He ʼu Manatu ʼo ʼUhiga Mo Te ʼu Nusipepa

Te Tule Leʼo ʼaho 1 ʼo Fep.

“Talu mai te kamataʼaga, neʼe sisio te kau ʼāselo ki te fakatupu ʼo te kele pea mo te malamanei. [Lau age ia Sopo 38:​4, 7.] Kae ʼi te temi nei, ʼe feala koa ke fai e te ʼu ʼāselo he ʼu meʼa maʼa tatou?” Tuku ke fai mai hana tali pea koutou fakahā age te alatike ʼi te pasina 4.

Réveillez-vous! ʼo Fep.

“ ʼE lahi te ʼu ʼatua ʼe tauhi kiai te hahaʼi iā ʼaho nei. Kae ʼe au fia fakahā atu te manatu ʼaē neʼe fakahā mai e Sesu ʼi tana faikole ki tana Tāmai ʼaē ʼi selo. [Lau ia Soane 17:3.] Kapau ko he ʼAtua moʼoni pe e tahi, ʼe feafeaʼi ʼo ʼuhiga mo te ʼu ʼatua fuli ʼaē? [Tuku ke fai mai hana tali.] ʼE fakahā ʼi te alatike ʼaenī te manatu ʼa te Tohi-Tapu.” Fakahā te alatike ʼi te pasina 28 mo te 29.

Te Tule Leʼo ʼaho 1 ʼo Mal.

“ ʼE mahino ia ʼe ke iō anai ki te ʼui ʼaē neʼe fakatupu e te ʼAtua te kele taulekaleka. Kae ʼe ko he koga meʼa pe koa ke ʼahiʼahiʼi ai te hahaʼi ke feala ke ʼolo ʼihi ʼo fakalahi tona famili ʼi selo? Pe neʼe fakatupu koa e te ʼAtua te kele ʼaki he fakatuʼutuʼu? [Tuku ke fai mai hana tali.] ʼE au fia fakahā atu te ʼu palalau ʼaenī ʼe tuʼu iā Isaia.” Lau ia Isaia 45:18 pea fakahā age te alatike ʼi te pasina 3.

Réveillez-vous! ʼo Mal.

“ ʼE maʼuhiga ʼaupito te ʼofa ke tou fiafia ai pea mo logo lelei. Kae maʼa te hahaʼi tokolahi, ʼe faigataʼa te maʼu ʼo te ʼofa moʼoni. ʼI tau manatu, koteā tona tupuʼaga? [Tuku ke fai mai hana tali.] Ko te puleʼaki ke tou maʼu ai te ʼofa moʼoni ʼe ko hatatou ako ke tou fakahā ki te hahaʼi te ʼofa ʼaē ʼe mole manatu pe kiā kita. ʼE talanoa ʼi te nusipepa ʼaenī ki tona faka ʼuhiga.” Lau age ia 1 Kolonito 13:​4-7.