Ko Ai ʼAe Ka Ina Fia Lau Anai?
1. Ka tou lau tatatou Tule Leʼo peʼe ko te Réveillez-vous !, kotea ʼae ʼe tonu ke tou fakakaukauʼi, pea kotea tona tupuʼaga?
1 Neʼe teuteuʼi Te Tule Leʼo pea mo te Réveillez-vous ! ʼaki te manatu ʼae ki te hahaʼi ʼi te malamanei katoa. Koia ʼae ʼe talanoa ai te ʼu alatike ki te ʼu faʼahi kehekehe. Ka tou lau te ʼu alatike takitahi ʼi tatatou nusipepa totonu, ʼe tonu ke tou fakakaukauʼi pe ko ai tafitō ʼae ka ina fia lau anai, pea mo tou faigaʼi leva ke tou foaki ki ai.
2. Kotea la he ʼu alatike ʼi ʼatatou nusipepa ʼe fia lau tafitō anai e ʼihi?
2 ʼE talanoa koa Te Tule Leʼo foʼou ki he manatu Fakatohi-tapu neʼe kua ke faipalalau ki ai mo hou kauga gaue? ʼE ʼi ai koa he alatike ki te maʼuli fakafamili ʼe feala ke tokoni ki hou kaiga? ʼE talanoa koa ʼi te Réveillez-vous ! ki he fenua ʼe fakatuʼutuʼu ke folau ki ai hou feʼilo? ʼE ʼi ai koa hatatou nusipepa ʼe fia lau anai e te hahaʼi ʼo tou telituale ʼe gaue ʼi ni fale gaue peʼe fakapuleʼaga? Ohage la, ʼe feala ke fia lau e natou ʼo te ʼu fale taupau ki te hahaʼi matutuʼa ia he nusipepa ʼe ina fakaha lelei ai te ʼu faigataʼaʼia ʼo te vaivai matuʼa. Pea ko natou ʼae ʼe gaue ʼi te ʼu fale polisi ʼe natou leleiʼia anai he nusipepa ʼe talanoa ki te faifakapo.
3. Fakamatala he aluʼaga ʼe fakaha ai te maʼuhiga ʼae ke tou foaki te ʼu nusipepa ʼae ʼe fia lau tafitō anai e te hahaʼi.
3 Te ʼu Fua Lelei: ʼI te ʼosi maʼu e te taumatuʼa ʼi Afelika ʼi Saute te Réveillez-vous ! ʼo Oketopeli 2011, ʼae ʼe talanoa ki te pusiaki ʼo te fanau ke natou liliu ko he ʼu hahaʼi lalahi fakapotopoto, neʼe nā telefoni kia fale ako ʼe 25 ʼi te telituale ʼo tanā kokelekasio. Neʼe tali e te ʼu fale ako ʼe ʼuafulu-ma-lua te ʼu Réveillez-vous ! pea neʼe natou tufa ki ʼanatou kau ako. Ko te tahi taumatuʼa ʼi te fenua pe ʼaia neʼe nā toe manatu feia pea neʼe nā ʼave te ʼu Réveillez-vous ! ʼaia ki te ʼu fale ako ʼo tanā telituale. Neʼe fakatuʼutuʼu e te kau faiako ʼo te fale ako ke fakaʼaogaʼi te nusipepa ʼaia ʼi tanatou polokalama ako mo lautohi ʼo te vahaʼa. Neʼe fakamatala leva e te taumatuʼa te aluʼaga ʼaia ki te taupau siliko. Neʼe ina fakalotomalohiʼi te ʼu kokelekasio ʼo tana siliko, ke natou gaueʼi feia te ʼu fale ako ʼo tonatou telituale. ʼI te lahi ʼae ʼo te fakaui ʼo te nusipepa ʼaia ki te filiale, neʼe toe ta!
4. He ko ʼe ʼe tou loto ke maʼu e te tokolahi te ʼu nusipepa?
4 ʼE talanoa ʼatatou nusipepa ki te ʼuhiga moʼoni ʼo te ʼu aluʼaga ʼae ʼe hoko nei, pea ʼe fakaha ai te ʼu manatu ʼo ʼuhiga mo te Tohi-Tapu pea mo te Puleʼaga ʼo te ʼAtua. ʼE ko te ʼu nusipepa pe ʼaia ʼi te kele ʼe natou “fakaha te fakamauli!” (Esa. 52:7) Koia ʼae ʼe tou loto ai ke maʼu e te tokolahi te ʼu nusipepa ʼaia. ʼE feala hakotou fakahoko te faʼahi ʼaia moka kotou fakakaukauʼi pe ko ai ʼae ka ina fia lau anai.