“Koteā Anai Takotou Tali?”
1. Koteā koa ia te ʼu faigataʼaʼia ʼaē ʼe felāveʼi mo te tokolahi iā tātou?
1 ʼE kotou leleiʼia koa ia te Folafola ʼa te ʼAtua, kae mata faigataʼa kiā koutou hakotou manatuʼi te tahi ʼu koga ʼo te ʼu fakamatala ʼaē ʼo te Tohi-Tapu, peʼe ko he ʼu vaega? ʼE kotou loto koa ke mahino lelei takotou fānau ki te ʼu moʼoni pea mo te ʼu akonaki tāfito ʼi te Tohi-Tapu? Ko te ʼalatike “Koteā Anai Takotou Tali?” (Que répondriez-vous ?) ʼaē ʼe tā ʼi te māhina fuli ʼi te Réveillez-vous ! ʼi te pāsina 31, ʼe lava tokoni atu kiā koutou kau tūpulaga pea mo koutou mātutuʼa ke kotou mahino lelei age ki te Folafola ʼa te ʼAtua.—Gaue 17:11.
2. ʼE kotou lava fakaʼaogaʼi feafeaʼi ia te ʼalatike “Koteā Anai Takotou Tali?”
2 ʼE feafeaʼi hakotou fakaʼaogaʼi lelei ia te ʼalatike ʼaia? ʼI te Réveillez-vous ! ʼo Sānualio 2006, neʼe tuʼu ai te tokoni ʼaenī: “Kotou vakaʼi age muʼa ia te pāsina 31 . . . Ko ʼihi koga ʼo te pāsina ʼaia ʼe leleiʼia anai e te kau tūpulaga. Ko ʼihi koga ʼe ko he ʼu fakamanatu anai kiā nātou ʼaē kua lagi fuafualoa tanatou ako ia te Tohi-Tapu. Ko te koga ʼaē ‘Neʼe Hoko ʼAnafea?’ (Situez dans le temps) ʼe tokoni atu anai ke kotou manatuʼi peʼe ko te temi fea ʼaē neʼe maʼuli ai te hahaʼi ʼe talanoa kiai te Tohi-Tapu, pea mo te ʼu ʼaluʼaga maʼuhiga ʼaē neʼe hoko ʼi te temi ʼaia. Ko te ʼu tali ki te ʼu fehuʼi ʼaia, ʼe tuʼu ʼi te pāsina ʼaē ʼe hinoʼi atu, pea ʼe tohi faka fuli hala. ʼO ʼuhiga mo te koga ‘ʼI Te Nusipepa ʼAenī’ (Dans ce numéro), ʼe kotou maʼu ai anai ia te ʼu tali ʼi te ʼu alatike ʼo te nusipepa ʼaenī. He koʼē ʼe mole kotou fai he ʼu kumi ʼi muʼa ʼo hakotou lau ia te ʼu tali, pea he koʼē ʼe mole kotou fai palalau mo ʼihi ʼo ʼuhiga mo te ʼu meʼa ʼaē neʼe kotou ako? ʼE feala anai hakotou fakaʼaogaʼi ia te ʼalatike foʼou ʼaia moʼo fakatafito takotou ʼu fai palalau faka Tohi-Tapu faka fāmili peʼe takotou ʼu fai palalau mo ʼihi.”
3. Koteā te ʼu lelei ʼaē neʼe maʼu e ʼihi fāmili ʼaki ia te ʼalatike ʼaia, pea ko te koga fea ʼaē ʼe kotou leleiʼia tāfito?
3 ʼE lahi te ʼu fāmili ʼe natou leleiʼia te fakaʼaogaʼi ʼo te ʼalatike ʼaia moʼo fai ʼaki hanatou ako Tohi-Tapu. Neʼe tohi fēnei e te faʼē: “ ʼI tamā manatu taumātuʼa, neʼe ko he meʼa lelei te hilifaki ki tamatou ako faka fāmili ia te ʼalatike ‘ ʼE Tonu Ke Kumi e Te Fānau !’ (Aux enfants de chercher !), heʼe fakaloto mālohi pea mo lelei ki tamā kiʼi taʼahine ʼaē ʼe taʼu tolu. ʼE mā fiafia ʼi tamā sisio ki tana fuli ia te ʼu pāsina fuli ʼo aʼu ki tana maʼu ia te pāki ʼaē neʼe ina kumi.” Neʼe ʼui fēnei e te tamai ʼe nofo ʼi Pelesile: “Ko au mo toku foha ʼaē ʼe taʼu fitu, ʼe mā leleiʼia ʼaupitō ia te ʼalatike ʼaia ʼo te Réveillez-vous ! ʼE tokoni kiā Moises ke sio lelei ki tana nusipepa, ke ina kumi ia te ʼu vaega Tohi-Tapu, ke mahino ki te ʼuhiga ʼo te ʼu pāki, pea mo mahino ki te ʼu ʼaho.” Neʼe tohi fēnei e Ashley, ʼaē ʼe taʼu 8: “ ʼE au fakamālo atu ki te ʼalatike ‘Koteā anai takotou tali?’ ʼaē ʼe tuʼu ʼi te pāsina fakaʼosi ʼo te Réveillez-vous ! ʼE lahi te ʼu puani ʼe au ako ai ʼo ʼuhiga mo te Tohi-Tapu.”
4. ʼE lava fakaʼaogaʼi feafeaʼi e he fāmili ia te ʼalatike ʼaia ʼi tanatou ako Tohi-Tapu?
4 He koʼē koa ʼe mole kotou vakaʼi ʼi ʼihi temi ʼi takotou ako faka fāmili, te ʼalatike “Koteā Anai Takotou Tali?” ʼE feala hakotou fakaʼaogaʼi ia te Index peʼe ko te CD-ROM Watchtower Library moʼo kumi ia te ʼu tali ki he ʼu fehuʼi faigataʼa. Kapau ʼe kotou fai ia te faʼahi ʼaia, pea ʼe kotou ako anai ki takotou fānau ke natou popoto ʼi te fai ʼo he ʼu kumi. Kapau ʼe ʼi ai hakotou ʼu tamaliki kua lahilahi ake, pea he koʼē koa ʼe mole kotou kole age ke natou kumi ʼi muʼa ʼo te ako faka fāmili, te ʼu tali ki te ʼu fehuʼi ʼo te ʼalatike: “Ko Ai Ia Au?” (Qui suis-je ?) peʼe “Neʼe Hoko ʼAnafea?” (Situez dans le temps) ʼE feala anai ʼi te lolotoga ʼo te ako, ke natou fakahā te ʼu kumi ʼaē neʼe natou fai. Ko te fakaʼaogaʼi lelei ʼo te ʼalatike ʼaia, ʼe ko he faigamālie ki te ʼu mātuʼa moʼo akoʼi ki tanatou ʼu fānau, te Folafola ʼa te ʼAtua, pea mo tokoni kiā nātou ke natou ʼiloʼi “te ʼu tohi taputapu” talu mai tanatou kei liliki.—2 Tim. 3:15, MN; Teu. 6:7.