Tapu ʼi Te ʼAho Fuli—2005, pea kapau ʼe feala, tou toe lau anai pea mo fai he ʼu kumi ʼi te ʼu kapite 112 ki te 116 ʼo te tohi Te tagata ʼaē ʼe lahi tokotahi ʼo te ʼu temi fuli pea mo te tahi ʼu tohi faka Tohi-Tapu. Koutou metitāsio fakalelei ki te ʼu vaega ʼaē neʼe koutou lau, pea mo koutou faiga ke koutou mahino lelei kiai. (1 Tim. 4:15) ʼI takotou fakakaukauʼi ʼaē ʼaki te faikole ia te Folafola ʼa te ʼAtua, ʼe koutou fafaga ai tokotou ʼu loto pea ʼe koutou toe fakahā ai tokotou ʼofa ʼaē kiā Sehova.—Mat. 22:37.
3, 4. (a) ʼE tou lava faʼifaʼitakiʼi feafeaʼi totatou ʼu tēhina ʼaē ʼi Lipelia? (b) Ko ai ʼaē neʼe kua koutou fakatuʼutuʼu ke koutou fakaafe ki te ʼAho Fakamanatu?
3 Tou Uga Niʼihi Ke Nātou Fakafetaʼi Ki Te ʼAtua: ʼI te taʼu kua hili, ko te toko 16 760 607 ʼi te malamanei kātoa neʼe nātou kau ki te ʼAho Fakamanatu. ʼI te kolo ʼo Lipelia, neʼe faitohi te ʼu tēhina ki te pule kolo, ʼo fakahā ki ai tanatou fakatuʼutuʼu ʼaē ke nātou fai ʼi tona kolo ia te toʼotoʼoga ʼo te Taumafa ʼo Te ʼAliki. Neʼe fakagafua e te pule kolo ke fakaʼaogaʼi e te ʼu tēhina te malaʼe ʼaka moʼo fai te toʼotoʼoga ʼaia pea neʼe ina fakaʼiloʼilo ʼi te kolo pea mo fakaafe ia te hahaʼi ke ʼōmai kiai. Logola ʼi te kolo ʼaia neʼe ko te toko nima kau fai mafola pe, kae neʼe ʼōmai te toko 636 hahaʼi ki te ʼAho Fakamanatu!
4 ʼO toe feiā mo tatou, ʼe tou fia tokoni ki he tokolahi ke nātou ʼōmai ʼo fakatahi mo tatou ki te toʼotoʼoga ʼaia. He koʼe ʼe mole koutou tohi ki he lisi te ʼu higoa ʼo nātou fuli ʼaē ʼe koutou fia fakaafe? Ko te ʼu pāki ʼaē ʼe tuʼu ʼi te tuʼa pasina fakaʼosi ʼo Te Tule Leʼo ʼo te ʼaho 15 ʼo Malesio, ʼe fai ai te ʼu fakaafe ki te ʼAho Fakamanatu. ʼE feala ke toe fakaʼaogaʼi mo te ʼu kiʼi pepa fakaafe ʼo te ʼAho Fakamanatu. Koutou tohi ʼaki he masini tā peʼe koutou tohi nima ia te hola pea mo te faʼahi ʼaē ʼe fai ai te toʼotoʼoga, ʼo koutou foaki age ki te hahaʼi ʼaē ʼe koutou fakaafe. ʼI te ōvi mai ʼo te ʼaho 24 ʼo Malesio, koutou toe ʼolo ʼo fakamanatuʼi ki te hahaʼi pea mo koutou fai ni ʼu fakatuʼutuʼu ʼe tukupau ki te faʼahi ʼaia.
5. ʼE tou lava fakaloto mālohiʼi feafeaʼi te kau ako Tohi-Tapu ke nātou kau ki te ʼAho Fakamanatu?
5 ʼE tou lava tokoni feafeaʼi ki te kau ako Tohi-Tapu ʼaē ʼe mole heʼeki nātou kau ki te ʼu fono, ke nātou maʼu mo nātou ia te ʼu lelei ʼo te toʼotoʼoga ʼaia? ʼI te ʼu temi ʼaē ʼe koutou fai ai tanatou ʼu ako, koutou fakamahino age ia te maʼuhiga ʼaē ke nātou kau ki te toʼotoʼoga ʼaia. Koutou fakaʼaogaʼi mo te tahi ʼu manatu ʼi Te Tule Leʼo ʼo te ʼaho 15 ʼo Malesio 2004 ʼi te pasina 3 ki te 7, pea mo te tohi Comment raisonner ʼi te ʼu pasina 241 ki te 245.
6. He koʼe ʼe maʼuhiga ke tou fakatalitali lelei ki te hahaʼi ʼaē ka ʼōmai ki te ʼAho Fakamanatu?
6 Tou Fakatalitali Lelei Ki Te Hahaʼi ʼAē Ka ’Ōmai: ʼI te ʼAho Fakamanatu, tou fai palalau mo te hahaʼi pea mo fakatalitali lelei kiā nātou. (Loma 12:13) Tou heheka fakatahi mo nātou ʼaē neʼe tou fakaafe, pea tou faiga ke ʼi ai hanatou ʼu Tohi-Tapu pea mo hanatou ʼu kātiko. ʼE tou fia fakatalitali lelei tāfito anai ki totatou ʼu tēhina mo tuagaʼane ʼaē kua vaivavai ʼi te faʼahi fakalaumālie, kae neʼe ʼōmai ki te toʼotoʼoga. ʼAki tatatou tōkakaga ʼaē kiā nātou, ʼe feala ai ke nātou toe fia ʼōmai ʼo fakatahi tuʼumaʼu mo tatou. (Luka 15:3-7) ʼI te ʼaho makehe ʼaia, ʼofa pe ke tou fakaloto mālohiʼi te hahaʼi ʼaē ʼe ʼōmai ʼo fakavikiviki fakatahi mo tatou kiā Sehova ʼo ʼuhiga mo tona “lotoʼofa taulekaleka.”—Pes. 31:21.