ʼE Faka Maʼuhigaʼi Tāfito Ia Te Tohi-Tapu!
1. ʼI tona kamata mai, neʼe tā tāfito Te Tule Leʼo maʼa ai, pea mo te L’Âge dʼOr?
1 ʼI te ʼaho 1 ʼo ʼOketopeli 1919, neʼe tā te ʼuluaki nusipepa ʼo te L’Âge dʼOr. Neʼe liliu ko he meʼa gāue maʼuhiga ʼaupito ʼi te gāue fai faka mafola. Koteā tona tupuʼaga? He neʼe fai tāfito maʼa te hahaʼi. Neʼe mole feiā ʼo ʼuhiga mo Te Tule Leʼo, heʼe lolotoga ni ʼu taʼu neʼe ko te nusipepa ʼaia neʼe fai tāfito maʼa te “kiʼi fagaovi.” (Luka 12:32) Neʼe lahi te fiafia ʼa te kau fai faka mafola ʼi te tā ʼo te nusipepa foʼou ʼaia, pea lolotoga ni ʼu taʼu neʼe lahi age te tufa ʼo te L’Âge dʼOr ʼi te tufa ʼo Te Tule Leʼo.
2. Koteā te higoa ʼo te L’Âge dʼOr ʼi te temi nei, pea neʼe koteā tona fakatuʼutuʼu talu mai te kamata?
2 Ko te nusipepa L’Âge dʼOr neʼe tā moʼo fakahā ki te hahaʼi ko te puleʼaki moʼoni ki te ʼu fihifihia ʼo te malamanei ʼe ko te Pule ʼa Kilisito ia Taʼu e Afe, ʼaē ka ina foaki moʼoni anai ki te malamanei he temi fakafiafia. ʼI te ʼu taʼu ʼaē neʼe hoa kiai, neʼe hoko te ʼu fetogi ki te L’Âge dʼOr moʼo mulimuli ki te ʼu fetogi ʼo te temi. ʼI te taʼu 1937 neʼe fetogi tona higoa ʼo fakahigoa ko te Consolation. Pea ʼi te taʼu 1946 neʼe fakahigoa leva ia ʼaki te higoa ʼaē kua tou ʼiloʼi ia ʼaho nei, ko te Réveillez-vous !
3. Neʼe tokoni lahi te Réveillez-vous ! ki te fakahoko ʼo te lea faka polofeta fea?
3 Talu mai te kamata tā ʼo te nusipepa ʼaia, neʼe tokoni lahi te nusipepa ki te fagonogono lahi ʼaē neʼe fai talu mai te taʼu 1919. (Mat. 24:14) Kae ʼuhi ko te maʼuhiga ʼo totatou ʼu temi, ʼe ʼaoga ke fai he tahi ʼu fetogi ʼo ʼuhiga mo te Réveillez-vous !
4. (a) Koteā ʼaē ʼe maʼua ke fai e he tahi mo kapau ʼe fia hāo ʼi “te ʼaho ʼo te hāūhāū ʼo Sehova”? (b) Ohage ko tona ʼui ia Apokalipesi 14:6, 7, koteā ʼaē ʼe ʼui ki te hahaʼi fuli e te “ ʼāselo [ʼaē] ʼe lele ʼi te lotomalie ʼo te lagi”?
4 Ko te lauʼi miliona hahaʼi ʼe nātou leleiʼia te lau ʼo te Réveillez-vous ! heʼe talanoa ai ki he ʼu manatu kehekehe ʼe leleiʼia e te hahaʼi. ʼE mahino papau ia, ko te tokolahi ʼo nātou ʼaē ʼe kau ki te ʼAho Fakamanatu ʼo te mate ʼo Sesu ʼi te taʼu fuli, ʼe nātou lau tuʼumaʼu te Réveillez-vous ! Kae kapau ʼe fia hāo he tahi ʼi “te ʼaho ʼo te hāūhāū ʼo Sehova,” ʼe tonu anai ke tokoni kiā ia ke mole gata ʼaki pe tana lau tuʼumaʼu ia tatatou ʼu tohi.—Sofo. 2:3; Apk. 14:6, 7.
5. (a) Koteā ʼaē ka faka maʼuhigaʼi tāfito anai ʼi te Réveillez-vous ! ʼo Sānualio 2006? (b) Koteā ʼaē ka lagi uga anai te tokolahi ke nātou fai, pea ko te lea faka polofeta fea ʼaē ka hoko ai?
5 Koia, ʼo kamata ʼi Sānualio 2006, ʼe faka maʼuhiga tāfito anai ʼi te Réveillez-vous ! ia te Puleʼaga ʼo te ʼAtua. ʼE ina fakaloto mālohi anai te kau lautohi ke nātou kumi ki te Tohi-Tapu ia te ʼu puleʼaki ki tonatou ʼu fihifihia pea mo ina faka maʼuhiga tāfito anai ia te ʼu fakamahino ʼa te Tohi-Tapu ʼo ʼuhiga mo te ʼu meʼa ʼaē ʼe hoko ʼi te temi nei. ʼI te ʼaluʼaga ʼaia, ʼe mahino lelei age anai ki te kau lautohi ia te ʼu meʼa ʼaē ʼe hoko, pea ʼaki te ʼu meʼa ʼaē ʼe nātou lau, ʼe lagi uga anai nātou ke nātou ako he tahi ʼu manatu ʼo ʼuhiga mo Sehova.—Sakl. 8:23.
6, 7. (a) ʼE tokoni feafeaʼi anai te Réveillez-vous ! ki te hahaʼi tokolahi ke nātou mulimuli kiā 1 Tesalonika 2:13? (b) ʼE tā tuʼa fia anai te Réveillez-vous ! ʼi te māhina fuli pea ko lea e fia ʼaē ka hoko kiai te fetogi ʼaia?
6 ʼE hoko atu pe anai te tā ʼi te Réveillez-vous ! ia te ʼu alatike ʼo ʼuhiga mo te ʼu manatu kehekehe. Kae ʼe faka maʼuhigaʼi tāfito anai ia te Tohi-Tapu. (1 Tes. 2:13) Mai tona ʼaluʼaga ʼaē ʼe maʼu ʼi Te Tule Leʼo te ʼu manatu faka Tohi-Tapu pea ʼe tuʼu anai ʼi te Réveillez-vous ! he ʼu alatike ʼe fakatafito ki te Tohi-Tapu, koia ʼe mole toe ʼaoga anai ke tā he ʼu Réveillez-vous ! e lua ʼi te māhina fuli. Koia, ʼo kamata ʼi Sānualio 2006, ʼe tā anai te Réveillez-vous ! e tahi ʼi te māhina fuli. ʼE ko he faka faigafua anai ki te teuteuʼi ʼo tatatou ʼu tohi, mo tona fakaliliu, pea mo tona momoli.
7 ʼE hoko anai te fetogi ʼaia ki te ʼu lea ʼe teitei 40 ʼi te teau ʼo te ʼu lea ʼaē ʼe fakaliliu kiai ia te Réveillez-vous ! ʼE lahi te ʼu lea ʼe ko te Réveillez-vous ! e tahi ʼe tā ʼi te māhina fuli peʼe ko te nusipepa e tahi ʼe tā ʼi te ʼu māhina e tolu. ʼE mole fai anai he fetogi ʼo ʼuhiga mo Te Tule Leʼo.
8. ʼE lava fakaʼaogaʼi feafeaʼi e te kau fai faka mafola ia te Réveillez-vous ! pea mo Te Tule Leʼo?
8 ʼE feala anai ʼi te māhina fuli, ke tufa e te kau fai faka mafola ia te Réveillez-vous ! mo Te Tule Leʼo e tahi ʼi te ʼu Tule Leʼo e lua ʼo te māhina ʼaia. Ko nātou ʼaē ka nātou fakahā anai te Réveillez-vous !, ʼe feala anai ʼi te māhina kātoa ke nātou fakaʼaogaʼi tuʼumaʼu pe tanatou faʼahiga tufa ʼo te nusipepa ʼaia. ʼE mole toe ʼaoga anai ke nātou fetogi te faʼahiga tufa ʼo te nusipepa ʼaia ʼi te vaelua ʼo te māhina, ohage ko tatatou fai ʼo aʼu mai ki te temi nei.
9. Koteā ʼaē ka haga fai anai e te Réveillez-vous !
9 Talu mai tana ʼuluaki tā ʼi te 1919, neʼe ʼuluaki higoa muʼa te nusipepa ʼaia ko te L’Âge dʼOr, pea ki muli age ko te Consolation, pea ʼi te temi nei ʼe ko te Réveillez-vous ! ʼaē kua fakaʼaogaʼi lahi ʼi te gāue fai faka mafola. ʼE tou faikole ke haga tapuakina e Sehova te tufa ʼo te nusipepa ʼaia ʼaki tana ʼu fetogi ʼaia, pea mo tokoni anai ki te hahaʼi tokolahi mai te ʼu “fenua fuli pea mo te ʼu telepi pea mo te ʼu hahaʼi pea mo te ʼu lea fuli” ke nātou falala ki te Puleʼaga ʼo te ʼAtua heʼe ko tanatou falalaʼaga pe ʼaia e tahi.—Apk. 7:9, MN.