Ko Te Temi Nei ʼe Tonu Ai Ke Ke Lagolago Ki Te Puleʼaga ʼo Te ʼAtua

Pea ʼe feia pe ia ʼaho nei, ʼe tou fakatalitali anai ki he “afā,” ʼae neʼe ui e Sesu ko te “mamahi lahi.” (Mateo 24:21) Pea ʼe tonu ke tou fakalaka ʼi te mamahi lahi ʼaia. Kae ʼe feala pe hatatou hao mai ai. ʼO feafeaʼi?

ʼI tana Akonaki ’i Te Mo’uga, neʼe fai e Sesu te fakatotonu ʼaeni: “Kotou haga fakamuʼamuʼa ia te Puleʼaga [ʼo te ʼAtua] pea mo tana faitotonu.” (Mateo 6:33) ʼO feafeaʼi?

Fakamuʼamuʼa ia te Puleʼaga ʼo te ʼAtua. Ko tona fakaʼuhiga ʼe tonu ke maʼuhiga age kia tatou te Puleʼaga ʼo te ʼAtua ʼi ʼihi atu aluʼaga. (Mateo 6:25, 32, 33) Kotea tona tupuʼaga? He ʼe mole lava fakatokatoka pe la e te tagata te ʼu fihifihia ʼo te malamanei. ʼE gata tokotahi pe ki te Puleʼaga ʼo te ʼAtua ʼe feala ke ina fakahoko te faʼahi ʼaia.

Fakamuʼamuʼa ia te faitotonu ʼa te ʼAtua. ʼE tonu ke tou faiga ke tou fakaʼapaʼapa ki te ʼu lao mo te ʼu pelesepeto faitotonu ʼa te ʼAtua. Kotea tona tupuʼaga? He ʼe ka tou fai e tatou totonu he tonu ʼo ʼuhiga mo te meʼa ʼae ʼe lelei mo te meʼa ʼae ʼe kovi, ʼe fua kovi pe anai kia tatou. (Taaga Lea 16:25) Kae ka tou maʼuliʼi ʼana pelesepeto, ʼe mole tou fakafiafiaʼi pe anai tona loto kae ʼe toe fua lelei pe anai kia tatou.—Esaia 48:17, 18.

Haga fakamuʼamuʼa ia te Puleʼaga ʼo te ʼAtua pea mo tana faitotonu. Neʼe ui e Sesu ʼe feala ke fakaleluʼi ʼihi pea mo manatu ʼe fimalie anai mo kapau ʼe lahi tanatou foʼi falā. Pea ko ʼihi leva ʼe natou fakaʼaogaʼi tonatou temi mo tonatou malohi ke natou fakatokatoka ʼonatou fihifihia. ʼI tanatou fai te faʼahi ʼaia, ʼe mole kei natou maʼu he temi ke natou fakamuʼamuʼa ai te Puleʼaga ʼo te ʼAtua.—Mateo 6:19-21, 25-32.

Kae neʼe fakapapau e Sesu kia natou ʼae ʼe lagolago ki te Puleʼaga ʼo te ʼAtua, ʼe natou maʼu anai te ʼu meʼa ʼae ʼe ʼaoga kia natou ʼi te temi nei. ʼE mole gata ai, kae ʼe natou toe maʼu anai ni tapuakina lahi ʼi te ka haʼu.—Mateo 6:33.

ʼI te ʼuluaki sekulo, neʼe fakamuʼamuʼa e te ʼu tisipulo ʼa Sesu ia te Puleʼaga ʼo te ʼAtua mo tana faitotonu kae neʼe kei hoko atu pe te maʼuli mamahi ʼa te tagata. Kae neʼe puipui pe natou. ʼO feafeaʼi?

Neʼe natou maʼuliʼi te ʼu pelesepeto faitotonu ʼa te ʼAtua. Koia, neʼe puipui ai natou mai te ʼu fihifihia ʼae neʼe tau mo te hahaʼi ʼae neʼe mole fakalogo ki te ʼAtua. Pea tahi, neʼe natou tui papau ʼe hoko mai anai te Puleʼaga. Koia, neʼe tokoni ai kia natou te faʼahi ʼaia ke natou katakiʼi te ʼu ʼahiʼahi. Pea neʼe foaki age e te ʼAtua te “malohi makehe” ke feala hanatou tauʼi te ʼu fihifihia ʼaia.—2 Kolonito 4:7-9.

ʼE KE FAKAMUʼAMUʼA ANAI KOA TE PULEʼAGA?

ʼI te ʼuluaki sekulo, neʼe fakalogo te ʼu kaugana ʼa te ʼAtua ki te fakatotonu ʼa Sesu ke natou fakamuʼamuʼa te Puleʼaga. Neʼe natou fakamafola te logo lelei ʼo te Puleʼaga ʼi te ʼu koga meʼa fuli ʼae neʼe natou maʼuʼuli ai. (Kolose 1:23) ʼE ʼi ai koa he tahi ʼe ina fai te gaue ʼaia ia ʼaho nei?

ʼEi. ʼE mahino ia te Kau Fakamoʼoni ʼa Sehova kua vave pulihi pe e te Puleʼaga ʼo te ʼAtua ia te malama ʼaeni. Koia, neʼe natou fakaʼaogaʼi tonatou malohi moʼo fakahoko te gaue ʼaeni neʼe tuku age e Sesu: “Ko te logo lelei ʼaeni ʼo te Puleʼaga ʼe fakamafola anai ʼi te kele katoa ko he fakamoʼoni ki te ʼatu puleʼaga, pea hoki hoko mai anai ia te fakaʼosi.”—Mateo 24:14.

Kotea ʼe ke fai anai moka fakaha atu te logo lelei ʼaia? ʼE matou fakalotomalohiʼi koe ke ke faʼifaʼitakiʼi te hahaʼi ʼae neʼe maʼuʼuli ʼi te ʼuluaki sekulo, ʼi Pelea, ko he kolo ʼo Masetonia. ʼI te fakaha age e te apositolo ko Paulo te logo lelei ʼo te Puleʼaga, neʼe natou tali te logo ʼaia ʼaki “he loto fakamalotoloto.” Pea neʼe natou “vakavakaʼi fakalelei te ʼu Tohi Taputapu” pe ʼe moʼoni te ʼu faʼahi ʼae neʼe natou logo ki ai. Neʼe natou maʼuliʼi leva te ʼu meʼa ʼae neʼe natou ako.—Gaue 17:11, 12.

ʼE feala pe hau faʼifaʼitakiʼi ia natou. Kapau ʼe ke fakamuʼamuʼa te Puleʼaga ʼo te ʼAtua mo tana faitotonu, ʼe ke maʼu anai hou puipuiʼaga ʼi te temi nei. Kae ʼe mole gata ai, ʼe ke toe iloʼi ai anai te tokalelei mo te fimalie heʼe gata ʼi te ka haʼu.