Tou Talanoa Ki He Alatike ʼe Tahi, Kaʼe Tou Tuku Age Te ʼu Nusipepa ʼe Lua

ʼE maʼu ʼi ʼatatou nusipepa he ʼu alatike kehekehe pea mo maʼuhiga. ʼI te agamahani, ʼe lelei age ke tou talanoa ki he alatike pe ʼe tahi, ʼi hatatou faiga ʼae ke tou talanoa ki he ʼu tuʼuga alatike. Kapau ʼe tou fakasiosio lelei ia te aluʼaga ʼo te ʼapi, pea mo tou iloʼi lelei ia te agaaga ʼo te ʼu nusipepa, ʼe feala anai ke tou filifili he alatike ʼi Te Tule Leʼo peʼe ko te Réveillez-vous ! ʼae ʼe tou iloʼi ʼe fia lau anai e te hahaʼi. Ohage la, kapau ʼe tou tokagaʼi he ʼu kiʼi meʼa gaoʼi ʼi te ʼapi, ʼe tou filifili pe anai he alatike ʼe talanoa ki te maʼuli fakafamili. Kapau ʼe tou felaveʼi mo he tagata, ʼe lagi lelei ke tou talanoa ʼo ʼuhiga mo he puleʼaga ʼe lelei, heʼe tou iloʼi ʼe ko te manatu ʼaia ʼe hoha ki ai e te hahaʼi tagata. Tatau aipe pe ʼe tou talanoa ki he alatike pe ʼe tahi, kaʼe ʼe lelei ke tou tuku age ia te ʼu nusipepa ʼe lua mo kapau ʼe tou tokagaʼi ʼe ina fia lau moʼoni.