Te Polokalama ʼo Te Fakatahi Faka Siliko ʼAē Ka Hoko Mai
Lolotoga te ʼu ʼaho fakaʼosi ʼo te mālama ʼāfea pea mo agakovi ʼaenī, ʼe maʼuhiga ke tou taupau maʼu totatou teu fakalaumālie pea mo tou puipui totatou ʼuhiga Kilisitiano. (Apk. 16:15) Koia, ʼe matatonu ai te kupu tāfito ʼo te polokalama ʼo te fakatahi ʼo te taʼu gāue 2006: “Koutou Kofuʼi Te ʼUlugaaga Foʼou.”—Kol. 3:10, MN.
ʼUluaki ʼAho: Ko te ʼu ʼuluaki akonaki ʼaē ʼe fakatafito ki te kupu tāfito ʼaenī, “Tou Fakahā He ʼu Agaaga ʼo Te ʼUlugaaga Foʼou,” ʼe nātou talanoa anai ki te ʼu fua lelei ʼaē ʼe tou maʼu ʼi te ʼu faʼahi kehekehe ʼo totatou maʼuli, mo kapau ʼe tou gāueʼi totatou ʼulugaaga foʼou. E feafeaʼi hatatou fakatuputupu te ʼulugaaga foʼou? ʼE tali anai ki te fehuʼi ʼaia ia te ʼu akonaki fakaʼosi e lua ʼo te ʼuluaki ʼaho ʼo te fakatahi, ʼaē ko tonā ʼu kupu tāfito ʼaenī: “Tou Fakamālohiʼi Tatou Ke Tou Metitāsio Fakalelei” pea mo “Te Ako ʼAē ʼe Ina Faʼu Te ʼUlugaaga Foʼou.”
Lua ʼAho: ʼI te tahi ʼu akonaki ʼaē ʼe fakatafito ki te kupu tāfito ʼaenī “Tou Faigaʼi Ke Tou Maʼu Ia Te ʼAlelo ʼo Te Kau Popoto,” ʼe ina fakahā mai anai, ko te ʼulugaaga foʼou ʼe tokoni mai kiā tatou ke tou popoto ʼi te fakaʼaogaʼi lelei ʼo totatou ʼalelo. Ko te akonaki ki te kaugamālie ʼaē ko tona kupu tāfito: “ ʼE Koutou Mālo Koa Ia ʼi Te Agakovi?,” ʼe ina fakahā mai te maʼuhiga ʼaē ke tou tōkakaga ki te ʼu kākā ʼa Satana. Ko te ʼu akonaki fakaʼosi e lua ʼo te fakatahi, ʼaē ko tonā ʼu kupu tāfito: “Tou Nonofo Maʼa Mai Te Malamanei” pea “Tou Fakafoʼou ʼi Te ʼAho Fuli Totatou ʼUhiga ʼAē ʼi Loto,” ʼe tokoni mai anai ke tou tekeʼi ia te ʼu aga ʼaē ʼe fakafeagai ki te ʼu lao faitotonu ʼa te ʼAtua pea ke tou haga tauhi maʼu kiā Sehova.
ʼE tou fakatalitali ʼaki he lotofiafia ki te ʼu fakaloto mālohi ʼaē ke tou kofuʼi pea mo tou taupau te ʼulugaaga foʼou!