Tou Teuteuʼi Fakalelei Te ʼu Koga Kehekehe ʼo Te Fono Gāue
1. Koteā ʼaē neʼe fai ai te Fono Gāue, pea ʼe feafeaʼi hatatou maʼu tona ʼu lelei mai te fono ʼaia?
1 Neʼe fai ia te Fono Gāue moʼo teuteuʼi ʼo tātou ke fua lelei tatatou minisitelio. Ko te manatu tāfito ʼaē ʼe vakaʼi ʼi te fono ʼaia, ʼe ko te fakamafola ʼo te logo lelei ʼo te Puleʼaga, mo te fai ʼo he ʼu tisipulo, pea mo te tala ʼo te kua ovi mai ʼo te tautea fakaʼatua. (Mat. 28:20; Mko. 13:10; 2 Pet. 3:7) ʼE tou maʼu te ʼu lelei ʼo te fono maʼuhiga ʼaia, mokā ʼe tou teuteu lelei kiai pea mo tou fakatuʼutuʼu ke tou fai hatatou ʼu tali.
2. ʼE feafeaʼi hatatou lava teuteu mokā ko he akonaki?
2 Te ʼu Akonaki: ʼI te agamāhani, ko te ʼu tohi ʼaē ʼe ʼaoga ki te akonaki ʼe tuʼu ʼi te nota ʼaē maʼa te tehina faiakonaki. ʼE feala hakotou toe vakaʼi mo te ʼu tohi ʼaē ʼe fakatafito kiai te akonaki, ʼo fēia ki te ʼu vaega Tohi-Tapu, pea mo kotou metitāsioʼi peʼe feafeaʼi hakotou fakaʼaogaʼi ʼi takotou minisitelio ia te tokoni ʼaē neʼe kotou logo kiai.
3. Koteā ʼaē kā tokoni mai ke tou teuteu ai ki te ʼu fai palalau ʼaē ʼe fai ʼaki he ʼu fehuʼi pea mo he ʼu tali?
3 Ko He Fai Palalau ʼAki He ʼu Fehuʼi Pea Mo He ʼu Tali: Ko te koga ʼaia ʼe fai anai ohagē pē ko te fai ʼo Te Tule Leʼo, ʼaki he ʼu palalau fakanounou ʼi te kamata pea mo te fakaʼosi. Fakaʼiloga ia te ʼu puani tāfito ʼaē ʼe tuʼu ʼi te ʼu palakalafe, pea mo kotou teuteuʼi hakotou ʼu tali fakanounou ʼe lagolago ki te fai palalau.
4. ʼE feafeaʼi hatatou teuteuʼi tatatou fono mokā ko he fai palalau mo te nofoʼaki?
4 Ko He Fai Palalau Mo Te Nofoʼaki: Ko te koga ʼaia ʼe fai anai ohagē ko he akonaki, kae ko te tehina ʼaē neʼe fakatuʼutuʼu kiai, ʼe ina fakafehuʼi anai te nofoʼaki. Kapau ʼe kotou fakaʼiloga te ʼu puani tāfito pea mo kumi ia te ʼu vaega Fakatohi-tapu, pea ʼe feala anai ke kotou tali mokā fai ni ʼu fehuʼi. Ko te tehina ʼaē kā ina takitaki te koga ʼaia ʼo te fono, ʼe faiga anai ke kau te nofoʼaki ki te vakaʼi ʼo te ʼu puani tāfito.
5. Koteā ʼaē kā tokoni mai anai ke ʼaoga kiā tātou ia te ʼu faʼifaʼitaki ʼaē ʼe fai ʼi te ʼu fono?
5 Te ʼu Faʼifaʼitaki: Ko ʼihi koga ʼo te fono, ʼe fai ai anai he ʼu faʼifaʼitaki moʼo fakahā peʼe feafeaʼi ia he fakaʼaogaʼi ʼo te puani ʼaē neʼe vakaʼi ʼi te fono ki te telituale. ʼE kole anai ki te ʼu tagata ʼāfea peʼe ko he ʼu kaugā fai fakamafola faiva peʼe ko he ʼu pioniē ke natou fai ia te ʼu faʼifaʼitaki ʼaia. Ko takotou teuteuʼi te koga ʼaia, ʼe feala ai anai ke fakakaukauʼi fakatomuʼa peʼe feafeaʼi hakita fakaʼaogaʼi ʼo te puani ʼi te telituale. Kā fakaʼaogaʼi te ʼu ʼuluaki palalau ʼaē ʼe tuʼu ʼi Te Minisitelio ʼo Te Puleʼaga, kotou fakakaukauʼi peʼe feafeaʼi anai hakotou fai ʼaki takotou ʼu palalau māhani pea mo fakaʼaogaʼi ki te hahaʼi kehekehe ʼo te telituale. Kotou ʼaumai ki te fono takotou ʼu tohi peʼe ko te ʼu nusipepa ʼaē kā fakaʼaogaʼi anai ki te faʼifaʼitaki. Lolotoga takotou Tauhi Fakafāmili, ʼe lagi lelei anai ke kotou fai te ʼu faʼifaʼitaki ʼaia.
6. Koteā te ʼu tupuʼaga ʼaē ʼe tonu ai ke tou teuteuʼi ia te Fono Gāue?
6 ʼE hoki māholo ia te Fono Gāue mokā neʼe tou teuteuʼi ia te ʼu koga fuli ʼo te fono pea mo metitāsioʼi te ʼu puani maʼuhiga ʼaē kā vakaʼi. Kapau ʼe tou fakaʼaogaʼi te ʼu tokoni ʼaia, pea ʼe tou maʼu ai anai he ʼu fefakalotomālohiʼaki. (Loma 1:11, 12) Kapau ʼe tou toʼo hotatou temi moʼo teuteuʼi ia te ʼu koga kehekehe ʼo te Fono Gāue, pea ʼe tou nofo teuteu lelei anai ki te fakahoko ʼo tatatou fai fakamafola.—2 Tim. 3:17.