“Koutou ʼOʼofa Kia Sehova, Ia Koutou Fuli Tana Kau Agatonu”
ʼE Fakamanatu Te Mate ʼo Sesu ʼi Te ʼAho 4 ʼo ʼApelili
1 ʼI te ʼu taʼu ki muʼa atu, ʼi te kei puleʼaga Kominisi ʼo Ukraine, neʼe lamalama tuʼumaʼu te ʼu tēhina e te kau polisi—tāfito mokā fakaōvi mai te ʼaho ʼo Te Ōmoe ʼa te ʼAliki—he neʼe nātou fakaʼamu ke nātou maʼu te koga meʼa ʼaē ʼe fai ai tanatou fakatahi. Neʼe ko he ʼaluʼaga faigataʼa, he neʼe teitei ʼiloʼi e te kau polisi te ʼaho ʼaē ka fai ai te toʼotoʼoga ʼaia. Koteā ʼaē neʼe fai e te ʼu tēhina ʼo ʼuhiga mo te faʼahi ʼaia? ʼI te ʼapi ʼa te tuagaʼane, neʼe ʼi ai tona kogafale neʼe lōfia, pea neʼe tuʼu ʼi tona lalo ʼapi. Neʼe mole manatu e te kau polisi ʼe fai anai he fakatahi ʼi te kogafale ʼaia, koia neʼe tutuki e te ʼu tēhina te ʼu lauʼi papa ke feala hanatou heheka ai. Logola neʼe faigataʼa tanatou heheka he neʼe mālalo te ʼaofi, kae neʼe mole he tahi neʼe haʼu ʼo fakalelu te kokelekasio, ʼaē neʼe nātou fakahoko fakafiafia te ʼAho Fakamanatu.
2 Ko te ʼu tēhina ʼo Ukraine neʼe nātou fakahā tonatou ʼofa ki te ʼAtua, he neʼe nātou faiga mālohi ke nātou fakalogo ki te fakatotonu ʼaē ke fakamanatu te mate ʼa Kilisito. (Luka 22:19; 1 Soa. 5:3) ʼI te ʼu temi fuape ʼaē ʼe tou tau ai mo he ʼu faigataʼaʼia ʼi totatou maʼuli, ʼe tou lava maʼu he lotomālohi ʼaki te ʼu faʼifaʼitaki ʼaia pea mo tou faiga mālohi ke tou kau ki te Ōmoe ʼa te ʼAliki ʼi te ʼaho 4 ʼo ʼApelili. Kapau ʼe tou fai te faʼahi ʼaia, ʼe tou fakahā ai anai ʼe tou manatu ohage ko te tagata tohi pesalemo ʼaē neʼe hiva fēnei: “Koutou ʼoʼofa kia Sehova, ia koutou ʼaē ko tana kau agatonu.”—Pes. 31:23.
3 Tou Tokoni Ki Te Hahaʼi Ke Tuputupu Tonatou ʼOfa Ki Te ʼAtua: Ko te ʼofa ki te ʼAtua ʼe ina toe uga tatou ke tou fakaafe te hahaʼi ke nātou kau mo tatou ki te toʼotoʼoga ʼaia. Ko te pepa ʼaē ʼe ʼalutahi mo Te Minisitelio ʼo Te Puleʼaga ʼo Fepualio, neʼe ina fakaloto mālohi ia tatou fuli ke tou fai he lisi ʼo te ʼu hahaʼi ʼaē ʼe tou fia fakaafe ki te ʼAho Fakamanatu. ʼE koutou fai fakalelei koa te faʼahi ʼaia? Koutou fakaʼaogaʼi he temi moʼo fakamahino age kia nātou te toʼotoʼoga ʼaia. ʼE feala anai hanatou ʼōmai, mo kapau ʼe tou fakamanatuʼi fakalelei age te ʼaho pea mo te hola ʼaē ka fai ai te ʼAho Fakamanatu ʼaia, pea kapau ʼe tou ʼolo anai ʼo kumi mai nātou.
4 ʼI te fale fono, koutou fai he tali kāiga lelei kia nātou ʼaē neʼe nātou tali tatatou fakaafe, pea mo koutou faigaʼi ke nātou logo fīmālie. ʼE feafeaʼi hakotou tokoni kia nātou ke nātou fakatuputupu tonatou ʼofa kia Sehova? Koutou ʼolo kia nātou ke feala hakotou tali ki tanatou ʼu fehuʼi. Kapau ʼe koutou sio ʼe feala, koutou kole ke fai hanatou ako Tohi-Tapu. Koutou fakaafe nātou ke nātou ʼōmai ki tatatou ʼu fono ʼaē ʼe fai ʼi te vāhaʼa. ʼE tokaga tāfito anai te ʼu tagata ʼāfea ke nātou ʼolo ʼo fai palalau mo te kau Kilisitiano ʼaē ʼe mole kei nātou fai faka mafola. ʼE nātou fakatuʼutuʼu anai ki he ʼaho ke nātou ʼaʼahi nātou, pea mo fakaloto mālohiʼi ke nātou toe kau ki te ʼu gāue ʼo te kokelekasio, ʼo lagi nātou fai palalau anai ki te ʼu manatu ʼaē neʼe talanoa kiai te akonaki ʼo te ʼAho Fakamanatu.—Loma 5:6-8.
5 Tou Fakaloloto Totatou ʼOfa Kia Sehova: ʼE feala hatatou fakaloloto totatou kia Sehova pea mo tona ʼAlo, mo kapau ʼe tou fakakaukauʼi te meʼa ʼofa ʼo te totogi. (2 Ko. 5:14, 15) Ko te tuagaʼane kua lauʼi taʼu tana kau ki te ʼAho Fakamanatu, neʼe ina ʼui fēnei: “ ʼE mātou fakatalitali ke hoko mai te ʼAho Fakamanatu. ʼI te taʼu fuli, ʼe ko he toʼotoʼoga makehe maʼa mātou. ʼE ʼau manatuʼi taku tuʼu ʼi te fale mate ia taʼu e 20 ki muʼa atu, taku sioʼi taku tāmai pea mo taku mahino ʼaē ki te maʼuhiga ʼaupito ʼo te totogi ʼaē neʼe foaki e Sesu Kilisito. ʼI te kei maʼuli ʼo taku tāmai, neʼe mole faʼa maʼuhiga feiā kia ʼau ia te totogi. Neʼe ʼau ʼiloʼi lelei te Tohi-Tapu pea mo tona fakamahino. Kae ʼi taku sio ki te kafo ʼo te mate, neʼe fiafia ʼaupito toku loto ʼuhi ko te ʼu meʼa ʼaē ka fakahoko anai e te totogi maʼuhiga ʼaia.”—Soa. 5:28, 29.
6 ʼI te fakaōvi mai ʼo te ʼaho ʼaē ka fai ai te toʼotoʼoga ʼo te taʼu ʼaenī, koutou teuteuʼi fakatomuʼa tokotou loto ki te ʼaho ʼaia. (2 Fkma. 19:3) Koutou metitasioʼi te ʼu koga tohi faka Tohi-Tapu ʼaē ʼe tonu ke lau ki te ʼAho Fakamanatu, ʼaē ʼe tuʼu ʼi te kiʼi kaupepa Tou Vakaʼi Te Tohi-Tapu ʼi Te ʼAho Fuli—2004 pea mo te Kaletalio 2004. Ko ʼihi ʼe nātou lau ʼi tanatou ako faka famili, te ʼu kapite 112 ki te 116 ʼo te tohi Te tagata ʼaē ʼe lahi tokotahi ʼo te ʼu temi fuli. Ko ʼihi ʼe nātou fai te tahi ʼu kumi ʼi te ʼu tohi ʼaē ʼe lava tokoni ki te faʼahi ʼaia, ʼaē neʼe tā e te kalasi ʼo te tagata kaugana agatonu mo poto. (Mat. 24:45-47) ʼE feala kia tatou fuli ʼi tatatou ʼu faikole, ke tou fakamālo ki te ʼAtua ʼo ʼuhiga mo te totogi ʼaē neʼe ina foaki mai. (Pes. 50:14, 23) Ei, lolotoga te māhina ʼo te ʼAho Fakamanatu, ʼofa pe ke tou haga metitasio ki te ʼofa ʼa Sehova kia tatou, pea mo tou kumi he ʼu ʼaluʼaga ke tou fakahā ai ʼe tou ʼofa kia te ia.—Mko. 12:30; 1 Soa. 4:10.