Te Polokalama ʼo Te Fakatahi Makehe ʼAho Tahi ʼAē Kā Hoko Mai
Ko te kupu tāfito ʼo te polokalama ʼo te fakatahi makehe ʼaho tahi ʼo te taʼu gāue 2009, “Tokaga Tuʼumaʼu Ki Te Minisitelio . . . Ke Feala Hau Fakahoko,” pea ʼe fakatafito ki te koga tohi ʼo Kolose 4:17. ʼI totatou ʼuhiga Kilisitiano, ʼe tou tokagaʼi fakamālotoloto anai ia te fakalotomālohi ʼaenī. Ko tatatou fakatuʼutuʼu ke tou fakahoko fakalelei, ia tatatou minisitelio ohagē ko tona fai ʼaē e Sesu. (Soa. 17:4) Neʼe tuku mai foki e te ʼapositolo ko Paulo ia he faʼifaʼitaki lelei kiā tātou ʼo ʼuhiga mo te faʼahi ʼaia. Neʼe kua ina fakatotonu ke aʼu ki te fakaʼosi ʼo tona minisitelio.—Gāue 20:24.
ʼE talanoa anai ia te taupau ʼo te silikō ʼi tana akonaki ki te ʼu faigataʼaʼia ʼaē ʼe felāveʼi mo te ʼu kaugā fagona kehekehe ʼi tanatou minisitelio. Ko te akonaki “Kotou Gāueʼi Ia Te Meʼa ʼAē Neʼe Kotou Tō,” ʼe ina fakahā lelei anai peʼe feafeaʼi hatatou tokoni moʼoni kiā nātou ʼaē ʼe natou “lotolelei ki te maʼuli heʼegata.” (Gāue 13:48) ʼI te akonaki ʼaē ko tona kupu tāfito “ ʼE Tou Fakahā Ko Tātou Ko Te ʼu Minisi,” ʼe ʼuluaki palalau anai ia te tehina faiakonaki ki te koga tohi ʼo 2 Kolonito 6:1-10, ʼo palalau ki te ʼu vaega takitahi. ʼI te hili hoʼatā, ʼe palalau anai ki te nofoʼaki ʼaki ia te akonaki ʼaē ko tona kupu tāfito “Kotou Fakamaʼuhigaʼi Tāfito Ia Takotou Minisitelio.” ʼE kotou maʼu anai he ʼu fakalotomālohi ʼaki te ʼu akonaki ʼaenī: “Ko Te Kau Tūpulaga Pea Mo Te Hahaʼi Mātutuʼa ʼe Natou Leleiʼia Te Minisitelio,” pea mo te akonaki “Ko He Kau Tūpulaga ʼe Natou Kau Ki Te Minisitelio.” Ko nātou ʼaē ʼe natou fia foaki ia tonatou maʼuli ʼaki ia te papitema ʼi te vai, ʼe tonu anai ke natou foimo fakahā fakavilivili ki te taupau pelesitā ʼi muʼa ʼo te hoko mai ʼo te fakatahi fakasilikō peʼe ko te fakatahi makehe ʼaho tahi. Ko te tahi koga maʼuhiga ʼo tatatou ʼu fakatahi ʼe ko te vakaʼi ʼo Te Tule Leʼo. Kotou ʼaumai ia Te Tule Leʼo ʼaē ʼe tuʼu ai ia te ʼalatike ʼaē kā fai anai lolotoga te fakatahi makehe ʼaho tahi ʼaia.
Kā tou tokagaʼi ia te ʼu meʼa ʼaē ʼe tou fai ʼi tatatou minisitelio, ʼe tou tōkakaga anai naʼa pulinoa ia totatou temi, ki he tahi age ʼu gāue kae mole tou fakahoko lelei ia te ʼu gāue ʼaē neʼe foaki mai e Sehova ke tou fai. ʼE tokoni mai kiā tātou fuli ia te ʼu fakalotomālohi Fakatohi-tapu ʼaē ʼe foaki mai ʼi te polokalama ʼo te fakatahi makehe ʼaia, ke tou mahino pea mo taupau ia te ʼu meʼa ʼaē ʼe maʼuhiga pea mo fakakaukauʼi ia tatatou faʼahiga fai ia tatatou minisitelio ʼaki te fakatuʼutuʼu ʼaē ke tou fakahoko fakalelei ia te faʼahi ʼaia.