Te Fakatuʼutuʼu Foʼou Moʼo Kamata He ʼu Faipalalau

ʼI Te Tule Leʼo ki te tufa N° 2 2016 ʼi te pasina fakaʼosi, ʼe tou maʼu ai te alatike ʼaeni “Kotea ʼAe ʼe Ui ʼi Te Tohi-Tapu?” Ko te alatike foʼou ʼaia, ʼe tokoni mai anai ke tou kamata he ʼu faipalalau ki he ʼu manatu Fakatohi-tapu. Ko te alatike ʼaia, ʼe tatau mo ʼatatou pepa lotu. ʼE ʼi ai te fehuʼi, mo te vaega Tohi-Tapu pea mo ʼihi atu manatu moʼo hoko atu te faipalalau.

Ko he ʼu faipalalau ki he ʼu manatu Fakatohi-tapu ʼe iku tuʼumaʼu ki he ʼu ako Tohi-Tapu. Ke ke fakaʼaogaʼi te fakatuʼutuʼu foʼou ʼaia moʼo tokoni ki te tokolahi ke natou maʼu te meʼa kai ʼae ʼe ʼaoga kia natou ʼi te faʼahi fakalaumalie.—Mt 5:6.

ʼE FEAFEAʼI TONA FAKAʼAOGAʼI?

1. Kole ki he tahi ke ina fakaha atu tana manatu ʼo ʼuhiga mo he fehuʼi

2. Fakalogo pea mo fakamalō ki tana tali

3. Lau te vaega ʼae ʼe tuʼu ʼi te kupu tafitō ʼaeni “ ʼE Ui ʼi Te Tohi-Tapu,” pea kole age ke ina fakaha atu tana manatu ʼo ʼuhiga mo te vaega. Kapau ʼe maʼu hona temi, hoko atu te faipalalau ʼaki tau fakaʼaogaʼi he puani ʼi te kupu tafitō ʼaeni “Kotea ʼAe ʼe Toe Ui ʼi Te Tohi-Tapu?”

4. Tuku age te nusipepa

5. Fai he fakatuʼutuʼu ke ke toe liliu ʼo vakaʼi fakatahi mo ia te fehuʼi ʼae ʼe hoa mai ki ai