Koutou Tokoni Ki Takotou Fānau Ke Nātou Tuputupu ʼi Te Minisitelio
1 Ko te maʼua ʼaē ʼa te ʼu mātuʼa Kilisitiano ke nātou akoʼi ki tanatou fānau mai tonatou kei liliki ia te minisitelio. ʼE lahi tona faʼahiga fai. Neʼe feala ki ʼihi fānau neʼe heʼeki popoto ʼi te lautohi ke nātou lau fakaʼatamai he vaega faka Tohi-Tapu. Ko te faʼahi ʼaia ʼe malave mālohi ki te hahaʼi ʼaē ʼe koutou fai faka mafola kiai. ʼI te lahilahi ake ʼa te fānau, ʼe koutou akoʼi leva he tahi ʼu meʼa ʼo ʼuhiga mo te minisitelio. E feafeaʼi kiā koutou ʼu mātuʼa hakotou tokoni ki takotou fānau ke nātou kau ki te fai faka mafola? Lagi ʼe tokoni atu anai kiā koutou ia te ʼu tokoni ʼaenī.
2 ʼI takotou ʼosi fakamālo, ʼe feala anai ke koutou ʼui fēnei:
◼ “Ko taku kiʼi tama [tona higoa], ʼe ina fia lau atu te vaega faka Tohi-Tapu maʼuhiga.” ʼE feala ke ʼui age e takotou tamasiʼi: “Neʼe au mahino ki te huafa ʼo te ʼAtua ʼi te vaega ʼaenī ʼo Pesalemo. [Pea lau age e te tamasiʼi peʼe talanoa ki te koga tohi ʼo Pesalemo 83:18.] ʼE fakahā ʼi te ʼu nusipepa ʼaenī ia te gāue ʼaē ka fai anai e Sehova ʼAtua maʼa tatou. ʼE feala la ke au tuku atu te ʼu nusipepa?” ʼE feala ke koutou fakaʼosi ia te fai palalau, ʼo koutou fakamahino age ia te ʼu gāue ʼaē neʼe fakatuʼutuʼu moʼo lagolago ki te fai faka mafola faka malamanei.
3 ʼE koutou lava fai mo te ʼu palalau ʼaenī:
◼ “Mālo. Neʼe au akoʼi ki taku kiʼi taʼahine [tona higoa] ke ʼofa ki te hahaʼi ʼo te telituale. ʼE ina fia lau fakanounou atu te vaega faka Tohi-Tapu.” ʼE lava ʼui age e takotou kiʼi taʼahine: “Ko te faʼahiga tokoni ki te hahaʼi ʼe au leleiʼia, ʼe ko taku fakahā kiā nātou te ʼamanaki faka Tohi-Tapu ʼo ʼuhiga mo te ka haʼu. [Pea lau age e te tamasiʼi peʼe talanoa ki te koga tohi ʼo Apokalipesi 21:4.] ʼE fakahā ʼi te ʼu nusipepa ʼaenī pe koteā ʼaē ka fai e te Puleʼaga ʼo te ʼAtua maʼa tatou. ʼE au tui papau ʼe ke fia lau anai te ʼu nusipepa ʼaenī.”
4 Kapau ʼe akoʼi tuʼumaʼu ki te fānau he ʼu fai palalau nounou, pea ʼe nātou lototoʼa anai ʼo kau ki te faka mafola ʼo te logo lelei ʼo te Puleʼaga. ʼE feala anai ke nātou faka mafola ʼi he ʼu ʼaluʼaga kehekehe, mo kapau ʼe akoako ke mahino tanatou ʼu palalau pea mo leʼo lahi. Kapau ʼe teuteuʼi lelei e te fānau pea mo koutou ia tanatou ʼu fai faka mafola, koutou fai he ʼu fakamālo fakamalotoloto kiā nātou, pea ʼe ko he ʼu faʼahi ʼe tokoni anai kiā nātou ke nātou fakahā ia tanatou tui.
5 ʼAki te taʼi fakaloto mālohi ʼaia, neʼe feala ai ki te kau tūpulaga e tokolahi ke nātou liliu ko te ʼu kaugā fagona. ʼE ko he meʼa fakafiafia hata sio ki tata fānau ʼe nātou tuputupu ʼi te minisitelio faka Kilisitiano!—Pes. 148:12, 13.