Tou Fakatupu He ʼu Faigamālie Ke Tou Fai Faka Mafola
1 ʼE kehekehe te ʼu ʼaluʼaga ʼo te hahaʼi ʼo te kokelekasio faka Kilisitiano. Kae ʼe tou logo tahi fuli ʼi tatatou loto ʼaē ke tou fakavikiviki kiā Sehova. (Pes. 79:13) Kapau ʼe faka tuʼakoi tatatou kau ki te faka mafola ʼo te logo lelei, heʼe tou māhahaki peʼe tou tau mo he ʼu ʼaluʼaga faigataʼa, ʼe tou lava fakatupu feafeaʼi he ʼu faigamālie ke tou fai faka mafola ai?
2 ʼI Tatatou ʼu Gāue ʼi Te ʼAho Fuli: Neʼe fakaʼaogaʼi e Sesu ia te faigamālie ʼaē ke fai faka mafola ki te hahaʼi ʼi tana ʼu felogoi mo nātou ʼi te ʼaho fuli. Neʼe palalau kiā Mateo ʼi tana fakalaka ʼi te pilō ʼo te ʼu tukuhau, mo Sakeo ʼi tana fai fagona, pea mo te fafine Samalitana ʼi tana lolotoga mālōlō. (Mat. 9:9; Luka 19:1-5; Soa. 4:6-10) ʼI tatatou ʼu gāue ʼi te ʼaho fuli, ʼe toe feala mo tatou ke tou fai faka mafola mokā tou fai palalau mo he tahi. Kapau ʼe feʼaveʼaki mo tatou hatatou Tohi-Tapu, pea mo he ʼu kiʼi pepa lotu peʼe ko he ʼu kaupepa lalahi, pea ʼe ko he ʼekenaki ʼaia ʼo tatou ke tou palalau ki tatatou ʼamanaki.—1 Pet. 3:15.
3 ʼE feafeaʼi mo kapau ʼe mole feala hakotou ʼolo ʼi te ʼu ʼapi, heʼe koutou māhahaki? Koutou lamalama te ʼu faigamālie ʼaē ke koutou faka mafola ai ki te kau ʼafilimie ʼaē ʼe ʼomai ʼo fai takotou ʼu faitoʼo, pea mo te hahaʼi ʼaē ʼe ʼomai ʼo ʼaʼahi koutou. (Gaue 28:30, 31) Kapau ʼe tau hoko kiā koutou he ʼu ʼaluʼaga ʼe ina fakamaʼua atu ke koutou nonofo ʼi tokotou ʼapi, kua koutou ʼahiʼahiʼi koa ia te fai faka mafola ʼi te telefoni peʼe ʼi te faitohi? Ko te tuagaʼane neʼe faitohi tuʼumaʼu ki tona ʼu famili ʼaē neʼe mole ko he kau Fakamoʼoni. Neʼe ina tohi ai he ʼu manatu fakaloto mālohi mai te Tohi-Tapu pea mo te ʼu ʼaluʼaga ʼaē neʼe hoko kiā ia ʼi tana fai faka mafola.
4 ʼI Te Fale Gāue Peʼe ʼi Te Faleako: Ko tatatou fia fakavikiviki ʼaē kiā Sehova, ʼe ina toe uga anai tatou ke tou fakatupu he ʼu faigamālie moʼo tō ia te ʼu pulapula ʼo te moʼoni ʼi te fale gāue peʼe kapau ʼe feala, ʼe tou fai anai ia te gāue ʼaia ʼi te faleako. Ko te kiʼi kaugā fagona e taʼu valu neʼe ina vaevae mo tana kalasi te ʼu manatu ʼaē neʼe ina lau ʼi te Réveillez-vous ! ʼo ʼuhiga mo te māhina. ʼI te ʼiloʼi e tana fafine faiako te nusipepa ʼaē neʼe ina lau ai te ʼu manatu ʼaia, neʼe ina tali ai ke foaki tuʼumaʼu age hana ʼu Tule Leʼo pea mo hana ʼu Réveillez-vous ! ʼI te fale gāue, kapau ʼe tou tuku te tohi Te Ako Mai Te Tohi-Tapu ʼi he faʼahi ʼe feala ke sio kiai te hahaʼi, pea ʼe feala ke lagaʼi ai he ʼu fehuʼi pea mo koutou fai faka mafola ai.
5 ʼE koutou lava fakakaukauʼi koa he ʼu ʼaluʼaga ke koutou fakatupu ai he ʼu faigamālie moʼo fai faka mafola ʼi takotou ʼu fale gāue ʼi te ʼaho fuli? Kapau ʼe tou fakaʼaogaʼi lelei te ʼu ʼaluʼaga ʼaē ʼe hoko kiā tatou, pea ʼe tou faiga anai ʼi te ʼaho fuli pe ke tou “momoli . . . he sakilifisio o te fakavikiviki ki te Atua.”—Hep. 13:15.