Ko Te Fono Gāue ʼe Ina Tokoniʼi Tatou Ke Tou Faiva Ia Meʼa Fuli Moʼo Fai ʼo He Gāue Lelei
1 Ko te fakatuʼutuʼu ʼo te Fono Gāue ko te uga pea mo te tokoni kia tatou ke lahi tatatou kau ʼaē ki te fai faka mafola pea mo te fai ʼaē ʼo he ʼu tisipulo. (2 Tim. 3:17) Kae, kapau ʼe mole lelei tatatou teuteu peʼe mole tou maʼuliʼi te meʼa ʼaē ʼe tou ako, ʼe siʼisiʼi anai tona ʼaoga.
2 Ko te teuteu fakatomuʼa ʼe tokoni anai kia koutou ke lahi ʼaupito takotou maʼu te akonaki. Koutou toe vakaʼi te ʼu tohi ʼaē ʼe fakaʼaogaʼi anai, pea ke koutou ʼave ki te fono ke feala ai foki hakotou mulimuli kiai pea ke feala ai hakotou tali. Ke koutou fakalogo lelei, pea ke koutou tohi hakotou ʼu nota ke feala ai hakotou fakaʼaogaʼi ki ʼamuli.
3 Ko te tagata taupau pelesita ʼe ina toe vakaʼi fakalelei te polokalama ʼo te ʼu koga ʼo te fono. Ko he ʼu tagata ʼāfea, pea mo he ʼu tagata faifekau faka minisitelio faiva ʼe hinoʼi ke nātou teuteuʼi te ʼu koga ʼo te fono. (om pasina 70) Ko te ʼu kokelekasio ʼaē ʼe tokosiʼi tona ʼu tagata ʼāfea pea mo tona ʼu tagata faifekau faka minisitelio e lagi feala ke hinoʼi niʼihi ʼu tēhina faiva ke tokoni kia nātou ʼi te faʼahi ʼaia. ʼE tonu anai ke teuteu fakalelei ia nātou fuli ʼaē ka nātou fai te faʼahi ʼaia, ʼo mulimuli tonu ki te manatu ʼaē neʼe tuku age, pea ke tokaga naʼa nātou fakalaka ʼi te temi ʼaē neʼe tuku ake kia nātou.
4 Ko te fono ʼe kamata tuʼumaʼu ʼaki te ʼu logo. Ko te tēhina ʼaē ʼe hinoʼi ki te faʼahi ʼaia ʼe tonu ke faka felogoi fakatomuʼa ki te tagata taupau pelesita pe koteā te ʼu manatu ʼaoga ʼe tonu ke fakahā. Ko te ʼu manatu ʼaia e lagi kau kiai mo te ʼu tohi mai te Sosiete peʼe ko te ʼu fakamanatu ʼo ʼuhiga mo te ʼu fakatuʼutuʼu ki te gāue faka mafola peʼe ko te ʼu tānaki ʼo te māhina. E lagi ʼe fakahā ai ni hahaʼi ʼe mahahaki ʼe ʼaoga ke ʼaʼahi, peʼe ke nātou logo ki te ʼu fakatuʼutuʼu ʼa te kokelekasio ki te temi ka haʼu. Koutou fakalogo fakalelei foki ke feala ai hakotou ʼiloʼi pea ke koutou teuteu ke koutou kau ki te ʼu gāue ʼaia.
5 Kapau ko he koga ʼo te fono ʼe ʼaoga ke kau kiai mo nātou ʼaē ʼi te fono, ʼe feala ke koutou teuteu ʼo lau te manatu ʼi te alatike pea mo te ʼu vaega ʼo te Tohi-Tapu. Koutou fakakaukauʼi peʼe feafeaʼi hakotou fakaʼaogaʼi te ʼu manatu pea ko te ʼu faʼahiga tali feafeaʼi ʼe feala ke koutou fai moʼo fakaloto mālohiʼi ʼo ʼihi. ʼE tonu ke koutou talanoa ki te ʼaoga ʼo te akonaki ʼaki he fakamatala fakanounou.
6 Mokā ʼe ʼi ai he faʼifaʼitaki, koutou manatuʼi te ʼu ʼaluʼaga ʼe tau mo koutou ʼi te gāue, pea koutou fakakaukauʼi te meʼa ka koutou talanoa anai kiai. Koutou tohi te ʼu palalau neʼe koutou fakaʼaogaʼi pea mo te faʼahiga tali. Koutou manatuʼi te meʼa neʼe koutou palalau kiai ʼi he temi neʼe koutou tau ai mo te faʼahi ʼaia ʼi te faka mafola, pea koutou vakaʼi peʼe feafeaʼi te tokoni ʼa te ʼu puani ʼo te faʼifaʼitaki ke koutou maʼu ai he ʼu fua lelei ʼi te temi ka haʼu.
7 Ko nātou ʼaē ʼe nātou fai te ʼu faʼifaʼitaki pea mo kau ki te ʼu fakafehuʼi ʼe tonu anai ke nātou teuteu lelei ʼo fai fakatomuʼa. ʼE tonu ke nātou ʼiloʼi takitokotahi te meʼa ka nātou talanoa kiai ʼi muʼa. Ko te ʼu koga ʼaē neʼe mole lelei tona teuteuʼi e tahitahiga tana uga peʼe ina fakaloto mālohi ia nātou ʼaē ʼi te fono. Ko ʼihi ʼaē neʼe teuteu ʼo ʼuhiga mo te faʼahi ʼaia ʼe nātou liuliuga ʼi te hili ʼo Te Tule Leʼo ʼaē ʼe fai ʼi te vāhaʼa ke feala ai hanatou fakamāmāhani mai muʼa pea ke faka fealagia ki te ʼu tēhina ʼaē ʼe fai mikolo ke nātou ʼiloʼi te meʼa ʼaē ʼe ʼaoga anai.
8 ʼI ʼihi temi ʼe fakaʼosi te polokalama ʼaki he akonaki ʼe ʼalutahi mo he puani tāfito ʼe ʼaoga ki te kokelekasio peʼe ko he alatike ʼo Te Tule Leʼo. Koutou fakalogo fakalelei, ʼo koutou taupau maʼu te tokoni ʼi tokotou loto pea ke koutou faiga ke koutou maʼuliʼi.
9 ʼE tou fia “teuteu ki te gāue lelei fuli pe.” (2 Tim. 2:21) Ko te Fono Gāue ʼe ko he meʼa kai ʼe foaki mai e Sehova moʼo tokoni kia tatou ke tou fai te faʼahi ʼaia. Ko tatatou agatonu ʼo kau ki te fono pea mo tatatou faiga fakamalotoloto ke tou fakaʼaogaʼi te meʼa ʼaē ʼe tou akoʼi ʼe tokoni moʼoni anai kia tatou ke feala hatatou “fakahoko katoa [totatou] minisitelio.”—2 Tim. 4:5.